كەشە الماتىدا «بوبەك» ۇلتتىق ورتالىعىندا «بوبەك» قورىنىڭ پرەزيدەنتى سارا نازارباەۆانىڭ قاتىسۋىمەن «ءوزىن ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسى بويىنشا IX رەسپۋبليكالىق كەڭەس ءوتتى.
ءبىلىم جانە عىلىم مينيسترلىگىنىڭ ۇيىمداستىرۋىمەن وتكەن كەڭەس جۇمىسىنا جوو رەكتورلارى, «ءوزىن ءوزى تانۋ» راب بويىنشا رەسپۋبليكالىق كەڭەستىڭ مۇشەلەرى, مەملەكەتتىك ورگانداردىڭ, ۇكىمەتتىك ەمەس ۇيىمدار مەن پەداگوگيكالىق قوعامنىڭ وكىلدەرى قاتىسىپ, اتالعان باعدارلامانى ءجۇزەگە اسىرۋداعى ۇيىمداستىرۋ-باسقارۋ جانە عىلىمي-ادىستەمەلىك نەگىزدەرىن جەتىلدىرۋ ماسەلەلەرىن تالقىلادى.
بارشاعا ءمالىم, «ءوزىن ءوزى تانۋ» جالپىعا ءمىندەتتى ءپانى – ەلىمىزدىڭ مەكتەپكە دەيىنگى جانە ورتا ءبىلىم بەرۋ جۇيەسىنە, سونداي-اق پەداگوگتار دايارلاۋدىڭ ءبىلىم بەرۋ باعدارلاماسىنا 2010 جىلدان باستاپ ەنگىزىلدى. ونداعى ماقسات – جاس ۇرپاقتىڭ قۇندىلىق باعدارلارىنىڭ قالىپتاسۋىندا ماڭىزدى ءرول اتقارىپ, ءوسىپ كەلە جاتقان تۇلعانىڭ رۋحاني دۇنيەسى باي, جەتىستىككە قول جەتكىزە الاتىن, ءوز ءومىرىنە جاۋاپكەرشىلىگى جوعارى ادام بولۋعا ۇيرەتۋ.
وتىرىستىڭ مودەراتورى, رەسپۋبليكالىق كەڭەستىڭ ءتورايىمى – ءبىلىم جانە عىلىم ۆيتسە-ءمينيسترى ە.سۋحانبەرديەۆا ءوز سوزىندە «ءوزىن ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ ماڭىزى, ونىڭ ىسكە اسىرىلۋى جانە بىرىڭعاي ءبىلىم بەرۋ كەڭەستىگىندە «ءوزىن ءوزى تانۋ» راب باعدارلاماسىن ەنگىزەتىن قاناتقاقتى ءبىلىم بەرۋ ۇيىمدارى جۇيەسىن ۇلعايتۋ ماسەلەسىنە كەڭىنەن توقتالدى. سونداي-اق, اقتوبە وبلىستىق ءبىلىم بەرۋ باسقارماسىنىڭ باسشىسى ساۋلە ومىربەكوۆا پەداگوگ ءۇشىن ەڭ ماڭىزدى ماسەلە – الدىڭداعى وقۋشىنىڭ الەۋەتىن اشۋعا كومەكتەسۋ, ونى ومىردە, تاجىريبەدە قولدانۋعا, ءسويتىپ, بالانىڭ الدىمەن ءوزىن, ورتاسىن تۇسىنۋگە مۇمكىندىك بەرۋ كەرەكتىگىن ايتا كەلە, بۇگىندە وبلىستا بەس ءبىلىم بەرۋ مەكەمەسىندە بۇل باعدارلامانىڭ تەرەڭدەتىلگەن مودەلىنىڭ وقىتىلىپ جاتقانىن تىلگە تيەك ەتتى.
ال اباي اتىنداعى قازۇپۋ رەكتورى سەرىك پىراليەۆ بۇل ءپاننىڭ پەداگوگيكالىق جوو وقىتىلۋ بارىسىندا ستۋدەنت جاستاردىڭ ادامگەرشىلىك ساپالارى مەن قابىلەتتەرىن كەڭىنەن اشۋعا مۇمكىندىك بەرەتىنىنە, گۋمانيستىك دۇنيەتانىم نەگىزدەرى قالاناتىندىعىنا توقتالدى. سونداي-اق, 2010 جىلدان بەرى ۋنيۆەرسيتەتتى 2 مىڭعا جۋىق جاس مامان ءبىتىرىپ شىققانىن, ارنايى جابدىقتالعان «ءوزىن ءوزى تانۋ» وقۋ كابينەتى اشىلىپ, ستۋدەنت-ۆولونتەرلەردىڭ ۇسىنىسىمەن «مەيىرىم» كلۋبىنىڭ جۇمىس جاسايتىنىن, التى جىلدان بەرى ءوزىن ءوزى تانۋ كافەدراسىنىڭ كۇشىمەن مونوگرافيا, ادىستەمەلەر, وقۋ قۇرالدارى جازىلعانىن, الداعى جاڭا وقۋ جىلىندا ماگيستراتۋرا, دوكتورانتۋرا اشۋدى ويلاستىرىپ جاتقاندارىن ورتاعا سالدى.
جيىندى «ءوزىن ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى س.نازارباەۆا قورىتپاس بۇرىن, اتالمىش باعدارلامانىڭ قوعامداعى, ادامنىڭ جەكە باسىنداعى ماڭىزىنا توقتالىپ, ون جىلدان بەرى وزىمەن بىرگە وسى جوبانىڭ جۇزەگە اسۋىنا اتسالىسىپ كەلە جاتقان ارىپتەستەرىمەن ەمەن-جارقىن اڭگىمە-دۇكەن قۇرىپ, بۇگىندە اتقارىلىپ جاتقان جۇمىستارعا جوعارى باعا بەردى.
– «جالعىز اعاش ورمان ەمەس» دەگەن, ەگەر سىزدەر مەنىڭ وسى باعدارلاماما قولداۋ كورسەتىپ, كومەكتەسپەگەندە جالعىز ءوزىم وسىنشاما ءىستى بىتىرەر مە ەدىم. مەنىڭ بۇل باعدارلاماداعى باستى ايتارىم, ادامزاتتىڭ اۋەل باستان ءبىرىنشى پارىزى – ومىرگە ادام بولىپ كەلگەن سوڭ, ادام بولىپ قالۋ. ادام دەگەن ۇلاعاتتى اتقا لايىقتى بولۋ. بايقادىڭىزدار ما, وسى ءپاندى وقىعان وقۋشىلاردىڭ, ستۋدەنتتەردىڭ جۇزىنەن ءبىر جىلىلىقتى بايقايسىز. ويتكەنى, جىلىلىق ادامنىڭ ىشكى جان دۇنيەسىنىڭ تازالىعىنان حابار بەرەدى. ەندەشە, بۇگىنگىدەي قيىن زاماندا ءبىز الدىمەن مامان ەمەس, ادام تاربيەلەۋىمىز كەرەك, – دەدى سارا الپىسقىزى.
گۇلزەينەپ سادىرقىزى,
«ەگەمەن قازاقستان»