قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ 2-كۋرس ستۋدەنتى مارجان جەتپىسباەۆا «قىز سىنى جانە جىگىت سۇلتانى» قالالىق بايقاۋىنىڭ گران-پري يەگەرى اتاندى. بۇل تۋرالى وقۋ ورنىنىڭ مەديا ورتالىعى حابارلادى.
الماتى قالاسى جاستار ساياساتى جونىندەگى باسقارماسىنىڭ قولداۋىمەن «Q-Fest» جوباسىنىڭ اياسىندا وتكەن سايىس وڭتۇستىك استانالىق جوعارى وقۋ ورىندارىنىڭ ستۋدەنتتەرى اراسىندا تۇڭعىش رەت ۇيىمداستىرىلىپ وتىر. دوداعا ىرىكتەۋ كەزەڭدەرىنەن توپ جارىپ شىققان 20 ۇمىتكەر قاتىسىپ, باقتارى مەن باپتارىن سىنادى.
جوبا ۇيىمداستىرۋشىلارى – ءال-فارابي اتىنداعى قازۇۋ-دىڭ «كەرەمەت» جاستار رەسۋرستىق ورتالىعى» قوعامدىق ۇيىمى مەن ءال-فارابي اتىنداعى قازۇۋ-دىڭ ستۋدەنتتەر سەناتى.
– ءىس-شارا مەملەكەت باسشىسىنىڭ «رۋحاني جاڭعىرۋ» باعدارلاماسىن جانە الماتى قالاسىندا «جاستار جىلى» جوباسىن جۇزەگە اسىرۋ ورايىندا ىسكە اسىرىلىپ وتىر. ماقسات – جاستار بويىندا ۇلتتىق تاربيە قۇندىلىقتارىن دامىتۋ, مەملەكەتتىك ءتىلدىڭ قولدانىسىن كەڭەيتۋ, جاستاردىڭ جەكە تۇلعا رەتىندە جاراسىمدى دامۋىنا, بۇگىنگى قىزدار مەن جىگىتتەردىڭ شىعارماشىلىق جانە جوعارى زياتكەرلىك الەۋەتىن ارتتىرۋ, تابيعي سۇلۋلىقتى ناسيحاتتاۋ. بايقاۋ بارىسىندا جاستار بويىنداعى وزدەرى ءۇشىن جاڭا جانە ءداستۇرلى ەمەس مۇمكىندىكتەر مەن شىعارماشىلىق قابىلەتتەرىن اشۋ ماقساتىندا ءتۇرلى شەبەرلىك سىنىپتارى مەن ترەنينگتەر وتكىزىلدى. ول ءوز كەزەگىندە قاتىسۋشىلار اراسىندا قازاق حالقىنىڭ سالت-ءداستۇرىن ناسيحاتتاۋعا, اتا-بابالارىمىزدىڭ ءتول مادەنيەتى جايلى ءبىلىمىن كەڭەيتۋگە ىقپال ەتەدى. وسى تاقىلەتتەس سايىستار جاستار اراسىندا سالاۋاتتى ءومىر سالتى يدەولوگياسىن قالىپتاستىرۋعا سەپ بولماق, – دەيدى شارا ۇيىمداستىرۋشىلارى.
اقتىق مارەگە قاتىسۋشىلاردىڭ ينتەللەكتۋالدى ورەسى مەن ونەرى, ءبىلىمى سارالاندى. ارۋلار ءوز قولىمەن دايىنداعان ۇلتتىق تاعام ازىرلەۋدەگى شەبەرلىگىن, سۇلتاندار ات ابزەلدەرى مەن ۇلتتىق داستۇرلەرگە بايلانىستى سۇراقتارعا جاۋاپ بەرىپ العىرلىقتارىن دا بايقاتتى.
سايىسكەرلەر «سالەمدەسۋ», «سۇراق-جاۋاپ», «ونەر» «ۇلتتىق ناقىشتاعى زاماناۋي ءسان ۇلگىلەرىن كورسەتۋ» كەزەڭدەرى بويىنشا باق سىناستى. ولارعا ونەر ادامدارى مەن مادەنيەت قايراتكەرلەرىنەن قۇرالعان قازىلار القاسى باعا بەردى.
تارتىستى وتكەن جارىس كورەرمەندەرگە ەرەكشە اسەر سىيلاعانى انىق. قاتىسۋشىلاردىڭ ءبىرى اسەرلى اندەرىمەن جۇرتشىلىقتى ءتانتى ەتسە, ەندى ءبىرى كوركەم بيىمەن, ساحنالىق كورىنىستەرىمەن كوپشىلىكتىڭ ىستىق ىقىلاسىنا بولەندى.
ادىلقازىلار القاسىنىڭ ۇيعارىمى بويىنشا, قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ونەر جانە مادەنيەت فاكۋلتەتىنىڭ ستۋدەنتى مارجان جەتپىسباەۆا جۇزدەن – جۇيرىك, مىڭنان – تۇلپار شىعىپ, ۇزدىك دەپ تانىلدى. ال, قالعان ارۋلار ءتۇرلى اتالىمدار بويىنشا ماراپاتتالدى.
– بۇگىندە ۇلاعات ۇياسى اتانعان قىزدار ۋنيۆەرسيتەتىنىڭ «مادەني-تىنىعۋ جۇمىسى» ماماندىعىنىڭ 2-كۋرسىندا ءبىلىم الامىن. بۇعان دەيىن الماتى قالالىق «كوركەمسوز وقۋ شەبەرلەرىنىڭ» كونكۋرسىنا, «انا ءتىلى ارۋى – 2017» بايقاۋىنا قاتىسىپ, جۇلدەلى ورىندارعا يە بولدىم. ال, بۇل سايىس مەن ءۇشىن ورنى ەرەكشە. بايقاۋدا جەڭىمپاز اتانۋىما, اسىرەسە ۇستازىم مەرۋەرت تۇسىپباەۆا كوپ ەڭبەك ءسىڭىردى. جارىس بارىسىندا كورسەتكەن قولداۋى ءۇشىن ءبىلىم مەن عىلىمنىڭ قاراشاڭىراعى اتانعان وقۋ ورداسىنىڭ وقىتۋشىلارى مەن ستۋدەنتتەرىنە دە العىس ايتقىم كەلەدى, – دەپ اتاپ ءوتتى م. جەتپىسباەۆا.
ارۋلار سايىسىنان جۇلدەمەن ورالعان بويجەتكەندى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا قابىلداپ, جەڭىسىمەن قۇتتىقتادى. وقۋ ورنىنىڭ باسشىسى ءوز سوزىندە دامۋدىڭ داڭعىل جولىنا باعىت العان بولاشاعى باياندى ەلدىڭ ءورىسى قاشاندا بىلىكتى دە سانالى ءھام ونەرلى ۇرپاعىمەن كەڭەيەتىندىگىن ايتتى.