Atameken Businees Channel تەلەارناسىنىڭ تىكەلەي ەفيردەگى باعدارلاماسىنا قاتىسقان قر اقپارات جانە كوممۋنيكاتسيالار ءمينيسترى داۋرەن اباەۆ اقپارات تۋرالى جاڭا زاڭعا قاجەتتى ۇعىمدار تۋرالى ءسوز قوزعادى. قازاقستانداعى ينتەرنەت-جۋرناليستيكانىڭ دامۋ مۇمكىندىكتەرى تۋرالى سوزىندە مينيستر بلوگەرلەر قىزمەتىن زاڭدىق تۇرعىدا رەتتەۋ تۋرالى دا ايتىپ ءوتتى.
"قازاقستاندا باسقا ەلدەردەگى سەكىلدى قىزمەت بولۋى ءۇشىن بىزدە دە تۇسىنىك اپپاراتى بولعانى ءجون. وكىنىشكە وراي, 1999 جىلى قابىلانعان باق تۋرالى زاڭدا ول قاراستىرىلماعان. ءبىز ولارعا ءبىر قىزمەت ۇسىنىپ نەمەسە بلوگەرلەرمەن كەرى بايلانىس ورناتۋ ءۇشىن ولار رەسمي تىركەلۋى تيىس. بىراق بۇل ءار ادامنىڭ ءوز ەركىندە. ياعني, ەشكىمدى كۇشتەمەيمىز, ەشكىمدى مىندەتتەمەيمىز. ياعني, كەيبىر مەملەكەتتەردە ساعان تىركەلگەن ادامداردىڭ بەلگىلى ءبىر سانى "بلوگەر" اتانۋعا مۇمكىندىك بەرەدى. بىزدە ونداي تۇسىنىك جوق. ولارعا سالىق تولە دەپ تە ەشكىم ايتا المايدى. كەرىسىنشە, بۇل جاعداي ولارمەن قۇقىقتىق قاتىناس ورناتۋعا سەپتىگىن تيگىزۋى كەرەك. ياعني, سوندا عانا ءبىز ولارعا تاپسىرىس بەرىپ, ەڭبەكتەرىنە اقى تولەيتىن بولامىز", دەدى مينيستر.
سونىمەن قاتار مەملەكەتتىك بيۋدجەتتى ءبولۋ كەزىندە ينتەرنەتتە مەلەكەتتىك تاپسىرىس ورىنداۋ ءالى قاراستىرىلماعانىن ايتتى.
"بۇل وتە كۇردەلى ماسەلە. ءبىز ءالى ونى قاراستىرىپ جاتقان جوقپىز. ارينە, بۇل مۇمكىن. بىراق ول زاڭدا دا ايتىلۋى ءتيىس", دەپ اتاپ ءوتتى داۋرەن اباەۆ.