كەزدەسۋ بارىسىندا ەكىجاقتى ىنتىماقتاستىقتى ودان ءارى دامىتۋ, ونىڭ ىشىندە تەحنيكالىق كومەك كورسەتۋ, تەمىر جول تاريفتەرىن سايكەستەندىرۋ, ازاماتتارعا قويىلاتىن كوشى-قون تالاپتارىن جەڭىلدەتۋ ماسەلەلەرى تالقىلاندى. تاراپتار قازاقستان مەن قىرعىزستان اراسىنداعى ىنتىماقتاستىقتىڭ 2017-2020 جىلدارعا ارنالعان كەشەندى باعدارلاماسىن ازىرلەۋدەگى ەلەۋلى ىلگەرىلەۋدى اتاپ ءوتتى, ول تاياۋ كەلەشەككە ەكى ەل اراسىنداعى ستراتەگيالىق سەرىكتەستىك پەن ءوزارا ءتيىمدى قارىم-قاتىناستاردى دامىتۋ مەن نىعايتۋدىڭ جول كارتاسىنا اينالۋى ءتيىس.
بۇدان وزگە, پرەمەر-مينيسترلەر ەكى تاراپتىڭ قازاقستاندىق-قىرعىز مەملەكەتتىك شەكاراسىن مەجەلەۋ بويىنشا شارتقا قول قويۋعا ازىرلىك دەڭگەيىن باعالادى.
سونىمەن قاتار ەكى ەلدىڭ وڭىرلىك ۇيىمداردا, سونىڭ ىشىندە تۇركىتىلدەس مەملەكەتتەر ىنتىماقتاستىعىنىڭ كەڭەسى اياسىندا ءوزارا ءىس-قيمىل جاساسۋىنا قاتىستى تاقىرىپتار قوزعالدى.
وعان قوسا, ب.ساعىنتاەۆ پەن س.جەەنبەكوۆ استانادا ەكسپو-2017 كورمەسىن جانە بيىلعى 31 تامىزدا وتەتىن قىرعىزستاننىڭ ۇلتتىق كۇنىن وتكىزۋ بارىسىن تالقىلادى.
كەزدەسۋ سوڭىندا باقىتجان ساعىنتاەۆ قىرعىزستاندى حالىقارالىق كورمەنى قورىتىندىلايتىن يىۇ عىلىم جانە تەحنولوگيالار جونىندەگى سامميتىنە بەلسەندى قاتىسۋعا شاقىردى.