وتكەن جىلعى تۇمشالاۋ كەزىندە سالىنعان توپىراقتار مەن تاستاردى تازالاۋ جۇمىستارىنان باستالعان ارحەولوگيالىق قازبا جۇمىستارى ناتيجەسىندە باس قۇرىلىستىڭ جاڭادان ءۇش قىرى تولىق انىقتالىپ, تازالاندى. سەگىز قىرلى باس قۇرىلىستىڭ ءتورتبۇرىش ىرگەتاسى ارشىلىپ, ونىڭ تاستان قالانعانى بەلگىلى بولدى. سونىمەن قاتار, قازبا جۇمىسى الاڭىنان كەۋدەسى تومەن قاراعان جاڭا ءبادىز تابىلدى. بۇل عۇرىپتىق كەشەن اۋماعىنان تابىلعان ەكىنشى تاس ءمۇسىن ءبادىز. وتكەن جىلعى زەرتتەۋلەر بارىسىندا وسىعان ۇقساس تاس ءمۇسىن تابىلعانىن حابارلانعان.
بۇدان بولەك, كەشەننىڭ باس قۇرىلىس الاڭىن ارشىپ تازالاۋ بارىسىندا پىشاقتىڭ تەمىر ۇشى, ورنەكتى تاس سىنىقتارى, تەمىر جەبەلەر, لاعىل, اقىق تاس مونشاقتار, تەمىر قاپسىرمالار تابىلدى.
كونە تۇرىك داۋىرىندە يمپەريانىڭ قاعان, يابعۇ, شاد, بۇيرىق, تارحان, تەگىن سىندى بيلىك يەلەرىنە, لاۋازىمدى تۇلعالارىنا ارنايى عۇرىپتىق كەشەندەر ورناتىلىپ, ارۋاعىنا تاعزىم ەتىپ, مەملەكەتتىك دەڭگەيدە ارنايى جوسىن-جورالعىلار اتقارىلاتىن بولعانى بەلگىلى. ورتالىق ازيادا قايتالانباس ءارى بىرەگەي «شيۆەەت ۋلاان» سونداي كونە عۇرىپتىق كەشەندەردىڭ ءبىرى. اكادەميا كونە تۇركى ەسكەرتكىشىن زەرتتەۋ جۇمىستارىن ءالى دە جالعاستىرادى.
ايتا كەتۋ كەرەك, تۇركى اكادەمياسى موڭعوليالىق ارىپتەستەرىمەن بىرگە «شيۆەەت ۋلاان» عۇرىپتىق كەشەنىندەگى العاشقى قازبا جۇمىستارىن بىلتىر جاز ايىندا باستاعان. سول ەكسپەديتسيانىڭ ناتيجەلەرى مەن العاشقى قورىتىندىلارى نەگىزىندە TWESCO ازەربايجان, قازاقستان, قىرعىزستان, موڭعوليا, رەسەي جانە تۇركيا عالىمدارى مەن ءباسپاسوز وكىلدەرىنىڭ قاتىسۋىمەن 2016 جىلعى تامىزدا « ۇلى دالا كوشپەلىلەرى: تاريحي-مادەني ۇندەستىكتەر» اتتى ءىى دالا سەمينارىن وتكىزگەن ەدى.