وبلىس ورتالىعىنداعى كوركەمسۋرەت مۋزەيىندە سۋرەتشىلەر وداعىنىڭ مۇشەسى, س.تورايعىروۆ اتىنداعى مەملەكەتتىك ۋنيۆەرسيتەتتىڭ «ارحيتەكتۋرا جانە ديزاين» كافەدراسىنىڭ وقىتۋشىسى مايسا ىقىلاستىڭ تاۋەلسىزدىكتىڭ 25 جىلدىعىنا ارنالعان كورمەسى وتۋدە.
سۋرەتشىنىڭ «مەنىڭ قازاقستانىم» اتتى پەيزاجدار سەرياسى ەڭسەلى ەلدىكتى, ەگەمەندىكتى, ۇلتتىق داستۇرگە قانىق كورىنىستەردى شەبەر بەينەلەيدى. قىلقالام شەبەرىنىڭ الۋان ءتۇرلى تاقىرىپتاعى, ءارتۇرلى جانرداعى قولتاڭباسى كىم-كىمدى دە بەيجاي قالدىرمايدى. كورمەگە كەلۋشىلەر مايسانىڭ كيىزدەن جاساعان تۋىندىلارىن دا كورە الادى. قازاقتىڭ ءتول ونەرى – كيىز باسۋ ادىسىمەن جاسالىنعان «ناۋرىزشا», «تورايعىر كولى», «كۇن شۋاعىنا شومىلعان كۇز» اتتى كوپتەگەن شىعارمالارى بار. سۋرەتشى كيىزبەن «سۋرەت سالۋدى» كىشكەنتاي كۇنىندە اجەسىنەن ۇيرەنگەنىن ايتادى. بالا كەزىنەن ساناسىنا ۇيالاعان سۋرەتتەردى قىلقالام شەبەرى سوڭعى كەزدە ونەر تۋىندىسىنا اينالدىرىپ, جۇرتشىلىقتىڭ ىستىق ىقىلاسىنا بولەنىپ ءجۇر. ءاربىر ويۋ-ورنەك ءبىر-ءبىرىن تولىقتىرا ءتۇسىپ, تۇتاس ءبىر كومپوزيتسيانى قۇرايدى. سۋرەتتەردەگى ءداستۇرلى بوياۋلار ورنىنا بەدەرلەنگەن, ءتۇرلى تۇسكە بويالعان قوي ءجۇنى ەرەكشە كوركەم كورىنەدى. ءتىپتى, بويالعان ءجۇننىڭ ءوزى سۋرەتشىنىڭ نە جاساماق ويىن ۇققانداي ءبىر-بىرىمەن قابىسىپ, وزىنەن ءوزى سۋرەتكە اينالعانداي ەرەكشە اسەرلى.
ۇلتتىق ءداستۇردى ونەر ارقىلى ورىستەتۋگە وراي, سۋرەتشى مايسا ىقىلاستىڭ ءوز بايلامى بار.
– ۋاقىت جىلدام, بىراق, ۇلى ءداستۇر جالعاسىن تابادى. مۇقاعالي جازعانداي, ءۇش باقىت – حالقىمىز, ءتىلىمىز, وتانىمىز بار. ەندەشە, وسى ۇشەۋى تۇرعاندا, ۇلتتىڭ ۇلى ءداستۇرى دە ماڭگىلىك. ماڭگىلىك دەمەكشى, قازىر «ماڭگىلىك ەل» تاقىرىبى مەنى قاتتى تولعانتىپ ءجۇر, ازىرگە اتالعان ىرگەلى تاقىرىپقا ويشا دايىندالىپ ءجۇرمىن, – دەيدى سۋرەتشى.
فاريدا بىقاي,
«ەگەمەن قازاقستان»
پاۆلودار