بۇل جولعى ءداستۇرلى بريفينگتى ءسىم-ءنىڭ جاڭا رەسمي وكىلى التاي ابيبۋللاەۆ ءوتكىزدى. ونى جۋرناليستەرمەن بولعان بريفينگتىڭ الدىندا سىرتقى ىستەر مينيسترلىگىنىڭ حالىقارالىق اقپارات كوميتەتىنىڭ توراعاسى رومان ۆاسيلەنكو تانىستىردى. ر.ۆاسيلەنكو سونداي-اق وسىعان دەيىن مينيسترلىكتىڭ رەسمي وكىلى قىزمەتىن اتقارىپ كەلگەن اسقار ابدراحمانوۆتىڭ شەت ەلدەگى ديپلوماتيالىق جۇمىسقا اۋىسۋىنا بايلانىستى بۇل قىزمەتتەن بوساتىلعانىن حاباردار ەتتى.
ا.ابيبۋللاەۆ بريفينگىن وسى اپتادا قازاقستاندا حالىقارالىق دەڭگەيدە ۇيىمداستىرىلعالى وتىرعان ەڭ باستى وقيعا – 12-13 قازاندا استانا مەن سەمەيدە وتەتىن «يادرولىق قارۋسىز الەم» اتتى حالىقارالىق فورۋم جۇمىسى ەكەنىن اتاۋدان باستادى. فورۋمدى قازاقستاندىق تاراپ ايتارلىقتاي كۇش-جىگەر جۇمساپ, مازمۇندى وتكىزۋگە ۇمتىلىپ وتىر, دەدى رەسمي وكىل.
فورۋم اياسىندا قازاقستان پرەزيدەنتى نۇرسۇلتان نازارباەۆ, مەملەكەتتىك حاتشى قانات ساۋداباەۆ پەن سىرتقى ىستەر ءمينيسترى ەرجان قازىحانوۆ فورۋمعا قاتىساتىن ءبىرقاتار الەمگە تانىمال ساياسي تۇلعالارمەن, يادرولىق ءماسەلەلەر جونىندەگى حالىقارالىق ۇيىمدار باسشىلارىمەن كەزدەسۋلەر وتكىزەدى دەپ كۇتىلۋدە ەكەن.
13 قازاندا سىرتقى ساياسات ۆەدومستۆوسىنىڭ باسشىسى سەمەي يادرولىق سىناق پوليگونى جابىلۋىنىڭ 20 جىلدىعىنا وراي ۇيىمداستىرىلعالى وتىرعان ميتينگكە قاتىسىپ, وندا ءسوز سويلەيدى. سونداي اق, ەرجان قازىحانوۆ يۋكيا امانو, تيبور توت جانە باسقا دا فورۋم مەيماندارى بۇرىنعى پوليگونعا ات باسىن تىرەيدى, دەدى رەسمي وكىل.
10-11 قازاندا ءال-كۋۆەيتتە «ازيا ىنتىماقتاستىق ۇنقاتىسۋى جارقىن بولاشاق جولىندا» اتتى وعان مۇشە ەلدەر سىرتقى ىستەر مينيسترلەرىنىڭ 10-شى وتىرىسى بولادى, دەپ جالعادى ءسوزىن ا.ابيبۋللاەۆ. قازاقستاندىق دەلەگاتسيانى سىرتقى ىستەر ءمينيسترىنىڭ ورىنباسارى قايرات سارىباي باسقاراتىن بولادى.
رەسمي وكىل 11-12 قازاندا استانادا ەۋروپالىق وداقپەن ساياسي ۇنقاتىسۋ كەستەسىنە سايكەس, «قازاقستان رەسپۋبليكاسى – ەۋروپالىق وداق» ىنتىماقتاستىق كوميتەتىنىڭ 11-ءشى وتىرىسى وتەتىنىن دە حابارلادى. بۇل جولى قازاقستان دەلەگاتسياسىنا سىرتقى ىستەر ءمينيسترىنىڭ ورىنباسارى – ەۋروپالىق وداقپەن ىنتىماقتاستىق ماسەلەلەرى ءجونىندەگى ۇلتتىق ۇيلەستىرۋشىسى كونستانتين جيگالوۆ باسشىلىق ەتەدى ەكەن.
بريفينگ سوڭىندا رەسمي وكىل قازاننىڭ 16-سى مەن 19-ى ارالىعىندا پارلامەنت ءماجىلىسىنىڭ توراعاسى ورال مۇحامەدجانوۆ باستاعان پارلامەنتتىك دەلەگاتسيانىڭ پارلامەنتارالىق اسسامبلەيانىڭ بەرندە وتەتىن ىنتىماقتاستىق جونىندەگى 125-ءشى وتىرىسىنا قاتىساتىنىن ءمالىمدەدى.
«ەگەمەن-اقپارات».