مەملەكەت تاراپىنان قابىلدانىپ جاتقان كەشەندى شارالار ناتيجەسىندە 2001-2015 جىلدار ارالىعىندا تابىستارى ەڭ تومەنگى كۇنكورىس مولشەرىنەن از تۇرعىنداردىڭ ۇلەسى 46,7%-دان 2,7%-عا دەيىن تومەندەدى. بۇل كورسەتكىش قازاقستاندىقتاردىڭ ءومىر ءسۇرۋ ساپاسىنىڭ جانە كەدەيلىك دەڭگەيىنىڭ ازايعانىنىڭ دالەلى, دەپ حابارلادى primeminister.kz.
2002 جىلى ءارتۇرلى وبەكتيۆتى سەبەپتەرمەن ءوزىنىڭ تىرشىلىك ارەكەتتەرىندە جاعداي جاساۋدا قيىندىقتاردى باستان كەشكەن از قامتىلعان وتباسىلارعا اتاۋلى الەۋمەتتىك كومەك (بۇدان ءارى-ااك) قاراستىراتىن «مەملەكەتتىك اتاۋلى الەۋمەتتىك كومەك تۋرالى» قر زاڭى قابىلدانعان بولاتىن.
اتاۋلى الەۋمەتتىك كومەك الۋشىلاردىڭ ايتارلىقتاي ۇلەسىن بالالار قۇرايتىنى ەسكەرىلىپ, «بالالى وتباسىلارعا بەرiلەتiن مەملەكەتتiك جاردەماقىلار تۋرالى» قر زاڭىنا سايكەس, 2006 جىلدىڭ 1 قاڭتارىنان 18 جاسقا دەيiنگi بالالارعا اي سايىنعى مەملەكەتتiك جاردەماقى ەنگىزىلدى. ناتيجەسىندە ااك الۋشىلاردىڭ سانى 30,9 ەسە ازايدى (2002 جىلى 1,18 ملن ادامنان 2015 جىلى 38,2 مىڭ ادامعا دەيىن).
سونىمەن قاتار, از قامتىلعان ازاماتتاردى قولداۋ ماقساتىندا, 1997 جىلدان بەرى تۇرعىن ءۇيدى ۇستاۋ, كوممۋنالدىق قىزمەت تولەمدەرى وسى ماقساتتارعا كەتەتىن شەكتى شىعىنداردان ارتقان وتباسىلارى ءۇشىن تۇرعىن ءۇي كومەگى ەنگىزىلدى. تۇرعىن ءۇي كومەگىنىڭ مولشەرى جانە ءتارتىبى جەرگىلىكتى وكىلدى ورگاندارمەن بەلگىلەنەدى.
سونىمەن, كەدەيلىكپەن كۇرەسۋ بويىنشا ءتيىستى شارالاردىڭ قابىلدانۋى, نەگىزگى ماكروەكونوميكالىق كورسەتكىشتەردىڭ تۇراقتى ءوسۋى, جۇمىسپەن قامتۋدىڭ جانە حالىق تابىسىنىڭ ءوسۋى كەدەيلىك دەڭگەيىنىڭ ايتارلىقتاي قىسقارۋىنا الىپ كەلدى.