ورتالىق كوممۋنيكاتسيالار قىزمەتىندە ەلىمىزدە جاپپاي جرۆي تۇماۋى مەن سۋىق تيۋ بويىنشا قالىپتاسقان جاعدايعا بايلانىستى ءباسپاسوز كونفەرەنتسياسى ءوتتى. جيىن بارىسىندا دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشين وتكەن جىلمەن سالىستىرعاندا سىرقاتتانۋشىلىق 14 پايىزعا تومەن ەكەنىن ايتتى.
«قازىرگى تاڭدا ءبىزدىڭ ەلىمىزدە ەپيدەميولوگيالىق جاعداي تۇراقتى بولىپ تابىلادى. وتكەن جىلمەن سالىستىرعاندا جالپى سىرقاتتانۋشىلىق 14 پايىزعا تومەن. ءار جىلدا ءجىتى رەسپيراتورلى ۆيرۋستىق ينفەكتسيا مەن تۇماۋ اۋرۋلارى وسى جەلتوقسان ايىنىڭ ورتاسىنان باستالادى. ودان كەيىن قاڭتار ايىندا ەكىنشى مارتە كوتەرىلۋى مۇمكىن. قازىرگى تاڭدا لابوراتوريالاردا انىقتالعان تۇماۋدىڭ تەك 30 جاعدايى تىركەلىپ وتىر. ونىڭ ىشىندە 58 پايىزى «ب» ءتيپى جانە 42 پايىزى «ا» ءتيپى. بيىلعى جىلدىڭ ەرەكشەلىگى – 2009-2011 جىلدارى بۇكىل الەمدى شۋلاتقان ن1 تۇماۋى بيىل تىركەلمەدى. ەكىنشىدەن, بيىلعى جىلى ءبىز ءجىتى رەسپيراتورلى ۆيرۋستى ينفەكتسيالاردى الساق, ولاردىڭ 10-نان استام ءتۇرى بار. بۇل تۇماۋعا ۇقساس ءجىتى رەسپيراتورلى ينفەكتسيالاردىڭ تيپتەرى. ونىڭ نەگىزگى قوزدىرعىشتارى – رينا, مەتا, ادەنا ۆيرۋستارى. بۇگىنگى تاڭدا كوبىسىن رينا ۆيرۋستار قۇراپ وتىر. ولار 38 پايىز, ادەنا ۆيرۋستار 20 پايىز. بيىل ەلىمىزدە تۇماۋعا ۇقساس اسا قاۋىپتى ۆيرۋستاردىڭ ءبىرى – كارونا ۆيرۋسى. ول ءبىر كەزدەرى ساۋد ارابياسى مەن وڭتۇستىك كورەيا ەلدەرىندە تىركەلىپ, سوڭى ولىممەن اياقتالعان جاعدايلار دا بار. ەلىمىزدە تىركەلگەن بۇل ۆيرۋس ازىرشە 4 پايىزدى قۇراپ وتىر. وسىلاردى ەسكەرە وتىرىپ, ءبىز الدىن الۋ شارالارىن اتقارىپ جاتىرمىز. بىرىنشىدەن, اۋرۋلاردىڭ سانىن ازايتۋ جانە اسقىنۋلاردى بولدىرماۋ ءۇشىن كۇش جۇمسايمىز», دەدى سپيكەر.
ونىڭ ايتۋىنشا, ءبىرىنشى كەزەكتە دەنەنىڭ يممۋندىق كۇشتەرىن كوتەرۋ كەرەك. «بالالارعا اشىق اۋادا ءجيى ءجۇرۋ, تىنىش ۇيقى ۇسىنىلادى. بالالاردىڭ قوعامدىق شارالارعا قاتىسۋىن شەكتەۋ كەرەك. ەگەر بالا اۋىرسا, وندا ول مەكتەپكە نەمەسە بالاباقشاعا جىبەرىلمەۋى كەرەك», دەدى ول.
ج.بەكشيننىڭ مالىمەتىنشە, قازاقستاندا وننان استام انتيۆيرۋستىق جانە انتيباكتەريالدى پرەپاراتتار تىركەلگەن. بىراق ولار دارىگەر تاعايىنداعاننان كەيىن عانا قولدانىلۋى قاجەت. «نەگىزگى قاتە – ءوزىن ءوزى ەمدەۋ. تەك دارىگەر عانا اۋرۋ ءتۇرىن انىقتاپ, ونىڭ ەمدەۋ جولىن كورسەتەدى. مىسالى, انتيبيوتيكتەرمەن ۆيرۋستىق اۋرۋلار ەمدەلمەيدى, بۇل تۋرالى بارلىق ادام بىلمەيدى. جەدەل رەسپيراتورلى اۋرۋلاردىڭ نەمەسە جرۆي بەلگىلەرى بولعان جاعدايدا ءسىز دەرەۋ مامانعا حابارلاسۋىڭىز كەرەك», دەدى ج.بەكشين.
راۋان قايدار, «ەگەمەن قازاقستان»