قازاقستاندىق بوكسشى گەننادي گولوۆكيننىڭ پروموۋتەرى توم ليوففلەر ESPN-گە بەرگەن سۇحباتىندا امەريكاندىق دەنيەل دجەيكوب كومانداسىمەن اراداعى كەلىسسوز جايىندا ايتتى, دەپ حابارلايدى قازاقپارات Sports.kz-كە سىلتەمە جاساپ.
بۇدان بۇرىن بۇكىلالەمدىك بوكس قاۋىمداستىعى (WBA) پروموۋتەرلەرگە ەكى جاق قول قويعان كەلىسىمشارتتى 7 كۇننىڭ ىشىندە ۇسىنۋلارىن تالاپ ەتكەن بولاتىن. ونداي بولماعان جاعدايدا ايقاس پروموۋتەرلىك ساۋدا-ساتتىققا قويىلماق.
"ادەتتە ولار 10 كۇن بەرەتىن - بۇل ستاندارت, بىراق مەرزىمنىڭ ۇزارتىلۋى بوكسشىنىڭ جەكە كەستەسىنە سايكەس 12 نەمەسە 14 كۇن بولۋى دا مۇمكىن. مەنىڭ ويىمشا, مامىلە جاسالاتىن شىعار. ويتكەنى ءار سويلەسكەن سايىن ەل حەيمون ماعان دجەيكوبستىڭ ايقاسقىسى كەلەتىندىگىن ايتتى, ەندى تەك كەيبىر ماسەلەلەر عانا قالدى, ونىمەن جۇمىس ىستەپ جاتىرمىز",-دەدى ليوففلەر.
گولوۆكين - دجەيكوبس ايقاسى 10 جەلتوقساندا ءوتۋى ءتيىس ەدى, بىراق تابىستى ءبولۋ جاعىن پروموۋتەرلەر رەتتەي الماعاندىقتان جەكپە-جەك شامامەن ناۋرىزعا اۋىستىرىلدى.
ەسكە سالا كەتسەك, ءتارتىپ بويىنشا گونورار WBA تيتۋلىنىڭ يەگەرى گولوۆكيننىڭ پايداسىندا 75 تە 25 پايىز بولۋى ءتيىس. بىراق حەيمون مۇنى 60/40-قا وزگەرتۋدى سۇرادى. WBA ولاردىڭ اپەللياتسياسىن قابىلداعان جوق.