كەشە استانادا پرەمەر-مينيستر كارىم ءماسىموۆ پەن ليتۆا رەسپۋبليكاسىنىڭ پرەزيدەنتى داليا گريباۋسكايتەنىڭ قاتىسۋىمەن ەكى ەل كاسىپكەرلەرىنىڭ بيزنەس-فورۋمى ءوتتى. سونىمەن قاتار, وعان «اتامەكەن» قازاقستان ۇلتتىق ەكونوميكالىق پالاتاسىنىڭ توراعاسى ابىلاي مىرزاحمەتوۆ پەن ليتۆا ءوندىرىسشىلەر كونفەدەراتسياسىنىڭ پرەزيدەنتى برونيسلاۆ لوبيس قاتىستى. اتالمىش شارا ليتۆا رەسپۋبليكاسىنىڭ پرەزيدەنتى د.گريباۋسكايتەنىڭ ەلىمىزگە رەسمي ساپارى اياسىندا وتكىزىلدى.
بيزنەس-فورۋمدا ۇكىمەت باسشىسى كارىم ءماسىموۆ ەكونوميكالىق تۇرعىدان الىپ قاراعاندا قازاقستاندا جانە ليتۆادا ءوزارا قولداۋ كورسەتۋ, سونىمەن بىرگە قوس ەلدىڭ بيزنەستەرى اراسىندا ەكەۋارا تولىقتىرىپ وتىرۋ ءۇشىن مۇمكىندىكتەر مولىنان ەكەنىن جەتكىزدى. «ليتۆا ەۋروپالىق وداق مۇشەسى بولىپ تابىلادى. ەلىمىز ءۇشىن اتالعان وداقپەن تىعىز قارىم-قاتىناس ورناتۋ ماڭىزدى. ليتۆا تاراپىنان قازاقستانمەن ىنتىماقتاستىققا بارىنشا قولداۋ كورسەتىلەتىنىنە ءۇمىتىمىز مول. ونىڭ ىشىندە جاقىن ارادا ءبۇكىلالەمدىك ساۋدا ۇيىمىنا ەنۋگە ەۋروپالىق وداق جاعىنان قولداۋ بولارىنا دا ءۇمىتتىمىز», – دەدى ول. سونداي-اق پرەمەر-مينيستر ەلىمىز تاراپى دا ءتيىستى قولداۋ شارالارىن اتقارۋعا دايىن ەكەنىن ايتا كەلە, ەكى مەملەكەتتىڭ كولىك الەۋەتىن پايدالانۋ شەڭبەرىندە ليتۆاعا قازاقستان جاعى كەدەن وداعى بويىنشا قولداۋ كورسەتە الاتىنىن تىلگە تيەك ەتتى.
پرەمەر-مينيستر فورۋمدا سونىمەن قاتار بيۋروكراتيالىق كەدەرگىلەردى ازايتۋدا ليتۆالىق كومپانيالارعا كومەك كورسەتۋدەمىز جانە كورسەتە بەرەمىز, بۇل شارالار ليتۆالىق كومپانيانىڭ قىزمەتى مەن ينۆەستيتسيالارى ەلىمىزدە قوماقتى بولۋى ءۇشىن اتقارىلۋدا دەگەندى دە نازاردان تىس قالدىرمادى. بۇل رەتتە ليتۆا اۋماعىندا دا قازاقستان ينۆەستيتسياسىنا وسى تاقىلەتتەس قارىم-قاتىناس بولاتىنىنا ءۇمىتتى ەكەنىن جەتكىزدى.
فورۋم سان تاقىرىپتاعى بىرنەشە سالانى قامتىدى. «اتامەكەن» قازاقستاننىڭ ۇلتتىق ەكونوميكالىق پالاتاسى مەن ليتۆانىڭ وندىرىسشىلەر كونفەدەراتسياسى قازاقستان-ليتۆا ىسكەرلىك كەڭەسىن قۇرۋ تۋرالى كەلىسىمدى بەكىتسە, ەلىمىزدىڭ كولىك جانە كوممۋنيكاتسيا مينيسترلىگى مەن ليتۆانىڭ كولىك مينيسترلىگى ءوزارا تۇسىنىستىك تۋرالى مەموراندۋمعا قول قويدى.
قازاقستان مەن ليتۆا اراسىنداعى ساۋدا-ەكونوميكالىق بايلانىستار نىعايىپ كەلەدى. ستاتيستيكالىق مالىمەتتەر ەكى ەل اراسىنداعى تاۋار اينالىمى وتكەن جىلى 176,5 ملن. اقش دوللارىنا جەتكەندىگىن كورسەتۋدە. ال بيىلعى جىلدىڭ العاشقى جارتىسىندا عانا بۇل كورسەتكىش 165,3 ملن. دوللارعا جەتكەن. ونىڭ 106,6 ملن.-ى ەكسپورت بولسا, 58,7 ملن.-ى يمپورت بولىپ وتىر. ءسويتىپ وتكەن جىلدىڭ سايكەس مەرزىمىمەن سالىستىرعاندا تاۋار اينالىمى ەكى ەسەگە جاقىن ( 89,0 ملن. دوللار) ارتقان. 2011 جىلدىڭ 1 قىركۇيەگىنە دەيىن رەسپۋبليكامىزدا ليتۆالىق كاپيتالدىڭ قاتىسۋىمەن 160 بىرلەسكەن كاسىپورىن تىركەلسە, ونىڭ 91-ءى بۇگىنگى تاڭدا جۇمىس ىستەۋدە ەكەن. ولار نەگىزىنەن كوتەرمە جانە بولشەك ساۋدا, وڭدەۋشى ونەركاسىپ, بايلانىس جانە اقپارات, كولىك جانە لوگيستيكا سالالارىندا قىزمەتتەر اتقارادى. كولىك ءترانزيتى ىنتىماقتاستىعى قوس ەلدىڭ ءوزارا ءىس-قيمىلىنداعى ماڭىزدى باعىت بولىپ تابىلادى. ليتۆا تاراپى قازاقستاننىڭ كولىك سالاسىنا ينۆەستيتسيا قۇيۋعا, كلايپەدا پورتىنا قازاقستان بيزنەسىنىڭ قايتا ورالۋىنا جانە ەكى ەلدىڭ تەمىر جول قۇرىلىمدارىنىڭ ىنتىماقتاسا تۇسۋىنە مۇددەلىلىك تانىتۋدا. بيزنەس-فورۋمداعى نەگىزگى اڭگىمە دە وسى بايلانىستاردى ءارى قاراي دامىتۋ باعىتىندا ءوربىدى.
ءابدىراحمان قىدىربەك.