قازىرگى تاڭدا قوعامنىڭ قۇقىقتىق ۇستانىمدارى قولدانىستاعى اكىمشىلىك قۇقىق بۇزۋشىلىقتار تۋرالى زاڭنامانى ودان ءارى جەتىلدىرۋ قاجەتتىگىن ايقىندايدى. 2015 جىلى ەلباسى ن.نازارباەۆ ۇكىمەتكە اكىمشىلىك-دەليكتىك زاڭنامانىڭ تيىمدىلىگىن ارتتىرۋ تۋرالى ماسەلەنى قاراۋدى جۇكتەگەن ەدى.
وسىعان قوسا, ەلباسى بىلتىرعى جولداۋىندا دا اكىمشىلىك زاڭنامانى ىزگىلەندىرۋ قاجەتتىگىن اتاپ ءوتتى. وسى تۇرعىدا پرەزيدەنتتىڭ ۇكىمەتكە بەرگەن تاپسىرمالارىنىڭ ەرەكشە وزەكتىلىگى بار.
قويىلعان مىندەتتەردى ورىنداۋ ءۇشىن ادىلەت مينيسترلىگىنىڭ جانىنان ۆەدومستۆوارالىق عىلىمي-كونسۋلتاتسيالىق جۇمىس توبى قۇرىلدى. ونىڭ قۇرامىنا مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە عىلىمي قاۋىمداستىقتىڭ وكىلدەرى كىرىپ, ءوزارا قارىم-قاتىناستا اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلار ەنگىزۋدى كوزدەيتىن زاڭ جوباسىن ازىرلەدى.
زاڭ جوباسى اكىمشىلىك قۇقىق بۇزۋشىلىق تۋرالى كودەكستىڭ جازالاۋ شارالارىن جەڭىلدەتۋگە, الدىن الۋ فۋنكتسياسىن ارتتىرۋعا جانە ادام قۇقىقتارى مەن بوستاندىقتارىن, قوعام مەن مەملەكەتتىڭ مۇددەلەرىن قورعاۋدى كۇشەيتۋگە باعىتتالدى. وسى ورايدا زاڭناما ينستيتۋتى دا ادىلەت مينيسترلىگىنە باعىنىستى مەكەمە رەتىندە اتالعان شارالارعا اتسالىسۋدا.
ماسەلەن, اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلاردى ازىرلەۋ بارىسىندا زاڭناما ينستيتۋتى ءوز قۇزىرەتى شەگىندە زاڭ جوباسىنىڭ نەگىزگى ەرەجەلەرىن بۇقارالىق اقپارات قۇرالدارىندا جانە الەۋمەتتىك جەلىلەردە كەڭ اۋقىمدا اقپاراتتىق-ءتۇسىندىرۋ جۇمىستارىن جۇرگىزدى.
زاڭ جوباسىن ازىرلەۋشىلەر جۇمىس بارىسىندا اكىمشىلىك قۇقىق بۇزۋشىلىق تۋرالى كودەكس بويىنشا كەلىپ تۇسكەن 1200-دەن استام ۇسىنىستى قاراستىرىپ, سولاردىڭ ىشىنەن 472 ۇسىنىس بويىنشا كەلىسىلگەن شەشىم قابىلدادى. كودەكستىڭ 335-بابى وزگەرتىلدى جانە 28 جاڭا باپقا تولىقتىرىلدى. جالپى, اكىمشىلىك زاڭنامانى ىزگىلەندىرۋگە باعىتتالعان 345 قۇرام بويىنشا سانكتسيالار جەڭىلدەتىلگەن, 157-دەن استام اكىمشىلىك قۇرام بويىنشا ايىپپۇلداردىڭ مولشەرلەرى تومەندەتىلگەن, 38 قۇرام بويىنشا ەسكەرتۋ جاساۋ جازاسىن قولدانۋ ينستيتۋتى كەڭەيتىلگەن, سونداي-اق جەڭىلدەتۋ ماقساتىندا 30 قۇرام بويىنشا جازا تۇرلەرى قايتا قارالدى.
اكىمشىلىك قۇقىق بۇزۋشىلىق تۋرالى كودەكستە ەسكەرتۋ جاساۋ جازاسىن قولدانۋ ءتارتىبى تولىق مولشەردە ايقىندالماعانىن ەسكەرە وتىرىپ, وسى ماسەلەنىڭ زاڭنامالىق رەتتەلۋىن قامتاماسىز ەتۋ ماقساتىندا كودەكستى بەلگىلى ءبىر قۇقىقتىق ەرەجەلەرمەن تولىقتىرۋ قاجەت. وسى ماسەلەنى شەشۋ ءۇشىن ازىرلەۋشىلەر ۇيقاستىق قاعيداتىنا سايكەس جاسالعان قۇقىق بۇزۋشىلىق ءۇشىن ەسكەرتۋ جاساۋ جازاسىن تاعايىنداۋ مۇمكىن قۇرامداردى كەڭەيتۋ قاجەت دەگەن شەشىمگە كەلدى.
قازىرگى كەزدە زاڭ جوباسى پارلامەنت ماجىلىسىندە تالقىلاۋدا جاتىر جانە وسى جىلدىڭ اياعىنا دەيىن ەلباسىنىڭ قاراۋىنا ەنگىزىلمەك.
دوستان دوسمىرزا, قازاقستان رەسپۋبليكاسى زاڭناما ينستيتۋتىنىڭ ءبولىم باسشىسى