ەكسپو-2017-ءنىڭ كوميسسارى ءراپىل جوشىباەۆتىڭ الجير حالىقتىق-دەموكراتيالىق رەسپۋبليكاسىنا (احدر) ساپارى بولىپ ءوتتى, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
ساپار شەڭبەرىندە احدر-ءدىڭ مەملەكەتتىك ءمينيسترى – سىرتقى ىستەر جانە حالىقارالىق ىنتىماقتاستىق ءمينيسترى رامتان لامامرامەن, احدر ەكسپو-2017-گە ءالجيردىڭ قاتىسۋى ءۇشىن جاۋاپتى ۇلتتىق سەكتسياسىنىڭ كوميسسارى – احدر پرەمەر-ءمينيسترى ىستەرىندەگى سەنىمدى وكىل مۇستافا شاكيب حاليفپەن كەزدەسۋلەر بولدى.
الجير سىرتقى ساياسات ۆەدومستۆوسىنىڭ باسشىسىمەن كەزدەسۋى كەزىندە ر.جوشىباەۆ ەكىجاقتى ىنتىماقتاستىق ماسەلەلەرىن تالقىلادى. حالىقارالىق كۇن تارتىبىندەگى كوكەيكەستى ماسەلەلەر بويىنشا پىكىر الماسىلدى.
ر.لامامرا استاناداعى ەكسپو-نىڭ جاڭا تەحنولوگيالار اعىنى مەن قازاقستاننىڭ حالىقارالىق ارەناداعى ءيميدجىن جوعارىلاتۋعا وڭ اسەر ەتەتىنىن اتاپ ءوتتى. الجيرلىك مينيستر, سونداي-اق, ەكسپو-2017 اياسىندا يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتىن وتكىزۋ يىۇ-عا مۇشە ەلدەردىڭ ورنىقتى دامۋ مەن قۋات تيىمدىلىگى سالالارىنداعى ىنتىماقتاستىعىنا سەرپىن بەرەتىنىنە سەنىم ءبىلدىردى.
الجيرلىك كوميسسارمەن كەزدەسۋ كەزىندە ر.جوشىباەۆ كورمەنى ۇيىمداستىرۋ بويىنشا اتقارىلىپ جاتقان جۇمىستارعا جان-جاقتى توقتالا كەلىپ, ءالجيردىڭ ءتۇرلى حالىقارالىق كورمەگە قاتىسۋدان ايتارلىقتاي تاجىريبە جيناقتاعانىن, بۇعان 2010 جىلى شانحايدا, 2015 جىلى ميلاندا وتكەن ەكسپو كورمەلەرىندە ەلدىڭ تاقىرىپتى جان-جاقتى اشىپ كورسەتە العانى ءۇشىن «التىن مەدالدار» يەلەنگەنىن اتاپ ءوتتى.
ءوز كەزەگىندە م.حاليف الداعى جىلدىڭ 4 شىلدەسىندە الجير ەكسپو-2017 اياسىندا وزدەرىنىڭ ۇلتتىق كۇندەرىن وتكىزۋدى جوسپارلاپ وتىرعانىن جەتكىزدى. الجيرلىك كوميسسار قازاقستان تاراپى ۇسىنىپ وتىرعان «بولاشاقتىڭ ەنەرگياسى» تاقىرىبى جاھاندىق ەكولوگيالىق پروبلەمالار مەن قۋات جەتىسپەۋشىلىگىن شەشۋگە كومەكتەسەتىنىن, ال ەكسپو-2017 بۇكىل الەم ەلدەرى ءۇشىن, ونىڭ ءىشىندە افريكا مەملەكەتتەرى دە بار, ەنەرگەتيكا سالاسىندا وزدەرىنىڭ جەتىستىكتەرى مەن جاڭا تەحنولوگيالارىن كورسەتۋدىڭ پلاتفورماسىنا اينالاتىنىن اتاپ كورسەتتى.
كەزدەسۋ قورىتىندىسى بويىنشا, ر.جوشىباەۆ پەن م.حاليف الجير تاراپىنىڭ ەكسپو-2017 حالىقارالىق مامانداندىرىلعان كورمەسىنە قاتىساتىنى تۋرالى كەلىسىمگە قول قويدى.