اتاقتى ۇشقىش نۇركەن ءابدىروۆتىڭ قاراعاندىداعى ايگىلى ەسكەرتكىشى ءسان-ساۋلەتىمەن الىسقا ايان بولسا, ودان سوڭ بوي كوتەرگەن «شاحتەر داڭقى» دا سوندايلىق تانىمال.
وسىنداي ەرەكشە ونەر تۋىندىلارىن دۇنيەگە كەلتىرگەن سەكسەننەن اسقان قاريا اناتولي پەتروۆيچ بيلىك ەكەنىن دە ايتا كەتكەن ءجون. ونىڭ تاستان قاشالعان ەڭبەكتەرى قازىر ەلىمىزدەگى ءبىراز قالالاردىڭ كوشەلەرىن كوركەيتىپ تۇر.
وبلىستىق مۇراعاتتار جانە قۇجاتتاما باسقارماسى باستاماشىلىعىمەن مۇنىڭ الدىندا جازۋشى جايىق بەكتۇروۆتىڭ, ولكەتانۋشى يۋري پوپوۆتىڭ جەكە مۇراعاتتىق قورى مەملەكەتتىك ساقتاۋعا الىنسا, ەندى ولاردىڭ قاتارىن اناتولي بيلىك قولىنداعى جادىگەرلەر, قۇجاتتار, البومدار, كىتاپتار تولىقتىردى. سول ارقىلى ءمۇسىنشىنىڭ شىعارماشىلىق جولىمەن كەڭىرەك تانىسۋعا بولادى.
مۇراعاتشىلار بۇل كۇندە يزرايلدە تۇراتىن, «ورتالىق قازاقستان» گازەتىنىڭ بۇرىنعى ءفوتوتىلشىسى يۋري حەيفيتستىڭ ءوڭىر ومىرىنەن تۇسىرىلگەن سۋرەتتەرىن سۇراتىپ الىپ, ساقتاۋعا قويۋدى قولعا الىپ جاتىر. ايماق ەلەۋلى تۇلعالارىنىڭ جەكە مۇراعاتتىق قورىن كوپشىلىك يگىلىگىنە ۇسىنۋ شارالارى جالعاسا بەرەدى.
ايقىن نەسىپباي.
قاراعاندى.