«استانانىڭ» ءدۋبلى
«استانا» مەن «قايرات» وسى ماۋسىمنىڭ ۇزدىكتەرى ەكەنى بەلگىلى. فۋتبول ماۋسىمىنىڭ ءبىرىنشى جانە سوڭعى ماتچى ءدال وسى ەكى كلۋب اراسىندا ءوتتى. قازاقستان سۋپەركۋبوگىن ساراپقا سالعان ەكى ۇجىمنىڭ اراسىندا وتكەن ماتچ ماۋسىمنىڭ اشىلۋى بولعان ەدى. ول كەزدە الماتىلىقتار جەڭىسكە جەتكەن-ءدى. الايدا, «استانا» بارىنشا ءتيىمدى جانە ناتيجەلى ويىنداردىڭ ارقاسىندا چەمپيوناتتىڭ ورتاسىنا دەيىن ءوز قارسىلاستارىنان ۇپاي سانىمەن الدەقايدا باسىم تۇردى. چەمپيونات بەل ورتاسىنا جەتكەن كەزدە, «قايرات», «ورداباسى», «ەرتىس» ۇشەۋىنىڭ اراسىندا بەلگىلى ءبىر باسەكەلەستىك پايدا بولدى. ولار «استانانىڭ» ۇپاي سانىنا قاراماستان, ەلوردالىق ۇجىمدى قۋىپ جەتۋگە تىرىستى. قازاقستان قۇراماسىنىڭ كاپيتانى باۋىرجان يسلامحان, «زەنيتپەن» ۋەفا كۋبوگىندا جەڭىسكە جەتكەن اندرەي ارشاۆين, «باۆاريامەن» ۋەفا چەمپيوندار ليگاسىندا توپ جارعان اناتولي تيموششۋك سياقتى تاماشا فۋتبولشىلارى بار «قايرات» قانا «استاناعا» چەمپيوندىق باسەكەدە لايىقتى قارسىلاس بولا الدى. ءتىپتى «استانا ارەنادا» 1:4 ەسەبىمەن ەلوردالىق كوماندانى جەرگە قاراتىپ كەتكەن ەدى. بىراق «قايرات» قانشا تىرىسسا دا, ستانيمير ستويلوۆ شاكىرتتەرى چەمپيوندىقتى بەرمەدى. وسىلايشا, «استانا» چەمپيون, «قايرات» ەكىنشى ورىنعا يە بولسا, ءۇشىنشى ورىن ءۇشىن تالاستا «ەرتىس» «ورداباسىدان» ءبىر ۇپايعا باسىم ءتۇستى. ەل كۋبوگىندا دا چەمپيوناتتىڭ ۇزدىك ەكى كلۋبى قارسىلاس كوماندالاردان باسىم بولىپ, فينالدا كەزدەسكەن ەدى. الماتىنىڭ قار باسقان ستاديونىندا دجۋنيور كابانانگا سوققان دوپ استانالىق كلۋبقا جەڭىس اپەردى.نەگىزگى كورسەتكىشتەر
«قايرات» چەمپيونات بويى قارسىلاستار قاقپاسىنا 75 گول سوقتى. سونىمەن قاتار, چەمپيونات ويىندارىندا ءوز الاڭىندا جەڭىلمەگەن دە سول كوماندا. بۇل ۇزدىك كورسەتكىش. الماتىلىق كلۋب ساپىندا ونەر كورسەتەتىن جەرار گوۋ 22 گول سوعىپ, قايتادان ماۋسىمنىڭ سۇرمەرگەنى اتاندى. ال چەمپيون «استانا» 47 گولمەن ەل بىرىنشىلىگىن اياقتادى. الايدا, استانالىقتاردىڭ چەمپيون اتانۋى ءبىر ەسەپتەن زاڭدىلىق تا. سەبەبى «استانا» چەمپيوناتتا ەڭ از گول جىبەرگەن كوماندا بولىپ شىقتى. 32 ويىندا 21 گول جىبەرگەن. ال ەڭ كوپ گول جىبەرگەن كوماندا «جەتىسۋ» بولىپ وتىر. قارسىلاس كوماندالاردىڭ ويىنشىلارى «جەتىسۋلىقتار» قاقپاسىنان 53 رەت ساڭىلاۋ تاپقان ەكەن. بۇدان بولەك, قازاقستان پرەمەر-ليگاسىندا ەڭ كوپ ماتچ وتكىزگەندەر ءتىزىمىن «توبىل» كلۋبىنىڭ كاپيتانى نۇربول جۇماسقاليەۆ باستاپ تۇر. ول جالپى قازاقستان بىرىنشىلىگىندە 496 ويىن وتكىزگەن ەكەن. بۇل ابسوليۋتتىك رەكورد بولىپ سانالادى. سامات سماقوۆ, داۆيد لوريا, رينات ابدۋلين, فارحادبەك ىرىسمەتوۆ, ماقسات بايجانوۆ, اندرەي فينونچەنكو سىندى فۋتبولشىلار دا سپورتتىق كارەراسىن جالعاستىرىپ, جاستارعا ۇلگى بولۋدا. اعا بۋىننىڭ ءىزىن باسىپ كەلە جاتقان تاجىريبەلى فۋتبولشىلار دا ەمەس. باۋىرجان يسلامحان, ەلدوس احمەتوۆ, سەرىكجان مۇجىقوۆ, يسلامبەك قۋات, رومان مۋرتازاەۆ, اسحات تاعىبەرگەن, ديدار جالمۇقان, ەركەبۇلان تۇڭعىشباەۆ سياقتى تالانتتى فۋتبولشىلارىمىز ەل قۇراماسىندا دا, ءوز كلۋبتارىنىڭ ساپىندا دا جوعارى دەڭگەيدە ويناپ ءجۇر. «توبىل» شابۋىلشىسى سەرگەي حيجنيچەنكونىڭ گولدارى دا قوستانايلىق جانكۇيەرگە ەرەكشە قۋانىش سىيلادى. لۋكاش فابيانسكيگە ەكى گول سوققان سەرگەي تالانتتى شابۋىلشى ەكەنىن دالەلدەيدى. سونىمەن قاتار قازاقستان چەمپيوناتىنداعى ۇزدىك لەگيونەرلەردى اتاپ وتپەسە بولمايدى. پاتريك تۆۋماسي, جەرار گوۋ, دجوردجيو دەسپوتوۆيچ, دجۋنيور كابانانگا سياقتى جىگىتتەردىڭ قازاقستانداعى كارەراسى ءساتتى بولىپ شىقتى. ولار بۇگىندە قازاقستان چەمپيوناتىنىڭ ۇزدىك ويىنشىلارى. «استانا» ساپىنداعى لەگيونەرلەر شەتەلدىك كلۋبتارمەن وتكەن ويىنداردا جاقسى ونەر كورسەتتى. اسىرەسە, پاتريك ءتۆۋماسيدىڭ جىلدامدىعىن ەرەكشە ايتۋعا تۇرارلىق. قازاقستاندىق كلۋبتاردا وينايتىن فۋتبولشىلار اراسىندا ەڭ جىلدامى دا پاتريك دەۋگە بولادى. وتكەن جىلى جەرار گوۋدىڭ قاسىندا شابۋىلشى بولعان دەسپوتوۆيچ «استاناعا» اۋىسىپ, چەمپيونات باسىنان گول سوعا باستادى. ال رەسەيلىك اندرەي ارشاۆين چەمپيونات باسىندا ازداپ كىبىرتىكتەسە دە, بىرتىندەپ «قايرات» قارقىنى كۇشەيگەن سوڭ, ول دا جانكۇيەرىن تاماشا گولدارمەن قۋانتا باستادى.ەل چەمپيونى ۋەفا-نىڭ اۋتسايدەرى مە؟
ارينە, «استانا» ءۇشىن ەۋروپا اياسىندا وتەتىن سايىستارعا ساقاداي ساي بولۋ باپكەر تاراپىنان مىندەتتەلگەنى انىق. وتكەن جىلعى ويىنداردان ساباق العان «استانا» وسى ماۋسىمدا وزدەرىنىڭ كەزدەسۋلەر كۇنتىزبەسىنىڭ اۋىر بولاتىنىن ەسكەرگەن. سوندىقتان دا «استانانىڭ» ءتيىمدى ەسەپكە قول جەتكىزىپ, سودان كەيىن قورعانىستا وينايتىنى بايقالدى. ياعني, بۇل ءادىس ەۋروپانىڭ كوپتەگەن بەلدى ۇجىمدارىنىڭ تاكتيكاسىنا اينالعان. ءدال وسىنداي تاكتيكانى الەكس فەرگيۋسون «مانچەستەر يۋنايتەدتە» ۇستانعان ەدى. سەبەبى اعىلشىن فۋتبولىندا ەۋرو كۋبوكتاردان بولەك ءوزارا چەمپيوناتى دا تارتىستى جانە كۋبوك ويىندارى دا كوبىرەك ەكەندىگى بەلگىلى. سول سەبەپتى فەرگيۋسون ءوزىنىڭ شاكىرتتەرىن بارىنشا ءتيىمدى جانە ارتىق كۇش جۇمساماي ويناۋ قاجەتتىگىن تالاپ ەتتى. ويتكەنى فۋتبولشىلار ماۋسىم بويىندا ءبىراز شارشايدى جانە ونىڭ ۇستىنە جاراقات تا الىپ جاتادى. بۇل تۋرالى سەر الەكس ءوزىنىڭ اۆتوبيوگرافياسىندا تولىق ايتقان. وسى رەتتە, ستانيمير ستويلوۆ تا ءدال وسى ۇتىمدى تاكتيكانى «استانا» فۋتبولشىلارىنا سىڭىرە العان. ءدۇيىم جۇرتقا بۇل وڭاي كورىنگەنمەن, ۇلكەن تاۋەكەلدى قاجەت ەتەتىن ۇستانىم. ويتكەنى, ءبىر گول ايىرماسىمەن جەڭىستى ۇستاپ تۇرۋ قيىننىڭ قيىنى. ءبىر ساتتە كوماندانىڭ بار ەڭبەگى ۇپاي جوعالتۋمەن ۇلاسىپ كەتۋى ابدەن مۇمكىن. بىراق «استانانىڭ» بۇل ۇستانىمى تولىقتاي سەنىمدى اقتاپ شىقتى دەسەك, قاتەلەسپەيمىز. چەمپيوناتتا جەڭىسكە جەتتى, قازاقستان كۋبوگىن ەلورداعا الىپ كەلدى, ءتىپتى چەمپيوندار ليگاسىنىڭ ىرىكتەۋ ويىندارىن دا تاماشا وتكىزگەن ەدى عوي. «سەلتيكپەن» وتكەن قارىمتا ماتچتا تورەشى نەناد ەريچتىڭ قاقپاسىنا ەكى بىردەي 11 مەترلىك ايىپ دوبىن بەلگىلەپ, «استانانى» چەمپيوندار ليگاسىنان شىعىپ قالۋىنا «جاعداي جاساپ» بەرگەنىن بىلەمىز. وسىلايشا, ۋەفا-نىڭ ەكىنشى دەڭگەيلى سايىسىندا قازاقستاندىق كلۋب سىنعا ءتۇسىپ جاتىر. كەزىندە تاڭات نوسەرباەۆتىڭ ونەرىن سىناپ كورۋگە شاقىرعان «يانگ بويز», گرەكيا چەمپيونى «وليمپياكوس», كيپرلىك «اپوەل» «استانانىڭ» توپتىق كەزەڭدەگى قارسىلاسى اتانعان كەزدە, ەۋروپا ليگاسىندا توپتان ارى قاراي وتۋگە مۇمكىندىك بار سياقتى كورىنگەن ەدى. الايدا, قازىرگى ۋاقىتتا ءوز توبىندا ەكى رەت تەڭ ويناپ, ەكى رەت ۇتىلعان «استانانىڭ» پلەي-وفف كەزەڭىنە ءوتۋى مۇمكىن ەمەس. دەسەك تە, «استانا» فۋتبول كلۋبى وسى ماۋسىمدى تاماشا وتكىزدى. شەتەلدىك ارەنادا كەي جەردە ساتتىلىك, كەي جەردە تاجىريبە جەتپەي قالدى. بىراق, سوڭعى ەكى جىلدا «استانا» ءوز جانكۇيەرلەرىنە قايتالانباس كەرەمەت قۋانىشتى ساتتەر سىيلاعاندىعىن ايتا كەتكەن ءجون. كوماندا ءوزىنىڭ جان سالىپ ويناي الاتىندىعىن كوپشىلىككە دالەلدەي الدى. استانالىق ۇجىم پلەي-وففقا وتە الماسا دا, «اپوەلمەن» تاماشا ويىن وتكىزدى. جەڭىلىپ تۇرىپ, جەڭىسكە جەتۋى ەلىمىزدىڭ فۋتبول جانكۇيەرى ءۇشىن بيىلعى ماۋسىمداعى ەڭ كەرەمەت ساتتەردىڭ ءبىرى بولدى.كەلەسى ماۋسىمنان نە كۇتەمىز؟
بيىلعى ماۋسىمدا قازاقستان پرەمەر-ليگاسى اجەپتاۋىر وسكەنىن كوردىك. كوماندالار اراسىنداعى باسەكە دە جوعارىلادى. كەلەسى جىلى جوعارى ليگادا توپ جارعان قىزىلوردالىق «قايسار» مەن وتپەلى ماتچتا «تارازدى» 3:0 ەسەبىمەن جەڭگەن سەمەيدىڭ «التاي» كلۋبى ەلدىڭ باستى بىرىنشىلىگىندە باق سىناساتىن بولادى. جاڭا ماۋسىمعا دەگەن دايىندىق جۇمىستارى قازىردىڭ وزىندە قىزۋ جۇرۋدە. «قايسار» بولگار مامانى ستويچو ملادەنوۆتى باس باپكەر تاعايىندادى. «قايرات» ورتالىق شەپتىڭ نەگىزگى ويىنشىلارىنىڭ ءبىرى اناتولي تيموششۋكپەن قوشتاستى. «استانا» بولسا, «ەرتىس» ساپىندا وسى جىلى 18 گول سوققان رومان مۋرتازاەۆتى الدى. قازاقستان چەمپيوناتىنىڭ كلۋبتارعا قويار تالابى جىلدان جىلعا وسۋدە. ەندى كوماندالار جاس فۋتبولشىلاردى تاربيەلەۋ, ترانسفەرلىك جۇمىستاردى جوعارى دەڭگەيدە جۇرگىزۋ, كلۋب قاراجاتىن ءتيىمدى پايدالانا ءبىلۋ, باپكەرلەر مەن باسقا دا قىزمەتكەرلەردىڭ جۇمىسىن جاقسارتۋ سياقتى تالاپتار ەندىگى رەتتە باستى نازاردا بولۋى شارت. سەبەبى ەلىمىزدەگى فۋتبولدىڭ دەڭگەيىنىڭ وسۋىمەن قاتار, قازاقستان چەمپيوناتىنا دەگەن قىزۋعىشىلىقتىڭ دا ارتاتىنى ءسوزسىز. كەزىندە اتاعى جەر جارعان پاولو ءمالدينيدىڭ الماتىعا كەلىپ, «قايراتتىڭ» فۋتبول تاريحىمەن تانىسۋى دا وسىنىڭ دالەلى. بۇل دەگەنىمىز ەندى كەلەتىن لەگيونەرلەردەن دە ۇلكەن شەبەرلىكتى تالاپ ەتۋ مۇمكىندىگى تۋادى. چەمپيوناتتاعى كوماندالار دەڭگەيى وسىنداي قارقىندى تولقىنمەن دامي تۇسسە, كەلەسى ماۋسىمدا «استانا» مەن «قايرات» قاقپالارىنىڭ كىلتىن تابار فۋتبولشىلار از بولمايدى. وسىلايشا 2016 جىلعى فۋتبولدان وتكەن قازاقستان پرەمەر-ليگاسى جانكۇيەرلەردىڭ تولىقتاي كوڭىلىنەن شىقتى دەپ ايتا الامىز. كەلەر ماۋسىمدى بۇگىننەن اسىعا كۇتۋشىلەر, الدەن تالقىعا سالاتىندار كوبەيىپ كەلەدى. 2017 جىلعى فۋتبول ماۋسىمى جانكۇيەرلەرىنە كوپتەگەن قايتالانباس ساتتەر مەن كەرەمەت گولدار اكەلەدى دەگەن سەنەمىز. بي-بولات سەيتاق