قاراتال اۋدانىنداعى «تاستوبە اگروفۋد» جشس كەشەنى - تاۋەلسىزدىكتىڭ 25 جىلدىعىنا ارناپ اشىلعان ماڭىزدى نىسانداردىڭ ءبىرى. سالتاناتتى اشىلۋ راسىمىنە كاسىپكەر, وليمپيادا چەمپيونى جاقسىلىق ۇشكەمپىروۆ, وبلىس اكىمىنىڭ ورىنباسارى سەرىكجان بەسكەمپىروۆ, اۋدان اكىمى قايرات بيسەمباەۆ ارنايى قاتىستى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
نىسان يەسى ءسابيت احمەتوۆتىڭ ايتۋىنشا, 2015 جىلى 90 باس ءىرى قارا اكەلسە, بيىلعى جىلى تاعى 120 باس ساتىپ العان. ەندى مال باسىن 1 500-گە جەتكىزۋدى جوسپارلاپ وتىر. ءىرى قارانىڭ بارلىعى دا سيممەنتال تۇقىمى. كاسىپكەردىڭ سوزىنە سۇيەنسەك, بۇگىنگى كۇنى شۆەيتساريالىق سيىرلار تاۋلىگىنە 1,5 تونناعا دەيىن ءسۇت بەرەدى. جوسپاردا ونى 8 تونناعا دەيىن جەتكىزۋ كوزدەلگەن.
ساۋىلعان ءسۇت تۇگەلىمەن ءسۇت ونىمدەرىن شىعاراتىن «ۇشتوبە ايدىن» جشس-عا جىبەرىلەدى. سونىڭ ناتيجەسىندە ءسۇت ءوندىرىسىنىڭ اۋدانداعى كوشباسشىسى ءونىم ءتۇرىن كوبەيتىپ, ساپاسىن ارتتىرۋعا مۇمكىندىك الدى.
- ءسۇت كەشەنىن اشۋ - اۋدانىمىز ءۇشىن ايتۋلى وقيعا. كەشەن مالدىڭ جوعارى ونىمدىلىگىمەن, مالدى باپتاۋعا جاسالعان قولايلى جاعدايىمەن, جاڭا تەحنولوگيانى ەنگىزۋىمەن ەرەكشەلەنەدى. بۇگىنگى كۇنى فەرمادا 50 ادام جۇمىس ىستەيدى. شارۋاشىلىق يەسى كەيىن ىرگەسىن كەڭەيتىپ, جۇمىسشىلار سانىن 100-گە جەتكىزۋدى دە جوسپارلاپ وتىر. وتكەن جىلى نىساننىڭ قۇرىلىسى باستالعاننان بەرى ءبىزدىڭ اۋداندىق فيليال زاڭدىق تۇرعىداعى ماسەلەلەرگە قاتىستى جان-جاقتى كومەك كورسەتتى, - دەدى كاسىپكەرلەر پالاتاسىنىڭ قاراتال اۋداندىق فيليالىنىڭ ديرەكتورى مارات قۇسايىنوۆ.
جالپى, جىل باسىنان بەرى قاراساي اۋدانىندا 750 باسقا ارنالعان جوعارى ونىمدىلىكتى ءسۇت-تاۋارلى فەرما جانە «مەدەۋ كوممەرتس» جشس-نىڭ پروگرەسسيۆتى تەحنولوگيا نەگىزىندە قۋاتتىلىعى جىلىنا 5 مىڭ توننا بولاتىن ءسۇت وڭدەۋ تسەحى ىسكە قوسىلعان.