«نۇر وتان» حدپ وبلىستىق فيليالى ءوڭىردىڭ ەكونوميكالىق-الەۋمەتتىك دامۋىنا ىقپال ەتەتىن ماڭىزدى نىساندارداعى جۇمىستاردىڭ مەرزىمىندە ساپالى اتقارىلۋىن قاداعالاۋدى جولعا قويدى. سوندىقتان دا ءىرى يننوۆاتسيالىق جوبالاردىڭ جۇزەگە اسىرىلۋى, تىڭ باستامالاردىڭ ومىرگە ەنگىزىلۋى پارتيا نازارىنان تىس قالعان ەمەس. بۇل ەكونوميكالىق ىلگەرىلەۋگە ءىز اشىپ قانا قويماي, ۇقىپتىلىق پەن ۇنەمشىلدىكتىڭ, ءتارتىپ پەن رەتتىلىكتىڭ قالىپتاسۋىنا, جۇمىس قارقىنىن ارتتىرۋعا ىقپال ەتۋدە. قازىردىڭ وزىندە كوپتەگەن قۇرىلىس نىساندارىندا, حالىققا قىزمەت كورسەتۋ ورىندارىندا, دەنساۋلىق ساقتاۋ مەكەمەلەرىندە پارتيالىق باقىلاۋ بەكەتتەرى جۇمىس ىستەيدى.
قالانىڭ لاچۋگينا كوشەسى, 5 جانە ابىلقايىر حان داڭعىلى, 6 تۇرعىن ۇيلەرىندەگى تەرموجاڭعىرتۋ جۇمىستارىنىڭ قانشالىقتى ساپالى اتقارىلىپ جاتقانىن كوزبەن كورۋگە كەلگەن «نۇر وتان» حدپ وبلىستىق فيليالى پارتيالىق باقىلاۋ كوميسسيانىڭ ءتوراعاسى عالىمجان نۇرىشەۆ باستاعان بەكەت مۇشەلەرى تياناقتى جۇمىس ناتيجەسىنە ءتانتى بولدى. ەكى تۇرعىن ءۇيدىڭ كۇردەلى جاڭعىرتۋ جۇمىستارىن تيىسىنشە «ينتەرستيل» جشس مەن «كونتاكت» قۇرىلىس كومپانياسى ءجۇرگىزۋدە ەكەن. ەكى قۇرىلىس مەكەمەسىندە دە پارتيالىق باقىلاۋ بەكەتتەرى قۇرىلعان. ابىلقايىر حان داڭعىلى, 6 ءۇيدىڭ تۇرعىنى ۆاسيلي گۋرەۆپەن تىلدەسكەنىمىزدە مەملەكەتتىك باعدارلاماعا ريزاشىلىعىن ءبىلدىردى.
– سالىنعانىنا 40 جىلدان اسقان بۇل ءۇيدى ءوز كۇشىمىزبەن ەشقاشان دا كۇردەلى جوندەي الماس ەدىك.ءۇيىمىزدىڭ پودەزدەرى مەن جەرتولەسى جوندەلدى, ەلەكتر قوندىرعىلارى, قۇبىرلار جاڭارتىلدى. راسىندا دا قۋانىشىمىزدا شەك جوق, – دەيدى ول.
«تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋ جانە دامىتۋدىڭ قازاقستاندىق ورتالىعى» اق اقتوبە فيليالىنىڭ ديرەكتورى مەڭدىباي ماقتاەۆتىڭ ايتۋىنشا, وبلىس ورتالىعىندا سەگىز ۇيگە وسىنداي جاڭعىرتۋ جۇرگىزىلۋدە. ونىڭ التاۋىنا اۆتوماتتى جىلۋ رەتتەگىش قوندىرعى ورناتىلعان. وسى تۇرعىن ۇيلەردەگى جاڭعىرتۋ جۇمىستارىنا 276 131 030 تەڭگە قارالعان, سونىڭ 120 ميلليون تەڭگەسى رەسپۋبليكالىق بيۋدجەتتەن بولىنگەن. ال, باعدارلامانىڭ ەكىنشى تەتىگى بويىنشا 45 كوپ قاباتتى تۇرعىن ۇيگە پاتەر يەلەرىنىڭ قالاۋى بويىنشا تاڭدالعان كۇردەلى جوندەۋ جۇمىستارى اتقارىلۋدا. بۇل جۇمىستاردى اتقارۋ ءۇشىن «تابىس اقتوبە» جشس-ىنە 343 750 000 تەڭگە بولىنگەن.
ساتىبالدى ءساۋىرباي, اقتوبە وبلىسى.