ۇكىمەت باسشىسى ولجاس بەكتەنوۆ ءبىر توپ سەنات دەپۋتاتىنىڭ وڭىرلىك دەڭگەيدە ءباسپاسوز ارحيۆتەرىن قۇرۋ ماسەلەسىنە قاتىستى جولداعان ساۋالىنا جاۋاپ بەردى, دەپ جازادى Egemen.kz.
بۇگىندە «قازاقستاننىڭ ۇلتتىق ەلەكتروندىق كىتاپحاناسى» اتتى اقپاراتتىق جۇيە جۇمىس ىستەپ تۇر. بۇل جۇيەدە 80 مىڭنان استام كىتاپ, ديسسەرتاتسيا, گازەت پەن جۋرنالداردىڭ ەلەكتروندىق كوشىرمەلەرى جيناقتالعان.
ولجاس بەكتەنوۆ جاۋابىندا اقپارات سالاسىنداعى پروتسەستەردى اۆتوماتتاندىرۋ مەن جۇيەلەۋ ءۇشىن «بىرىڭعاي مەديا-پلاتفورما» اقپاراتتىق جۇيەسىن قۇرۋ جۇمىستارى ءجۇرىپ جاتقانىن حابارلادى. اتالعان جۇيەنى قۇرۋ ماقساتىندا جاساندى ينتەللەكت جانە تسيفرلىق دامۋ مينيسترلىگى ءتيىستى قىزمەتتەردى اتقارىپ جاتىر.
پلاتفورما ىسكە قوسىلسا گازەتتەر مەن جۋرنالدار ساقتالىپ, وقىرمانداردىڭ باق ماتەريالىنا جىلدام ءارى ىڭعايلى تۇردە قول جەتكىزۋ مۇمكىندىگى ارتپاق.
تسيفرلاندىرۋ – جاڭاشىلدىق ءۇردىسى
«الداعى ۋاقىتتا «بىرىڭعاي مەديا-پلاتفورما» مەن «قازاقستاننىڭ ۇلتتىق ەلەكتروندىق كىتاپحاناسى» اقپاراتتىق جۇيەلەرى ينتەگراتسيالانادى. ەكى جۇيەنى ينتەگراتسيالاۋ بارىسىندا گازەتتەر مەن جۋرنالداردى ەسەپكە الۋ, ولارعا قولجەتىمدىلىكتى قامتاماسىز ەتۋ, ەلەكتروندىق جانە تسيفرلىق فورماتقا كوشىرۋ بويىنشا بىرىڭعاي قاعيدالاردى ازىرلەنىپ, بەكىتىلەدى», دەلىنگەن پرەمەر-مينيستر جاۋابىندا.
ولجاس بەكتەنوۆتىڭ ايتۋىنشا, ەلىمىزدە 5 029 بۇقارالىق اقپارات قۇرالى, سونىڭ ىشىندە 2025 جىلدىڭ قورىتىندىسى بويىنشا ەل اۋماعىندا 515 جاڭا باق تىركەلگەن. ال وبلىستىق, اۋداندىق, قالالىق گازەتتەر كىتاپحانالاردا, ءباسپاسوز باسىلىمداردىڭ قورلارىندا جانە جەكە ارحيۆتەردە ساقتالىپ كەلەدى.
2026 جىل تسيفرلاندىرۋ جانە جي جىلى دەپ جاريالاندى: پرەزيدەنت جارلىققا قول قويدى
«الماتى قالاسىندا 1988 جىلدان باستاپ شىعاتىن «Almaty aqshamy»مەن 1936 جىلدان بەرى جارىق كورەتىن «ۆەچەرني الماتى» گازەتتەرىنىڭ بارلىق سانىنىڭ تىگىندىلەرى «الاتاۋ اقپارات» جشس مەدياحولدينگىندە ساقتاۋلى. ەكى گازەتتىڭ 1970-2021 جىلدارداعى ساندارى تسيفرلاندىرىلدى. تسيفرلاندىرىلعان باسىلىمداردىڭ جالپى كولەمى – «Almaty aqshamy» 3 306 گازەت (56,75 %), «ۆەچەرني الماتى» 8 551 گازەت (65 %). قالعان كەزەڭدەر بويىنشا تسيفرلاندىرۋ جۇمىستارى جالعاسىپ جاتىر. اباي وبلىسىندا 1943-2025 جىلدار ارالىعىندا جارىق كورگەن 16 گازەتتىڭ 18 323 داناسى ساقتاۋلى تۇر. الماتى وبلىسىندا 16 گازەت, 4 جۋرنال جۇمىس ىستەيدى, جيناقتالعان تىگىندىلەردى تسيفرلاندىرۋ جۇمىسى قولعا الىندى. اقتوبە وبلىسىندا «اقتوبە مەديا» جشس قاراستى وبلىستىق قوعامدىق-ساياسي «اقتوبە» گازەتى 1924 جىلدان, «اكتيۋبينسكي ۆەستنيك» گازەتى 1918 جىلدان باستاپ شىعىپ كەلەدى. وسى گازەتتەردىڭ ەلەكتروندىق (PDF) فورماتتاعى دانالارى وزدەرىنىڭ ارحيۆ قورىندا ساقتاۋلى تۇر. سونداي-اق,12 اۋداندىق گازەت جۇمىس ىستەيدى, ولار قازىرگى تاڭدا جەكەشەلەندىرىلىپ, اپتاسىنا 1 رەت شىعادى. بۇل اۋداندىق گازەتتەردىڭ قورلارى مەملەكەتتىك كىتاپحانالارعا تاپسىرىلعان», دەلىنگەن ۇكىمەت باسشىسىنىڭ جاۋابىندا.
رەفەرەندۋم الەمدىك باق نازارىندا
باسىلىمداردى ساقتاۋ جانە تسيفرلاندىرۋ ءىسى بارلىق وڭىردە جولعا قويىلعان. ماسەلەن, اقمولا وبلىسىندا 40 گازەت شىعادى. سونداي-اق 1941-2025 جىلداردا جارىق كورگەن 120 466 دانا گازەت ساقتالعان. ال اتىراۋ وبلىسىندا قالالىق كىتاپحاناعا 1921-1922, 1930-2021 جىلداردى قامتيتىن گازەتتەر ساقتاۋعا الىنعان. ونىڭ 9 983 بەتى تسيفرلى فورماتقا كوشىرىلگەن. 1974-2025 جىلدارداعى گازەتتەردىڭ تىگىندىلەرى فوتوسۋرەت نۇسقاسىندا جانە ەلەكتروندىق فورماتتا رەداكتسيادا ساقتالىپ تۇر. قىزىلوردا وبلىسىندا گازەتتەردى ساقتاۋ جانە تسيفرلى فورماتقا كوشىرۋ جۇمىستارى ءجۇرىپ جاتىر. تسيفرلانعان گازەتتەر ەلەكتروندى قورعا ەنگىزىلگەن. پرەمەر-مينيستر جاۋابىندا وزگە ايماقتاعى باسىلىم قورلارى دا جەكە ارحيۆ جانە كىتاپحانادا ساقتاۋلى ەكەنىنە نازار اۋدارعان.
وسى باعىتتاعى ماڭىزدى جۇمىستى بىرىزدەندىرۋ ماقساتىندا «بىرىڭعاي مەديا-پلاتفورما» جانە «قازاقستاننىڭ ۇلتتىق ەلەكتروندىق كىتاپحاناسى» اقپاراتتىق جۇيەلەرى بىرلەسىپ جۇمىس اتقارادى.