وتكەن جىلدىڭ قورىتىندىسى بويىنشا قازاقستانداعى ەكىنشى دەڭگەيلى بانكتەردىڭ (ەدب) جيىنتىق تازا پايداسى 2,7 ترلن تەڭگەگە جەتىپ, 2024 جىلمەن سالىستىرعاندا شامامەن 7%-عا ارتتى. 2026 جىلعى 1 قاڭتارداعى دەرەككە سايكەس, بانك اكتيۆتەرىنىڭ تابىستىلىعى (ROA) 4,2%, ال مەنشىكتى كاپيتالدىڭ تابىستىلىعى (ROE) 28,4% بولدى. سەكتوردىڭ جيىنتىق مەنشىكتى كاپيتالى 10,6 ترلن تەڭگەگە جەتىپ, ءبىر جىلدا 19,1%-عا ۇلعايدى. جالپى پايدانىڭ 87%-دان استامى نەمەسە 2,3 ترلن تەڭگەسى مەنشىكتى كاپيتالى ەڭ ءىرى 10 بانككە تيەسىلى. بۇل – نارىقتاعى نەگىزگى ويىنشىلاردىڭ قارجىلىق ناتيجەسى سەكتور تۇراقتىلىعىنا تىكەلەي اسەر ەتەتىنىن كورسەتەدى, دەپ حابارلايدى Egemen.kz.
ءىرى بانكتەر اراسىندا تابىس ءوسىمى بويىنشا Home Credit Bank العا شىقتى: ءبىر جىلدا كورسەتكىش 23,7%-عا ۇلعايىپ, 43,4 ملرد تەڭگەنى قۇرادى. بىلتىر قارجى ينستيتۋتىنىڭ 100% اكتسياسىن ForteBank ساتىپ العان ەدى.
2025 جىلدىڭ جەلتوقسانىندا Fitch Ratings اگەنتتىگى Home Credit Bank-ءتىڭ «BB−» دەڭگەيىندەگى كرەديتتىك رەيتينگىن «تۇراقتى» بولجامىمەن راستادى. اگەنتتىك شەشىمدى اكتسيونەر اۋىسقاننان كەيىن قابىلداپ, بانكتىڭ قارجىلىق بەيىنى ورنىقتى ەكەنىن, كاپيتالداندىرۋ جانە وتىمدىلىك دەڭگەيى جەتكىلىكتى ەكەنىن, مەنشىك قۇرىلىمى وزگەرگەن كەزەڭدە وپەراتسيالىق تۇراقتىلىق ساقتالعانىن اتاپ ءوتتى. سونداي-اق جاڭا اكتسيونەر تاراپىنان كۇتىلەتىن قولداۋ ەسكەرىلگەن.
بانكتەر تۋرالى زاڭ باسەكەلەستىكتى كۇشەيتەدى
تابىس ءوسىمى بويىنشا ەكىنشى ورىندا – بانك تسەنتركرەديت. ونىڭ پايداسى 23,1%-عا ارتىپ, 240,2 ملرد تەڭگەگە جەتتى. ءۇشىنشى ورىندى Halyk Bank يەلەندى ء(وسىم – 15,6%). ال العاشقى بەستىكتى ForteBank (پليۋس 13,9%) پەن Bank RBK (پليۋس 13,4%) تۇيىندەيدى.
ءىرى ون بانكتىڭ جەتەۋى جىلدىق ديناميكادا تابىسىن ارتتىرسا, ۇشەۋى وتكەن جىلمەن سالىستىرعاندا تومەن ناتيجە كورسەتتى. جالپى سەكتور بويىنشا 23 بانكتىڭ 22-ءسى پايداعا كەنەلگەن. تومەن ناتيجە كورسەتكەن جالعىز بانك – نارىققا جاڭادان شىققان كوممەرتسيالىق بانك بيەنكەي. ساراپشىلار ونىڭ قارجىلىق ناتيجەسىن ۇزاق مەرزىمدە باعالاۋ ورىندى ەكەنىن ايتادى.
جەكە تۇلعالار بانكروتتىعى: بانكتەر قانشا ادامنىڭ بەرەشەگىن كەشىردى؟
تازا پايدا – بانكتىڭ تاۋەكەلدەردى جابۋ, رەزەرۆ قالىپتاستىرۋ جانە كۇيزەلىس كەزەڭدەرىن سىرتقى قولداۋسىز ەڭسەرۋ قابىلەتىن ايقىندايتىن نەگىزگى كورسەتكىش. تۇراقتى ءارى جوعارى تابىستىلىق سەكتوردىڭ ىقتيمال شىعىنداردى, سونىڭ ىشىندە مەرزىمى وتكەن بەرەشەك ءوسىمى نەمەسە ماكروەكونوميكالىق كۇيزەلىستەردى ءوز بەتىنشە ەڭسەرە الاتىنىن بىلدىرەدى.
پايدا بانكتىڭ بيزنەس-مودەلىنىڭ ساپاسىن كورسەتىپ قانا قويماي, كاپيتالدىڭ وسۋىمەن تىكەلەي بايلانىستى. ءدال وسى تابىس ەسەبىنەن بانكتەر مەنشىكتى كاپيتالىن ۇلعايتىپ, رەتتەۋشى تالاپتاردى ساقتايدى جانە نەسيە بەرۋ مەن وزگە دە وپەراتسيالاردى كەڭەيتۋگە مۇمكىندىك الادى. كەڭ اۋقىمدا العاندا, بانك سەكتورىنىڭ تابىستىلىعى – ەكونوميكانىڭ قارجىلىق ينفراقۇرىلىمىنىڭ ومىرشەڭدىگىن ايقىندايتىن فاكتور. بۇل تسيفرلاندىرۋعا, تاۋەكەلدەردى باسقارۋعا جانە ۇزاق مەرزىمدى ونىمدەردى دامىتۋعا ينۆەستيتسيا سالۋعا جول اشادى.
سوڭعى جىلدارى وتاندىق ەدب پايداسى تۇراقتى ءوسىم كورسەتىپ كەلەدى. 2018 جىلدان بەرى سەكتور وڭ قارجىلىق ناتيجەنى ساقتاپ, تەك پاندەميا كەزەڭىندەگى 2020 جىلى ازداعان باياۋلاۋ بايقالعان. پاندەميادان كەيىنگى گەوساياسي سىن-قاتەرلەر دە بانكتەردىڭ جالپى تابىستىلىق ترەندىن وزگەرتە المادى.
حالىقارالىق ساراپشىلار دا سەكتورداعى وڭ احۋالدى اتاپ ءوتىپ وتىر. ماسەلەن, 2025 جىلدىڭ جەلتوقسانىندا S&P Global Ratings اگەنتتىگى قازاقستاننىڭ بانك سەكتورىنداعى سالالىق تاۋەكەل بولجامىن «تۇراقتى» دەڭگەيدەن ء«پوزيتيۆتى» دەڭگەيگە كوتەردى. بۇل – قارجى جۇيەسىنىڭ ورنىقتىلىعىنا بەرىلگەن سىرتقى باعانىڭ ايعاعى.
بانكتەر كاسىپكەرلەرگە 20 ترلن تەڭگە نەسيە بەردى