ىلە الاتاۋى باۋرايىندا ورىن تەپكەن ۇلتتىق قاۋىپسىزدىك كوميتەتىنىڭ شەكارا قىزمەتى اكادەمياسى ەلىمىزدەگى بىردەن-ءبىر شەكاراشى وفيتسەرلەردى دايىندايتىن اسكەري وقۋ ورنى.
اكادەميادا جيىرماعا جۋىق كافەدرا بار. سونىڭ ىشىندە شوقتىعى بيىك 40 جىلدىق تاريحى بار كينولوگيا جانە اتتى دايىندىق كافەدراسى دەپ ايتساق ارتىق بولماس. بۇگىندە ەلىمىزدەگى كۇشتىك قۇرىلىمدارعا جانە باسقا دا ۆەدوموستۆولارعا كينولوگ-وفيتسەرلەردى دايىنداپ شىعاراتىن كافەدرانى پولكوۆنيك ەركىن وڭباەۆ باسقارادى. تاجىريبەلى مامان, بىلىكتى وفيتسەردىڭ باسشىلىعىمەن كافەدرا ۇجىمى وزدەرىنە جۇكتەلگەن جاۋاپتى مىندەتتى ابىرويلى اتقارۋعا داعدىلانعان. مۇنداعى بىلىكتى وفيتسەرلەر مەملەكەتتىك شەكارانى كۇزەتۋ ىسىنە تاپتىرمايتىن كومەكشى رەتىندە قىزمەتتىك جانۋارلاردى ۇيرەتەدى. ۇجىمداعى ءار وقىتۋشى – ءوز ءىسىنىڭ كاسىبي مامانى. كەزىندە شەكارا شەبىندە ۇزاق جىلدار بويى قىزمەت اتقارىپ كەلگەن كانىگى شەكاراشىلار. كافەدرادا نەگىزىنەن قىزمەت يتتەرىن شەكارا بۇزۋشىنىڭ ءىزىن كەسۋگە, شەكارالىق باقىلاۋ-وتكىزۋ بەكەتتەرىندە كولىككە جاسىرىلعان زاڭسىز ەسىرتكى مەن ۆاليۋتالاردى, جارىلعىش زاتتاردى ىزدەۋگە باۋلىسا, سونىمەن قاتار جاتتىقتىرىپ ۇيرەتەتىن كينولوگ ماماندارىن دا- يىندايدى. كافەدرا دايىنداعان كينولوگ ماماندار مەملەكەتتىك شەكارانىڭ ءار تاراپىنان شەكارانى زاڭسىز كەسىپ وتكىسى كەلگەن ازاماتتار مەن باقىلاۋ-وتكىزۋ پۋنكتتەرى ارقىلى الىپ وتۋگە تىيىم سالىنعان زاتتاردىڭ جولىن كەسىپ, جارىلعىش زاتتار مەن ەسىرتكىلەردىڭ شەكارا اسۋى- نا جول بەرمەيدى. ساباق بارىسىندا اكادەميا قابىرعاسىندا ءبىلىم الىپ جاتقان ءار كۋرسانتقا ءبىر قىزمەت ءيتى بەكىتىلىپ بەرىلەدى. ولار يتتەردىڭ ءيىس سەزۋ قابىلەتىن دامىتۋ ارقىلى جارىلعىش زاتتار مەن زاڭسىز ۆاليۋتالاردى تابۋعا, شەكارا بۇزۋشىنى قۇرىقتاۋدىڭ ايلا-تاسىلدەرىن ۇيرەتۋگە ماشىقتاندىرادى.
جاقىندا كافەدرا باستىعى, پولكوۆنيك ەركىن بۇركىتباي ۇلى مەن ونىڭ ورىنباسارى پودپولكوۆنيك يگور الەكساندروۆيچتىڭ ۇيعارىمىمەن سارىاعاش قالاسىندا وتكەن ۇقك شەكارا قىزمەتىنىڭ بىرىنشىلىگىندەگى جارىسقا اكادەميانىڭ اتىنان بارعان ارىپتەستەرىمىزدىڭ اسىعى الشىسىنان ءتۇسىپ, 2-ورىندى يەلەندى. ولار كەلىسىمشارت قىزمەتىنىڭ سەرجانتتارى د. الكەەۆ پەن ە.ناسيروۆتار بولاتىن. كافەدرانىڭ بەتكە ۇستار كينولوگتارى ەسىرتكى زاتىن ىزدەۋ بويىنشا ارنايى يتتەردىڭ ۇزدىك مامان كينولوگى اتانىپ, ماقتاۋ قاعازدارىمەن ماراپاتتالدى. جالپى كوماندا بويىنشا «ارنايى يتتەردىڭ ۇزدىك مامانى» اۋىسپالى كۋبوگىن جەڭىپ الدى.
اكادەميا قابىرعاسىندا دايىندالىپ جاتقان بولاشاق شەكاراشى وفيتسەرلەر شەكارا شەبىنە قىزمەتكە كەلگەن سوڭ, قاراماعىنداعى جەكە قۇرامعا جىلقىنى شەكارانى كۇزەتۋگە, جۇكتەردى تاسىمالداۋعا, وزەندەر مەن تاۋلى جەردىڭ سوقپاق جولدارىمەن جۇرۋگە جانە تابيعي جول كەدەرگىلەرىن وڭاي ەڭسەرۋدىڭ قىر-سىرىن ۇيرەتەدى. جانۋارعا كەرەگىنشە كۇتىم كورسەتۋگە, باپتاپ, جۇمىسقا جانە دەمالىسقا دۇرىس دايىنداۋعا, قىزمەتكە پايدالانا بىلۋگە دايىن بولۋ ساباقتارىندا كافەدرانىڭ اعا وقىتۋشىسى پودپولكوۆنيك ا.پلاحوۆانىڭ ەڭبەگى ەرەن. ول شيرەك عاسىرداي قىزمەت اتقارىپ كەلەدى.
كافەدرا وقىتۋشىلارى قىزمەتتىك يتتەردى كۇتىپ-باپتاپ, ۇيرەتىپ-جاتتىقتىرۋدى وقۋ ۇدەرىسىندە عانا قولدانىپ قويماي, سونىمەن قاتار كۇشىك ءوسىرۋدى دە ىسكە اسىرىپ, قىزمەتتىك يتتەر قاتارىن اسىل تۇقىمدى يتتەرمەن دە تولىقتىرىپ وتىرادى. بۇل تۇرعىدا بىرقاتار وڭدى ىستەر جۇزەگە اسىپ كەلەدى. اكادەميانىڭ جوعارى باسشىلىقتارىنىڭ كەلىسىمىمەن الدىن الا قۇرىلعان جوسپار بويىنشا «بەلگيا وۆچاركاسى» تۇقىمىن قالدىرۋ ماقساتىندا جۇرگىزىلگەن جۇمىس ناتيجەسىن بەردى. بۇل كۇشىكتەردىڭ اناسى جوعارىدا اتالعان جارىستا جەڭىسكە جەتكەن جانە كوپتەگەن جاقسى جەتىستىكتەرىمەن كورىنگەن العىر, ەسىرتكىنى ىزدەپ تابۋدىڭ شەبەرى. ونىڭ لاقاپ اتى «اۋرا» دەپ اتالسا, قىلمىسكەردىڭ ءىزىن كەسۋگە جانە ۇستاۋعا قابىلەتى جاقسى جەتىلگەن ەركەگى «ەساۋل» دەپ اتالادى. قازىر ۇيرەتۋ-جاتتىقتىرۋ جۇمىستارىمەن كۇشىك ءوسىرۋشى توبىنىڭ اعا نۇسقاۋشىسى سەرجانت ۇ.نۇرلان تۇپكىلىكتى اينالىسۋدا. كۇشىكتەردىڭ ورنالاسقان ورنى سانيتارلىق جانە باسقا دا تالاپتارعا ساي. بۇيىرسا التى ايدان سوڭ بۇل كۇشىكتەر دە كۋرسانت-كينولوگتارعا بەرىلىپ, وقۋ ۇدەرىسىنە بەرىلەتىن قىزمەتتىك يتتەردىڭ قاتارىن تولىقتىرماق. كينولوگيا جانە اتتى دايىندىق كافەدراسىنىڭ تاجىريبەلى وفيتسەرلەرى مەملەكەتتىك شەكارانى كۇزەتۋشى كينولوگ ماماندارعا قىزمەتتىك جانۋارلاردى قولدانۋ تاسىلدەرىنىڭ قىر-سىرىن ۇيرەتۋ بارىسىندا ولاردىڭ مىنەز-ق ۇلىق ەرەكشەلىكتەرىن, قاسيەتتەرىن ەسكەرۋگە, دۇرىس قولدانا بىلۋىنە دە ەرەكشە نازار اۋدارىپ كەلەدى.
مارات مولدابەكوۆ, پودپولكوۆنيك, ۇقك شەكارا قىزمەتى اكادەمياسىنىڭ اعا وقىتۋشىسى