وبلىس ورتالىعىنداعى «دوستىق» كونتسەرت زالىندا وبلىستىق قازاقستان حالقى اسسامبلەياسى مەن «نۇر وتان» پارتياسى فيليالىنىڭ جانە تىلدەردى دامىتۋ باسقارماسىنىڭ ۇيىمداستىرۋىمەن مەملەكەتتىك تىلدە ءان سالاتىن ەتنومادەني بىرلەستىكتەر جاستارىنىڭ فەستيۆالى بولىپ ءوتتى. فەستيۆل ەل تاۋەلسىزدىگىنىڭ 25 جىلدىعىنا ارنالدى.
فەستيۆالدىڭ ماقساتى–وزىمىزدىڭ جاستاردى دا, وزگە جاستاردى دا وتانسۇيگىشتىككە تاربيەلەۋ, ازاماتتىق جاۋاپكەرشىلىكتى نىعايتىپ, مەملەكەتتىك ءتىل – قازاق ءتىلىنىڭ قولدانىس اياسىن كەڭەيتۋ, ناسيحاتتاۋ. ەل تاۋەلسىزدىگىنىڭ 25 جىلدىعىنا ارنالعان بۇل كونتسەرتكە 17 ەتنومادەني بىرلەستىكتىڭ جاستارى قاتىسىپ, ورىنداۋشىلىق شەبەرلىكتەرى مەن حورەوگرافيالىق, ارتىستىك قابىلەتتەرىن كورسەتتى. جاستار قازاقتىڭ حالىق اندەرىن, وسى كۇنگى جاڭا اۋەندەردى شىرقادى.
كونتسەرت زالىندا وتىرعان كورەرمەن وزگە ۇلت وكىلدەرىنىڭ تۋعان ەل, جەر, وتان, قازاق دالاسى جايلى پاتريوتتىق اندەرىن تىڭداپ, قۋانا قۋاتتاپ, كوڭىل سەرگىتتى. اسىرەسە, «كىمپيتسوري» كورەي جاستارىنان قۇرالعان ۆوكالدىق توپ, فينن-ۋگور جاستارى باتىرحان شۇكەنوۆ ورىندايتىن «وتان انا», ازەربايجان جاستارىنىڭ «ءدانىز» ۆوكالدىق ءانسامبلى, «قازاعىم-اي», ارميانداردىڭ «ەرەبۋني توبى «تۋعان جەر – تاعدىرىم», بەلورۋستاردىڭ «نادزەيا» توبى «تاۋەلسىز ەل», بولگارلاردىڭ «لازاركي» انشىلەرى مارجان اراپباەۆانىڭ رەپەرتۋارىنداعى «قازاق ەلى وسىنداي», گرەكتەردىڭ «قاردەس» توبى «ميلليونى ناس – قازاقستانىم تەك العا», ەۆرەيلەردىڭ «اناحنۋ» توبى «تەك العا», كاراچاي-چەركەس پەن كاباردين-بالقاردىڭ «تەبەردا توبى «قازاعىمسىڭ», نەمىستەردىڭ «WIR» حالىق ءانسامبلى «قازاعىم- اي», سلاۆيانداردىڭ «ياريلو» توبى «گ ۇلىستان قازاقستان», تاتار-باشقۇرتتاردىڭ «ميراس» توبى «قورقىت», وزبەك جاستارى «دۋستليك كايوت», «تۋعان جەر», «قوڭىر» توبى رەپەرتۋارىنان اندەر, ۋكراينداردىڭ «كالىنوۆو نامىستا» توبى «تۋعان ەلىم», چەشەن-ينگۋشتاردىڭ «يللي» ۆوكالدىق توبى «قازاقستان» اتتى بەلگىلى قازاق انشىلەرى مەن ەسترادالىق توپتار ورىندايتىن پاتريوتتىق اندەردى ورىندادى.
بۇل كۇندەرى دوستىق ۇيىندە 23 وبلىستىق ەتنومادەني بىرلەستىك, وبلىستىق اسسامبلەياسىنىڭ جاستار بىرلەستىگى, ۇلتتىق وركەندەۋ مەكتەبى, «انا ءتىلى» تىلدەردى دامىتۋدىڭ وقىتۋ-ادىستەمەلىك ورتالىعى, «قازاق ءتىلى» قوعامى ورنالاسقان. سونىمەن قاتار, 20 ەتنوستىڭ مادەنيەتىن دارىپتەيتىن 42 شىعارماشىلىق ۇجىم جۇمىس ىستەيدى. اۋدانداردا اسسامبلەيانىڭ 13 فيليالى, اۋىلداردى قوسقاندا 83 ەتنومادەني بىرلەستىك جۇمىس ءىستەۋدە. ال ورتالىق اسسامبلەيادا ءبىزدىڭ وبلىستان قىزمەت جاسايتىن 18 ەتنومادەني بىرلەستىك وكىلدەرى بار.
سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەت جانىندا اسسامبلەيا كافەدراسى, جەرگىلىكتى فيليالدا ەتنولينگۆيستيكالىق مەكتەپ اشىلدى. قازىر بۇل مەكتەپتە وزگە ۇلت وكىلدەرىنىڭ ۇل-قىزدارى ءبىلىم الاتىن, ءوز انا تىلدەرىن ۇيرەنەتىن 16 ۇلتتىق وقۋ ءبولىمى بار, جىل سايىن 500-دەن استام وقۋشى ءبىلىم الادى. سونىمەن بىرگە, ەلينا پاۋلي باسقاراتىن «جاستار بىرلەستىگىنىڭ ۇيلەستىرۋ كەڭەسى» تىركەلگەن. كەڭەستىڭ باستى مىندەتى, اتى ايتىپ تۇرعانداي, وزگە ۇلت وكىلدەرىنەن قۇرالعان جاستار بىرلەستىكتەرىمەن جۇمىس جاساۋ. بىرلەستىكتەر ءوز انا تىلدەرىمەن قاتار, قازاق ءتىلىن ۇيرەنىپ, قازاقستاندىق وتانسۇيگىشتىك قاسيەتتى نىعايتۋعا ۇلەس قوسۋدا. وزگە ۇلت وكىلدەرى بىرلىك, دوستىق ماقسات-مۇددەسى ءۇشىن بىرگە جينالىپ, توپتاسۋدا. بۇل – اسسامبلەيا قۇرىلعالى وتكەن اراداعى 20 جىلدىڭ جەمىسى, جەڭىسى.
«بۇل فەستيۆالعا قاتىسقانىما قۋانىشتىمىن. كورەرمەن ءبىزدىڭ ونەرىمىزدى جىلى قابىلدادى. مۇنداي كونتسەرتتەر ءجيى بولسا عوي. بارلىق قازاقستاندىقتاردى كەلە جاتقان تاۋەلسىزدىك مەرەكەسىمەن قۇتتىقتايمىن», – دەدى «مەركاز» وبلىستىق ەۆرەيلەر ورتالىعىنىڭ مۇشەسى دميتري نازارەنكو.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن
ماقسات ايتباي