1927 جىلدىڭ 23 ناۋرىزىندا قاراعاندى وبلىسىنىڭ جاڭاارقا اۋدانى اتاسۋ سەلوسىندا سەرىك سمايىل ۇلى قيراباەۆ ومىرگە كەلدى. سەراعانىڭ ءومىر جولىنا قاراپ وتىرساڭىز, حح عاسىرداعى ءبىلىم, عىلىم سالاسىنداعى ايتۋلى وقيعالاردىڭ بەل ورتاسىندا جۇرگەنىنە كوزىڭىز جەتەدى.
بۇل زامان وكىلدەرىنە ۋاقىتتىڭ ءوزى اۋىر جۇك ارقالاتتى. بەيبىت ءومىردى ءبىر ساتتە الاساپىرانعا اينالدىرعان ۇلى وتان سوعىسى تۇسىنداعى بوزبالالار ءبىر كۇندە ەسەيىپ, ءبىر وتباسىنىڭ, قالا بەردى, اۋىل-ايماقتىڭ بار اۋىر تىرلىگى وزدەرىنە قاراپ قالعانىن ءتۇسىندى. ۇزاققا سوزىلعان سوعىس ەلدىڭ الەۋمەتتىك, ەكونوميكالىق جاعدايىن تۇرالاتقانمەن, ولاردىڭ بولاشاققا دەگەن سەنىمىن, ءورشىل رۋحىن ءوشىرە المادى. ەل باسىنا اۋىر كۇن ءتۇسكەن شاقتا مەكتەپتى ۇزدىك وقىعان سەراعاڭداي ءبىلىمدى جاسقا پارتيا ىنتالى جەتىجىلدىق مەكتەبىندە وقىتۋشىلىق قىزمەت اتقارۋدى تاپسىردى. كارل ماركس اتىنداعى كولحوزدا باستاۋىش مەكتەپتىڭ مەڭگەرۋشىسى بولىپ ىستەگەن سەراعاڭنىڭ كۇنى بۇگىنگە دەيىنگى بۇكىل سانالى عۇمىرى ءبىلىم, عىلىم سالاسىنا ارنالىپ كەلە جاتقانى دا ءبىر عانيبەت.
سوعىس اياقتالىپ, ەل ەسىن جيعان شاقتا ءبىلىمىن جەتىلدىرۋدى كوزدەگەن سەرىك سمايىل ۇلى 1947 جىلى قازاقتىڭ اباي اتىنداعى پەداگوگيكالىق ينستيتۋتىنىڭ قازاق ءتىلى مەن ادەبيەتى فاكۋلتەتىنە وقۋعا ءتۇسەدى. ءومىردىڭ قايراعىنا ءتۇسىپ, ەل ءتىرشىلىگىنە ەرتە ارالاسقان ول وقۋ-بىلىمگە بار ىنتاسىمەن كىرىسىپ, ۇزدىك وقىعانى ءۇشىن ستالين اتىنداعى ستيپەنديا الدى. ءوز قاتارلارىنىڭ اراسىندا بىلىمىمەن كوزگە تۇسكەن سەراعاڭ ستۋدەنتتەردىڭ عىلىمي قوعامى مەن ادەبيەت ۇيىرمەسىنىڭ جۇمىسىنا, قوعامدىق ىستەرگە دە بەلسەنە ارالاستى. فاكۋلتەتتىڭ كاسىپوداق, كومسومول ۇيىمدارىن باسقارا ءجۇرىپ, ادەبي-سىن ماقالالار جازدى, ءوزىنىڭ ادەبيەتكە يكەمدىلىگىن تانىتتى.
ادەبي تالداۋلارى كوپشىلىكتىڭ نازارىن اۋدارعان سەرىك سمايىل ۇلى ستۋدەنت كۇنىنەن-اق جازۋشىلار وداعىنىڭ جۇمىسىنا كىرىسىپتى.
1951 جىلدىڭ قاڭتارىنان قازاقتىڭ مەملەكەتتىك كوركەم ادەبيەت باسپاسىندا پروزا ءبولىمىنىڭ رەداكتورى بولىپ قىزمەت اتقارعانىن ەسكە الاتىن بولساق, ينستيتۋتتىڭ سوڭعى كۋرسىنان قىزمەتكە ارالاسقاندىعى بايقالادى. ۇستازدار قاۋىمى جوعارى وقۋ ورنىن ۇزدىك بىتىرگەن ستۋدەنتتەرىن اسپيرانتۋراعا الىپ قالۋعا تىرىساتىن. س.قيراباەۆ اسپيرانتۋرادا وقي ءجۇرىپ ۇستازى قاجىم جۇماليەۆتىڭ جەتەكشىلىگىمەن كانديداتتىق ديسسەرتاتسياسىن جازدى, ءارى «ادەبيەت جانە يسكۋسستۆو» جۋرنالىنىڭ رەداكتسياسىندا ءبولىم مەڭگەرۋشىسى قىزمەتىن قوسا اتقاردى.
الايدا, جيىرماسىنشى عاسىردىڭ ەلۋىنشى جىلدارىنداعى ساياسي جاعدايدىڭ قۇرىعى پروفەسسور ق.جۇماليەۆتىڭ دە باسىنا ءتۇسىپ, ول ساياسي ايىپتارمەن ۇستالىپ كەتتى. ەندى كافەدرادا عىلىمي جۇمىس ءىستەۋدىڭ مۇمكىنشىلىكتەرى ازايدى. سەرىك قيراباەۆ قازاقستان كومسومولى ورتالىق كوميتەتىنىڭ ۇسىنىسىمەن «پيونەر» جۋرنالىنا رەداكتور, «سوتسياليستىك قازاقستان» گازەتىندە ادەبيەت جانە ونەر ءبولىمىنىڭ مەڭگەرۋشىسى, رەداكتسيا القاسىنىڭ مۇشەسى قىزمەتتەرىن اتقاردى. باسپاسوز قىزمەتىندە جۇرگەندە گازەت بەتتەرىندە ادەبيەت پەن ونەردىڭ وزەكتى ءماسەلەلەرىنە ارنالعان كوپتەگەن ماقالالار جاريالاپ, ادەبي پروتسەسكە ۇزبەي اتسالىستى.
سەراعاڭنىڭ ەلۋىنشى جىلدارداعى باسپاسوز قىزمەتىن, ادەبي-عىلىمدىق ەڭبەكتەرىنىڭ قاتارىن ورتا مەكتەپكە ارناپ جازعان وقۋلىقتارى تولىقتىردى. قازاقستان وقۋ مينيسترلىگى مەكتەپكە ارنالعان جاڭا وقۋلىقتار جاساۋ ءىسىنە قوسقان ءبىر توپ جاستاردىڭ ىشىندە س.قيراباەۆ تا بار ەدى. ا.نۇرقاتوۆ, ز.قابدولوۆ ۇشەۋىنىڭ اۆتورلىعىمەن جازىلعان ورتا مەكتەپتىڭ 9-سىنىبىنا ارنالعان «قازاق ادەبيەتى» وقۋلىعى العاش رەت 1952 جىلى جارىق كوردى. وسى وقۋلىق 1986 جىلعا دەيىن تولىقتىرىلىپ, ۋاقىت تالابىنا ساي جاڭارتىلىپ بىرنەشە دۇركىن باسىلدى. كەيىن بۇل وقۋلىق 10-سىنىپقا ارناپ قايتا جازىلدى, اتالعان وقۋلىق 1989 جىلدان بەرى بىرنەشە رەت قايتا شىعارىلىپ, مەكتەپ وقۋشىلارىنىڭ ادەبي ءبىلىم الۋىنا زور كومەگىن تيگىزۋدە. كەيىن ول 9-10-سىنىپقا ارنالعان «قازاق سوۆەت ادەبيەتى», ورتا مەكتەپتىڭ جوعارعى سىنىپتارىندا وتىلەتىن فاكۋلتاتيۆتىك كۋرسقا ارنالعان «قازاق سوۆەت ادەبيەتى», جوعارى وقۋ ورىندارىنىڭ ستۋدەنتتەرىنە ارنالعان «قازاق سوۆەت ادەبيەتى», «قازاق ادەبيەتى جانە مەكتەپ», «كەڭەس داۋىرىندەگى قازاق ادەبيەتى», 9-10-سىنىپتىڭ «قازاق ادەبيەتى» وقۋلىعىنا ادىستەمەلىك نۇسقاۋ, 9-10-سىنىپقا ارنالعان «قازاق ادەبيەتى» ءتارىزدى كوپتەگەن وقۋلىقتارمەن تولىقتى.
سىنشىنىڭ قالامىنان تۋعان وقۋلىقتار وسىلايشا 65 جىلدان بەرى مەكتەپتەردە ۇزدىكسىز وقىتىلىپ كەلە جاتقانىن ەسكەرەتىن بولساق, وسى وقۋ قۇرالدارىنان قازاق جاستارىنىڭ نەشە بۋىن ۇرپاعى ءبىلىم العانىن تۇيسىنەسىڭ. جوعارى سىنىپتارعا ارنالعان «قازاق ادەبيەتى» وقۋلىقتارىنان ءبىلىم ءنارىن العان شاكىرتتەر شارۋاشىلىق پەن ءمادەنيەتتىڭ الۋان سالاسىندا قىزمەت اتقارىپ, ءتاۋەلسىز قازاق ەلىنىڭ بەلگىلى دە بىلىكتى ماماندارىنىڭ قاتارىنا قوسىلدى. مىڭداعان شاكىرتتەردىڭ كەيبىرەۋلەرى جوعارى دارەجەلى عىلىمي اتاق الىپ, ءبىرسىپىراسى اقىن-جازۋشىلار قاتارىن تولىقتىرىپ, كوركەمدىك مادەنيەتىمىزدى دامىتۋعا اتسالىسسا, ەندى ءبىر پاراسى ادەبيەتتانۋ عىلىمىنىڭ توڭىرەگىندە ەڭبەك ەتىپ كەلەدى.
وسىلايشا سان-سالادا قىم-قۋىت ەڭبەك ەتۋدە جۋرناليستىك قىزمەت پەن زەرتتەۋشىلىكتى, ادىسكەرلىكتى ادەمى ۇشتاستىرعان ىزدەنۋشى پەداگوگ-جازۋشى سپانديار كوبەەۆتىڭ ءومىرى مەن شىعارماشىلىعىن تىڭعىلىقتى زەرتتەگەن كانديداتتىق ديسسەرتاتسياسىن قورعادى. ادەبيەتتانۋشى عالىمداردان جوعارى باعا العان بۇل ديسسەرتاتسيانىڭ مونوگرافياسى كۇنى بۇگىنگە دەيىن قولدانىستان ءتۇسكەن جوق. جازۋشى تۋرالى ىزدەگەندەر سەراعاڭنىڭ قۇراستىرۋىمەن, العى سوزىمەن شىققان سپانديار كوبەەۆتىڭ ءبىر تومدىق شىعارمالار جيناعىنا سوقپاي وتكەن ەمەس. سەبەبى, بۇل – جازۋشىنىڭ تولىق كۇيىندە باسىلعان تۇڭعىش كىتابى ەدى.
«قازاق سوۆەت ادەبيەتى تاريحى وچەركىنە» جازىلعان «عابيدەن مۇستافين» تاراۋى كەيىن تولىقتىرىلىپ مونوگرافيا بولىپ جاريالاندى. م.اۋەزوۆتىڭ «اباي», س.مۇقانوۆتىڭ «بوتاگوز», ع.ءمۇسىرەپوۆتىڭ «قازاق سولداتى» روماندارىنىڭ قاتارىنان ورىن العان ع.مۇستافيننىن «ميلليونەرى» قازاق ادەبيەتىن الەمگە تانىتقان تۋىندىلاردىڭ ءبىرى بولدى. عالىم جازۋشىنىڭ ءومىرى مەن شىعارماشىلىعىنا, «ميلليونەر», «قاراعاندى» ءتارىزدى وڭ باعالانعان روماندارىنا كەڭ تالداۋ جاسادى. ادەبي قاۋىمنان وڭ ءپىكىر العان مونوگرافيا قازاق (1956), ورىس (1957) تىلدەرىندە جارىق كوردى.
وسى ەڭبەكتەرى جونىندە عالىمنىڭ زامانداسى ز.قابدولوۆ وسىدان قىرىق جىل بۇرىن: «سول كەزدىڭ وزىندە ادەبي-ەستەتيكالىق قۇبىلىستاردى ءجىتى بايقاپ, نازىك تانيتىن, جوسىلتا, ەركىن جازاتىن, شابىتپەن جازاتىن. بۇل, ارينە, جاس سىنشىنىڭ جاقسى دايىندىعىنىڭ ناتيجەسى ەدى. وسىنىڭ ارقاسىندا, سالا-سالا ادەبي-كوركەم سىن ماقالالارىن ءوز الدىنا كويعاندا, العاشقى بەتتەن-اق كۇردەلى عىلىمي ىزدەنۋلەرگە اپاراتىن ىرگەلى ماسەلەلەرگە قالام تەربەدى. كەلەلى تاقىرىپتاردى كەڭ پايدالانىپ, تۇتاس باۋراپ, سپانديار كوبەەۆ, عابيدەن مۇستافين تۋرالى كولەمدى-كولەمدى زەرتتەۋلەرىن جازدى. بۇلار ناعىز عالىمنىڭ ارەكەتتەرى بولاتىن. سوندىقتان دا سەرىك جاپ-جاس كەزىندە عىلىم كانديداتى دارەجەسىن الدى», – دەگەن ەدى.
وسى ۇلگىمەن جازىلعان «ساكەن سەيفۋللين» اتتى مونوگرافياسىندا جاڭاشىل اقىن, رەۆوليۋتسيا ساربازى, مەملەكەت قايراتكەرى ساكەن سەيفۋلليننىڭ ادەبي مۇراسى جان-جاقتى تالدانادى. مونوگرافيادا قازاقستانداعى 20-جىلدارداعى ادەبي پروتسەسس, قوعام دامۋىنداعى جاڭا مازمۇندى ادەبيەتتىڭ قالىپتاسۋى, جازۋشى شىعارمالارىنداعى تاقىرىپتىق, ستيلدىك ىزدەنىستەر, ساكەننىڭ ادەبي پروتسەستەگى جانە ادەبيەت تاريحىنان الاتىن ءرولى ءتارىزدى ماسەلەلەر جان-جاقتى قاراستىرىلدى. مونوگرافيا نەگىزىندە اۆتور دوكتورلىق ديسسەرتاتسيا قورعادى. عىلىمي جۇرتشىلىق پەن قالىڭ وقىرمان تاراپىنان وڭ باعالانعان ساكەن سەيفۋللين تۋرالى تۇڭعىش ەڭبەك قازاق, ورىس ءتىلدەرىندە جارىق كوردى.
م.اۋەزوۆ اتىنداعى ادەبيەت ءجانە ونەر ينستيتۋتىنىڭ ديرەكتورى قىزمەتىن اتقارعان جىلدارى سەراعاڭنىڭ ۇلتجاندىلىق ءھام ازاماتتىق ۇستانىمدارى جارقىراي كورىندى. الاش ارىستارىنىڭ مۇراسىن اقتاۋ, ولاردى ناسيحاتتاۋ, قايتا جاريالاۋ ىستەرىمەن تىڭعىلىقتى دا, جۇيەلى تۇردە اينالىستى. شاكارىم قۇدايبەرديەۆ, احمەت بايتۇرسىنوۆ, ماعجان جۇماباەۆ, جۇسىپبەك ايماۋىتوۆ, مىرجاقىپ دۋلاتوۆ سىندى الاش ارداقتىلارىن اقتاۋ جونىندەگى كوميسسيانىڭ مۇشەسى رەتىندە سەراعاڭ ءوزىنىڭ ۇلتجاندى بولمىسىن تانىتتى. العاشىندا جۇسىپبەك ايماۋىتوۆتى اقتاۋ ءجونىندەگى قۇجاتتاردى دايىنداۋ ىسىمەن شۇعىلدانعان ول كەيىنگى جىلدارى وسى تاقىرىپتاعى ىزدەنىستەرىن ءماندى دە مازمۇندى, تەرەڭ دە كەشەندى زەرتتەۋگە ۇلاستىرىپ, سول ەڭبەگى ءۇشىن ش.ءۋاليحانوۆ اتىنداعى سىيلىقتى الدى. س.قيراباەۆتىڭ العى ءسوزىمەن, ونىڭ باسشىلىعىمەن جۇسىپبەك ايماۋىتوۆ شىعارمالارى العاشىندا ءبىر تومدىق, كەيىن بەس تومدىق, التى تومدىق بولىپ جىل وتكەن سايىن تولىعىپ جاتۋى عالىمنىڭ وسى سالاداعى تىڭعىلىقتى زەرتتەۋلەرىنىڭ ناتيجەسىن كورسەتتى.
عالىم-زەرتتەۋشى, اكادەميك سەرىك قيراباەۆتىڭ ۇيىمداستىرۋشىلىق جۇمىستارىنىڭ ءبىرى – يۋنەسكو كولەمىندە اتالىپ وتكەن ۇلى اباي قۇنانباەۆ پەن اۋىز ادەبيەتىنىڭ دارابوزى جامبىل جاباەۆتىڭ 150 جىلدىق جانە مۇحتار اۋەزوۆتىڭ 100 جىلدىق مەرەيتويلارى كەزىندەگى ەرەن ەڭبەگى. ابايتانۋ عىلىمىنا قوسىلعان ءىرگەلى زەرتتەۋلەرگە جەتەكشىلىك جاساپ, ابايتانۋعا قوماقتى ۇلەس قوسقانى ءۇشىن اكادەميك س.قيراباەۆ ارىپتەستەرى ز.احمەتوۆ, م.مىرزاحمەت ۇلى جانە ق.مۇحامەدحان ۇلى ءتارىزدى ادەبيەتتانۋشى – عالىمدارمەن بىرگە ەلىمىزدىڭ ەڭ جوعارى − مەملەكەتتىك سىيلىعىنىڭ لاۋرەاتى اتاندى.
سونىمەن بىرگە, سەراعاڭ جامبىلتانۋ ءبولىمىنىڭ قىزمەتكەرلەرىن ۇيىمداستىرا وتىرىپ, اقىننىڭ ەكى تومدىق تاڭدامالى شىعارمالارىن شىعارۋعا باسشىلىق جاسادى. عىلىمي تۇسىنىكپەن تولىقتىرىلعان جيناق زامان ىڭعايىمەن كەتكەن كەمشىلىكتەردەن تازارتىلدى, تولىقتىرىلدى. «جامبىل تۋرالى ءسوز» اتتى حالىقارالىق عىلىمي-تەوريالىق كونفەرەنتسيا ماتەريالدارىنىڭ جيناعىنا ۇلى دالا جىرشىسى تۋرالى جازىلعان الىس-جاقىن شەت ەل عالىمدارىنىڭ باياندامالارى مەن ماقالالارى جيناقتالدى. اتالعان ءماندى دە مازمۇندى ەڭبەكتەردى بۇگىنگى تاڭدا سيرەك كىتاپتار قورىنان عانا كورەتىن بولدىق.
بۇل جىلدارى اۋەزوۆتانۋ ءۇردىسى دامىدى. «م.و.اۋەزوۆتىڭ ءومىرى مەن شىعارماشىلىق شەجىرەسى», «مۋحتار اۋەزوۆ. پيسما رودنىم ي بليزكيم», «م.و.اۋەزوۆ تۋرالى ەستەلىكتەر», «اۋەزوۆ ەنتسيكلوپەدياسى» جارىق كورىپ, م.اۋەزوۆتىڭ ەلۋ تومدىق اكادەميالىق شىعارمالار جيناعى 1, 2, 3- تومدارمەن تولىقتى. سول تۇستا باستالعان جازۋشىنىڭ ەلۋ تومدىق جيناعى 15 جىلعا سوزىلعان قاجىرلى ەڭبەكپەن تياناقتالدى. بۇل جيناقتا جازۋشى مۇراسى ءتۇگەلدەي تاسقا باسىلىپ, حاتقا ءتۇسىرىلدى, كەڭەستىك ءداۋىر تۇسىنداعى يدەولوگيالىق قىسىم سالدارىنان كiرگەن كەيبiر بۇرمالاۋلاردان, قىسقارتۋلاردان تازارتىلدى, اكادەميالىق سيپاتتاعى عىلىمي ءتۇسiنiكتەمەلەر بەرiلدi. قولدان-قولعا تيمەي كەتكەن جيناققا دەگەن سۇرانىستىڭ كوپتىگىنەن ونىڭ ەكىنشى باسىلىمىن شىعارۋ ماعان بۇيىردى. ەندى اۋەزوۆتi جاڭاشا, جاڭا دەڭگەيدە زەرتتەۋگە تولىق مۇمكiندiك تۋىپ وتىر.
عالىمنىڭ ءححى عاسىردىڭ ەنشىسىنە تيەسىلى ەڭبەكتەرىنىڭ ءوزى – ءبىر توبە. بۇل جىلدارى اكادەميك سەرىك قيراباەۆتىڭ باسشىلىعىمەن 10 تومدىق «قازاق ادەبيەتىنىڭ تاريحى» اتتى كەشەندى ەڭبەك جازىلىپ, وقىرمانعا جول تارتتى. كەڭەستىك ءداۋىر ادەبيەتىن داۋىرلەۋ, جۇيەلەۋ, زەرتتەۋ ىسىنە باسشىلىق جاساعان ول 7, 8, 9-تومداردىڭ جەتەكشىسى عانا ەمەس, نەگىزگى اۆتورلارىنىڭ ءبىرى رەتىندە كوپتەگەن تاراۋلاردا كەڭەستىك ءداۋىر ادەبيەتىن بۇگىنگى ەگەمەن ەلدىڭ تالاپ-تىلەكتەرىنە ساي جاڭاشا باعامدادى. وسى قاتاردا ەرەكشە اتاۋدى قاجەت ەتەتىن تاعى ءبىر ەڭبەك – «قازاق رومانى: وتكەنى مەن بۇگىنى» اتتى ۇجىمدىق مونوگرافيا. بۇل ەڭبەكتە حح عاسىر ەنشىسىنە تيگەن قازاق رومانىنىڭ العاشقى ۇلگىلەرىنەن باستاپ, ونىڭ قالىپتاسۋ, دامۋ, ءوسىپ-وركەندەۋ ءداۋىرى حرونولوگيالىق جۇيە بويىنشا تىڭعىلىقتى زەرتتەلدى. سونىمەن بىرگە, قولدانبالى جانە ىرگەلى زەرتتەۋلەردىڭ نەگىزىندە سەراعاڭنىڭ عىلىمي جەتەكشىلىگىمەن جارىق كورگەن «قازاق كوركەم ءسوزىنىڭ شەبەرلەرى», «حح عاسىر ادەبيەتىندەگى تاۋەلسىزدىك يدەياسىنىڭ كوركەم شەشىمى» ءتارىزدى ۇجىمدىق مونوگرافيالار بۇگىنگى تاڭدا قولدان-قولعا ءوتىپ وقىلۋدا.
قازىر ءبىلىم جانە عىلىم مينيسترلىگىنىڭ مەملەكەتتىك گرانتتىق جوبالارى اياسىندا جۇزەگە اسىرىلىپ جاتقان «ۇلتتىق ادەبيەت جانە ەلىمىزدىڭ زياتكەرلىك الەۋەتى» اتتى جوبا نەگىزىندە سوڭعى شيرەك عاسىرداعى قازاق پروزاسى سەراعاڭنىڭ جەتەكشىلىگىمەن زەرتتەلۋ ۇستىندە.
م.اۋەزوۆ اتىنداعى ادەبيەت جانە ونەر ينستيتۋتى شىعارعان «كلاسسيكالىق زەرتتەۋلەر» سەرياسىمەن جاريالانعان كوپ تومدىق ەڭبەكتىڭ 21-تومىنىڭ مازمۇنىن عالىم زەرتتەۋلەرى قۇرادى. مۇندا اباي, ىبىراي, سۇلتانماحمۇت, سپانديار, جۇسىپبەك, ساكەن, ءسابيت ءتارىزدى قازاقتىڭ كورنەكتى اقىن-جازۋشىلارىنىڭ ادەبي پورترەتتەرى مەن «تاۋەلسىزدىك يدەياسى جانە «ۇلتشىلدىق» ادەبيەت», «تاۋەلسىزدىك ءجانە ۇلت-ازاتتىق قوزعالىسىنىڭ قاھارماندارى», «40-50-جىلدار روماندارىنداعى ۇلتتىق يدەيا جانە ۇلتتىق حاراكتەر», «ۇلتتىق تاربيە جانە قازاق ادەبيەتى», «قازاق كەڭەس ليريكاسىنداعى ءتاۋەلسىزدىك رۋحى» ءتارىزدى قاي داۋىردە دە, قاي قوعامدا دا قۇنىن جوعالتپايتىن زەرتتەۋلەرى قامتىلدى.
كەڭەستىك ءداۋىر مەن تاۋەلسىزدىكتىڭ العاشقى شيرەك عاسىرىنىڭ كۋاسى بولعان سەراعاڭ قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى, 50-دەن استام ادەبي سىن كىتاپتارىنىڭ, 20-دان استام وقۋلىقتار مەن وقۋ قۇرالدارىنىڭ, 800-دەن استام ماقالالاردىڭ اۆتورى رەتىندە بەلگىلى. 15 عىلىم دوكتورى مەن 35 عىلىم كانديداتىنىڭ باعىن اشىپ, عىلىمعا جولداما بەردى, ادەبيەتتانۋ عىلىمىندا ءوزىنىڭ مەكتەبىن قالىپتاستىردى.
سەراعاڭنىڭ شەكپەنىنەن شىققان ونداعان, جۇزدەگەن شاكىرتتەرى بۇگىندە تۇلعالى عالىمدار, ايتۋلى ازاماتتار ساناتىندا جۇرگەنى دە اعانىڭ ءبىر مەرەيى ءىسپەتتەس.
اكادەميك سەرىك قيراباەۆ بۇگىنگى تاڭدا دا زامانا ءسوزىن ايتىپ, ەگەمەن ەلىمىزدىڭ ومىرىندە بولىپ جاتقان قۇبىلىستارعا ءوز ءۇنىن قوسىپ وتىرادى. 90 جاستا دا قالامى قولىنان تۇسپەي, ەلباسى ساياساتى جونىندە تولعاقتى وي ايتىپ, ءوز كوزقاراسىن اشىق تا, بۇكپەسىز ءبىلدىرىپ كەلەدى. ابىز اعاعا قاراپ قازاقستان جاستارى وي تۇزەسە ەكەن, بوي تۇزەسە ەكەن دەيمىن...
ءۋاليحان قاليجانوۆ,
م.اۋەزوۆ اتىنداعى
ادەبيەت جانە ونەر ينستيتۋتىنىڭ ديرەكتورى,
فيلولوگيا عىلىمدارىنىڭ دوكتورى,
ۇعا كوررەسپوندەنت-مۇشەسى,
قازاقستاننىڭ ەڭبەك سىڭىرگەن قايراتكەرى