مەملەكەتتىك حاتشى گۇلشارا ابدىقالىقوۆانىڭ تورايىمدىعىمەن قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسى ءوتتى.
مەملەكەتتىك حاتشى ەل تاۋەلسىزدىگىنىڭ شيرەك عاسىرلىق مەرەيتويىن مەرەكەلەۋ اياسىندا «25 جۇلدىزدى كۇن» بەكىتىلگەنىن, سول سەبەپتى 2 جەلتوقسان وتباسى جانە قۇندىلىقتار كۇنىنە ارنالعانىن جەتكىزدى. ەلباسى «وتباسى – اتا-انالار, بالالار مەن نەمەرەلەر باقىتىنىڭ پريزماسى ارقىلى وتەتىن پاتريوتيزم مەن وتان وركەندەۋىنىڭ ماڭگىلىك قاينار كوزى», – دەپ اتاپ وتكەن بولاتىن. شيرەك عاسىرداعى تاريحي تابىستارىمىزعا شولۋ جاساعاندا, وتباسىلىق ساياساتتى ورنىقتىرۋداعى ىرگەلى ىستەردى ايرىقشا اتاپ كورسەتۋىمىز كەرەك. تاۋەلسىزدىك جىلدارىندا وتباسىلىق-دەموگرافيالىق ساياسات مەملەكەت دامۋىنىڭ ستراتەگيالىق باعىتى رەتىندە بەكىتىلدى, دەدى گۇلشارا ناۋشاقىزى. سونىمەن قاتار, ول بۇل سالاداعى ماسەلەلەر كەزەڭ-كەزەڭىمەن تۇپكىلىكتى شەشىمىن تاۋىپ كەلە جاتقانىن ايتتى.
بيىلعى جىلى ەلىمىزدە 2006-2016 جىلدارعا ارنالعان گەندەرلىك تەڭدىك ستراتەگياسى قورىتىندىلانىپ كەلەدى. اتالعان ستراتەگيانى ىسكە اسىرۋ بارىسىندا گەندەرلىك ساياساتتى جۇزەگە اسىرۋ, بيلىك پەن ەكونوميكانىڭ بارلىق سالالارىندا ايەلدەردىڭ ءرولىن كۇشەيتۋ, انا مەن بالا دەنساۋلىعىن نىعايتۋ سەكىلدى وزەكتى ماسەلەلەر قولعا الىندى. بۇگىندە حالىقارالىق تالاپتارعا ساي, جاڭا تۇجىرىمداما ازىرلەنىپ, ول ەلباسىنىڭ قول قويۋىنا جىبەرىلدى. تۇتاس ءبىر جىل بويى ءبىز قازاقستاننىڭ مەملەكەت رەتىندە قالىپتاسۋى كەزەڭىندەگى قيىندىقتار تۋرالى ايتتىق, ەلىمىزدىڭ ءتۇرلى سالالارداعى جەتىستىكتەرىمەن بولىستىك. وسى جىلدارى ءبىز قانداي جولداردى بىرگە ءجۇرىپ وتكەنىمىزدى ساراپقا سالدىق, دەدى گ. ابدىقالىقوۆا.
وتىرىستا قازاقستاندا وتباسىلىق قاتىناستاردى, مورالدىق-ەتيكالىق جانە رۋحاني-ادامگەرشىلىك قۇندىلىقتاردى نىعايتۋدىڭ 2015-2020 جىلدارعا ارنالعان جالپىۇلتتىق ءىس-شارالار جوسپارىنىڭ ىسكە اسىرىلۋ بارىسى, ماسەلەن, بالالاردىڭ, ونىڭ ىشىندە الەۋمەتتىك جاعىنان ءالسىز بۋىننىڭ جاعدايىن جاقسارتۋعا, وتباسى جانە نەكەنى, وتباسىلىق قۇندىلىقتاردى نىعايتۋ بويىنشا حالىقتىڭ بىلىكتىلىگىن ارتتىرۋعا قاتىستى ماسەلەلەر قارالدى.
بۇدان بولەك, مەملەكەت باسشىسىنىڭ تاپسىرماسى بويىنشا بالالار قۇقىقتارى جونىندەگى ۋاكىل ينستيتۋتى قۇرىلعانى, مەملەكەتتىك ءبىلىم بەرۋ جيناقتاۋ جۇيەسىنىڭ شەڭبەرىندە بالالار ءۇيىنىڭ 7779 تاربيەلەنۋشىسى ءۇشىن 5 ميلليارد تەڭگەدەن استام سوماعا جيناقتاۋ شوتتارى اشىلعانى, پاترونات, بالالاردى اسىراپ نەمەسە قامقورلىققا العان وتباسى مەملەكەت تاراپىنان ماتەريالدىق تۇرعىدا ىنتالاندىرىلاتىنى ايتىلدى. كوميسسيا مۇشەلەرىنىڭ ايتۋىنشا, قازاقستان ازاماتتارى ءۇشىن بالا اسىراپ الۋ راسىمدەرى وڭايلاتىلىپ, بالا اسىراپ الۋدىڭ حالىقارالىق تالاپتارى قاتاڭداتىلعان.
ۇلتتىق كوميسسيانىڭ اتقارعان جۇمىستارى تەك مۇنىمەن تۇگەسىلمەيدى ەكەن. ماسەلەن, ەلىمىزدە ينكليۋزيۆتىك ءبىلىم بەرۋدى ەنگىزگەن بالاباقشالاردىڭ سانى ارتىپ قانا قويماي, ينكليۋزيۆتىك ءبىلىم بەرۋمەن مەكتەپكە دەيىنگى جاستاعى 14 517 بالا قامتىلىپتى. بۇعان قوسا, قوسىمشا ءبىلىم بەرۋ ۇيىمدارىندا مۇمكىندىگى شەكتەۋلى 2000-نان استام بالاعا شىعارماشىلىق ساۋىقتىرۋ شارالارى ۇيىمداستىرىلعان ەكەن.
جيىن بارىسىندا, سونداي-اق, ايەلدەر اراسىندا جۇرگىزىلگەن ءدىني اقپاراتتىق-ءتۇسىندىرۋ ماسەلەسى تالقى تارازىسىنا سالىندى. كوميسسيا مۇشەلەرىنىڭ ايتۋىنشا, 2013-2016 جىلدارعا ارنالعان اقپاراتتىق-ءتۇسىندىرۋ جۇمىستارىنىڭ اياسىندا جالپى سانى 5,5 ميلليون ادام, ولاردىڭ 51 پايىزىن قۇرايتىن ايەلدەر ءۇشىن 59 مىڭنان استام ءىس-شارا وتكىزىلىپتى. ال قازىر ۇلتتىق كوميسسيا مەن وڭىرلەر اكىمدىكتەرىنىڭ بىرلەسىپ قولعا الۋىمەن, «ءدىن جانە ايەل» جوباسى ىسكە اسىرىلىپ جاتىر ەكەن.
ۇلتتىق كوميسسيا مۇشەلەرىنە جاستار اراسىنداعى رۋحاني-ادامگەرشىلىك, ۇلتتىق مادەنيەت جانە وتباسىلىق قۇندىلىقتاردى نىعايتۋ ءۇشىن قۇرىلعان «Otbasym.kz» ۇلتتىق مۋلتيمەديالىق پورتالى تانىستىرىلدى.
كوميسسيا وتىرىسىنىڭ سوڭىندا گۇلشارا ابدىقالىقوۆا مەملەكەتتىك ورگاندارعا بىرقاتار ناقتى تاپسىرما جۇكتەدى.
ءلايلا ەدىلقىزى,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»