بيىلعى جىلدىڭ باسىنىنا بەرى تۇرمىستىق سيپاتتاعى قىلمىستارعا بايلانىستى كۇشىنە ەنگەن ۇكىمدەر بويىنشا 206 ادام سوتتالدى. بۇل تۋرالى ورتالىق كوممۋنيكاتسيالار قىزمەتىندە «زورلىق زومبىلىققا قارسى 16 كۇن» حالىقارالىق ناۋقانىنىڭ ماقساتتارى مەن مىندەتتەرى» تاقىرىبىندا وتكەن بريفينگتە پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى – باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتورايىمى ساۋلە ايتپاەۆا ءمالىم ەتتى.
ول تۇرمىستىق زورلىق-زومبىلىقتىڭ الدىن الۋ سالاسىنداعى وزەكتى ماسەلەلەر تۋرالى جانە باس پروكۋراتۋرا جۇزەگە اسىرىپ جاتقان «وتباسىنداعى زورلىق-زومبىلىقسىز قازاقستان» جوباسىنىڭ اياسىندا قابىلدانىپ جاتقان شارالار تۋرالى اقپارات بەردى. سونداي-اق وتباسىلىق-تۇرمىستىق سالاداعى قۇقىق بۇزۋشىلىقتاردىڭ الدىن الۋدىڭ ءتيىمدى مەحانيزمدەرىن ازىرلەۋگە جانە ەلىمىزدە ۇيدەگى زورلىق-زومبىلىق قۇرباندارىن وڭالتۋعا ارنالعان ۆەدومستۆوارالىق جۇمىس توبى قۇرىلعانىن اتاپ ءوتتى.
«بيىلعى جىلدىڭ باسىنىنا بەرى تۇرمىستىق سيپاتتاعى قىلمىستارعا بايلانىستى كۇشىنە ەنگەن ۇكىمدەر بويىنشا 206 ادام سوتتالدى. ولاردىڭ باسىم بولىگى (86 ادام) باس بوستاندىعىنان ايىرۋ جازاسىنا كەسىلدى. سونداي-اق 11 444 ادام اكىمشىلىك جاۋاپقا تارتىلدى», – دەدى س. ايتپاەۆا.
ول سونداي-اق باس پروكۋراتۋرانىڭ تۇراقتى اقپارات جيناپ, «تۇرمىستىق زورلىق-زومبىلىق پروفيلاكتيكاسى تۋرالى» زاڭنىڭ ورىندالۋى, تۇرمىستىق زورلىق-زومبىلىقتىڭ بارلىق تۇرلەرى بويىنشا قۇقىق قولدانۋ پراكتيكاسى تۋرالى قۇقىقتىق ستاتيستيكاعا تالداۋ جۇرگىزەتىندىگىن حابارلادى.
«وتكەن جىلدىڭ ۇقساس كەزەڭىمەن سالىستىرعاندا بيىلعى 10 ايدا رەسپۋبليكا بويىنشا وتباسىلىق-تۇرمىستىق سالادا تىركەلگەن قىلمىستاردىڭ سانى 373-تەن 360-قا دەيىن بولماشى تومەندەگەنى بايقالادى. كىسى ءولتىرۋ (65-تەن 63-كە) جانە دەنساۋلىققا ورتاشا زيان كەلتىرۋ (101-دەن 87-گە) دەرەكتەرىنىڭ سانى ازايدى», – دەدى ۇلتتىق كوميسسيا مۇشەسى.
ايدار ورىسباەۆ,
«ەگەمەن قازاقستان».