ەلىمىزدىڭ اتىنان بارعان قاللەكي تەاترى «شيە» كومەدياسىن ك.تينچۋرين اتىنداعى تاتار مەملەكەتتىك دراما جانە كومەديا تەاترىندا ماۋسىمنىڭ 6-سى كۇنى ساحنالادى. «شيەگە» ماماندار قانداي باعا بەردى دەگەنگە كەلسەك, رەسەيلىك سىنشى اندرەي پرونين: «شيە» سپەكتاكلىنىڭ رەجيسسەرى − سەرگەي پوتاپوۆ. ونىڭ اتى-ءجونى بۇگىندە برەندكە اينالعان. سپەكتاكلدە ءبىزدى استانالىق تەاتر ترۋپپاسىنىڭ كاسىبيلىگى قۋانتتى. رەجيسسەردىڭ شەشىمدەرى ساۋاتتى, جارقىن, تالانتتى تۇردە ورىندالدى. رانەۆسكايا سەكىلدى باستى كەيىپكەردىڭ جاستىعى, ادەمىلىگى, تارتىمدىلىعى عالامات. اسىرەسە, باس كەيىپكەردىڭ فينالداعى ويىنى جاقسى اسەر قالدىردى. اكتريسا كارى ايەلدىڭ وبرازىندا شىعىپ, وزىندىك كونتراست جاساي الدى, – دەگەندى ايتسا, س.امۋتباەۆ اتىنداعى تاتار دراما تەاترىنىڭ رەجيسسەرى دامير سامەرحانوۆ كومەديا ارقىلى تۇركى مادەنيەتى مەن ورىس مادەنيەتىنىڭ بايلانىسىن كورگەنىن ايتادى. «بۇل مادەنيەتتەردىڭ ەرەكشەلىگى – دوستاسىپ تا, كەيدە قاقتىعىسىپ تا پاراللەل ءومىر سۇرە بەرەدى», دەيدى ول.
سپەكتاكلدىڭ رەجيسسەرى – ياكۋتيادان ارنايى شاقىرتىلعان تانىمال تەاتر جانە كينو رەجيسسەرى, ياكۋتيانىڭ ەڭبەك سىڭىرگەن ونەر قايراتكەرى, رەسەيدىڭ ۇلتتىق تەاترلارىنىڭ اراسىندا وتەتىن «التىن ماسكا» سىيلىعىنىڭ يەگەرى سەرگەي پوتاپوۆ. سپەكتاكلدىڭ باس سۋرەتشىسى – بەرىك بۋرباەۆ. كيىم ۇلگىسىنىڭ سۋرەتشىسى – قازاقستاننىڭ ەڭبەك سىڭىرگەن قايراتكەرى, ديزاينەر, ەتنولوگ – حانۋم ايداش.
رەجيسسەردىڭ شەشىمى بويىنشا ل.رانەۆسكايا بەينەسىن شيە ەسىمىمەن تەاتردىڭ جاس اكتريساسى, «زولوتوي ۆيتياز 2015» حالىقارالىق تەاتر فەستيۆالىنىڭ التىن ديپلوم يەگەرى اقمارال تاناباەۆا سومدايدى. سونداي-اق, سپەكتاكلدە بۇگىندە كورەرمەننىڭ ىستىق ىقىلاسىنا بولەنىپ جۇرگەن تەاتر ارتىستەرى ك.نۇرلانوۆ, ق.قىستىقباەۆ, ن.وتەۋىلوۆ, س.قاشقاباەۆ, ا.ايماعامبەت, د.ءالىموۆ, ش.ورداباەۆ, ا.ىبراەۆا, ا.سەركەباەۆا, ج.ىسقاقوۆا ونەر كورسەتەدى.
ايگۇل سەيىلوۆا, «ەگەمەن قازاقستان»