ەل مەن ەلدى جاقىنداستىرىپ, ادامداردىڭ ءوزارا تۇسىنىستىگىن ارتتىرۋعا سەپتىگىن تيگىزەتىن يگى نارسە بۇل دۇنيەدە از ەمەس قوي. مىسالى, ماسكەۋدىڭ كەلەسى جىلى پايدالانۋعا بەرىلەتىن ءبىر مەتروستانساسىن قازاقستان ەلشىلىگىنىڭ باستاماسىمەن «الماتى» دەپ اتاۋعا قول جەتكىزىلگەندىگى تۋرالى جاقسى حابار جاريا بولعاننان بەرى وسى ماڭايداعى براتەەۆو اۋدانىندا تۇراتىن ءماسكەۋلىكتەردىڭ ەلىمىزگە دەگەن ىقىلاسى بۇرىنعىدان دا ارتىپ, قازاقستاندىقتاردى جاقىن تارتىپ, ءوزارا تىعىزىراق قارىم-قاتىناس جاساۋعا بەت بۇرعاندىق بايقالادى.
براتەەۆو – ماسكەۋ قالاسىنىڭ قۇرامىنا 60-جىلدارى كىرگەن شاعىن سەلونىڭ اتى. اۋەلى مۋنيتسيپالدى وكرۋگ بولعان, كەيىن اۋدانعا اينالعان. ال براتەەۆو اتاۋىنىڭ قايدان شىققاندىعى ءجونىندەگى اڭىزعا بويلاپ كورسەڭىز, ءبارى دە ادامي تۋىسقاندىقتان (اعايىندى ەكى جىگىت, براتەي ەسىمدى ادام, بەلگىلى تۇلعانىڭ ءىنىسىنىڭ اتى) تارايتىنىن بايقايسىز. سوعان قاراعاندا, بولاشاق «الماتى» مەترو ستانساسىنىڭ تۋىسقاندىقپەن بايلانىستى جەردە پايدا بولۋىن جاراتىلىستىڭ ءوزى الدىن الا زاڭداستىرعان سياقتى...
ەلشىلىكتىڭ باستاماسىمەن ءجۇزەگە اسىرىلعان جاڭاشا بايلانىس وسى اۋدانداعى №975 مەكتەپ – ءبىلىم ورتالىعىنىڭ ۇستىمىزدەگى جىلدى قازاقستانمەن تانىسۋ جىلى دەپ جاريالاۋىنان سەرپىن الدى. ءبىلىم ۇياسىنداعى سالتاناتتى لينەيكاعا قاتىسقان ەلشى زاۋىتبەك تۇرىسبەكوۆ ۇستازدار قاۋىمى مەن وقۋشىلارعا قازاقستان تاريحى, ەلىمىزدەگى الەۋمەتتىك-ەكونوميكالىق وزگەرىستەر, قازىرگى زامانعى ءبىلىم بەرۋ جۇيەسى تۋرالى, ۇلتتىق ءمادەنيەت پەن حالىقتىق ءداستۇر-سالت, ادەت-عۇرىپتار جونىندە, سونداي-اق ەكى ەل اراسىنداعى قارىم-قاتىناستاردىڭ دامۋ بولاشاعى جايىندا كەڭىنەن اڭگىمەلەدى. مەكتەپ ديرەكتورى الەكساندر پيمەنوۆتىڭ پىكىرىنشە, مۇنداي ىنتىماقتاستىق مەكتەپ ءۇشىن دە, مەكتەپ وقۋشىلارى ءۇشىن دە وتە پايدالى. قازاقستانمەن تانىسۋ جىلى مەكتەپ ۇجىمىنا ەجەلگى كورشى – تاۋەلسىز قازاقستان مەملەكەتى تۋرالى كوپتەگەن جاڭا دا تىڭ ماعلۇماتتار الۋعا جول اشادى, ارالاس-قۇرالاستىقتى ارتتىرادى, جەتكىنشەك ۇرپاقتىڭ جان-جاقتى جەتىلۋىنە جاردەمدەسەدى, دەيدى ول.
سونداي-اق تاياۋدا ەلشىلىك جەرگىلىكتى اكىمشىلىكپەن بىرلەسىپ براتەەۆو اۋدانى تۇرعىندارىنىڭ قاتىسۋىمەن اتاقتى 8-ءشى گۆارديالىق ديۆيزيانىڭ ماسكەۋ ءۇشىن شايقاستاعى ۇلى ەرلىگىنە 70 جىل تولۋىنا ارنالعان ءىس-شارا وتكىزدى. جۇرتشىلىق الدىندا ءسوز سويلەگەن ەلشى ز.تۇرىسبەكوۆ, براتەەۆو اۋدانىنىڭ باسشى قىزمەتكەرلەرى, باسقا دا رەسەيلىك ازاماتتار بۇگىنگى تاڭداعى قازاقستان-رەسەي بايلانىستارىنا, ۇلى جەڭىسكە قول جەتكىزگەن دوستىق پەن تۋىسقاندىق جايىنا, 8-ءشى گۆارديالىق ديۆيزيا جاۋىنگەرلەرىنىڭ تاريحي ەرلىگىنە ايرىقشا توقتالدى. الماتى كوشەسىنە تاياۋ جەردەگى ءۇلكەن ساياباقتىڭ اشىق الاڭىندا اتالعان ءىس-شارا شەڭبەرىندە ۇيىمداستىرىلعان مەرەكەلىك كونتسەرتتە العاش رەت الماتىدا تۇساۋى كەسىلگەن اتاقتى «ا-ستۋديو» توبىنىڭ ونەرپازدارى كوپشىلىك قۇرمەتىنە بولەندى.
بولاشاق «الماتى» مەتروستانساسى ءوز اتاۋىمەن ءبۇكىل قازاقستاندى بەينەلەيتىنىن ەسكەرسەك, ەندى كوپ ۇزاماي ءوزارا بايلانىستارىمىزدىڭ ءورىسى بۇرىنعىدان دا كەڭەيىپ, تۋىسقاندىقتىڭ تاعى ءبىر ءتوركىنى ماسكەۋدىڭ براتەەۆو اۋدانى بولاتىندىعىنا قازىردەن-اق كوز جەتكىزۋگە بولادى.
سەرىكقالي بايمەنشە. ماسكەۋ.