قازاق مەملەكەتتىك پەداگوگيكالىق قىزدار ۋنيۆەرسيتەتىندە «نۇر وتان» پارتياسى فراكتسياسىنىڭ ءمۇشەلەرى – الماتى قالالىق ءماسليحاتىنىڭ ءبىر توپ دەپۋتاتى وقىتۋشى-پروفەسسورلار قۇرامىمەن جانە ستۋدەنتتەرمەن كەزدەستى. كەزدەسۋ بارىسىندا پرەزيدەنت نۇرسۇلتان نازارباەۆتىڭ ەلىمىزدەگى الەۋمەتتىك-ەكونوميكالىق ۇدەرىستەردى رەتتەۋگە بايلانىستى بيلىك قۇرىلىمدارى اراسىنداعى وكىلەتتىكتەردى ءبولۋ تۋرالى ءۇندەۋى تالقىلاندى.
كەزدەسۋدىتاۋەلسىزدىك پارتياسى ساياسي كەڭەسىنىڭ ءمۇشەسى, الماتى قالالىق ءماسليحاتىنداعى دەپۋتاتتىق فراكتسيا مۇشەسى, قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى دينار نوكەتاەۆا اشىپ, وسىنداي قىزۋ تالقىلاۋلار ەڭبەك ۇجىمدارىمەن قاتار, بارلىق جوعارى وقۋ ورىندارىندا ءوتىپ جاتقانىن ايتىپ, ارنايى كەلگەن دەپۋتاتتاردى تانىستىردى.
– مەملەكەت باسشىسىنىڭ كونستيتۋتسيالىق رەفورمالار جاساۋ تۋرالى جاڭا ۇسىنىسى الەمدەگى بولىپ جاتقان ساياسي قۇبىلىستاردىڭ بارلىعىن ەسكەرە وتىرىپ, ءابدەن قورىتىلعان يدەيالار ارقىلى نەگىزدەلگەن شىنايى, بيلىك تارماقتارىن قايتا جاساقتاۋدىڭ ناقتى جوبالارى بولىپ تابىلادى. بۇل قادامدار بيلىكتىڭ باسقارۋ نىساندارىنداعى جۇيەلەردى جاڭعىرتىپ, ونداعى اۋىر قيمىلدايتىن تەتىكتەردى جاڭاشا قوزعالىسقا تۇسىرەتىنى انىق. بۇل شىن مانىسىندەگى ەلدە بولاتىن ناعىز ساياسي قۇرىلىمدىق وزگەرىستەر, – دەدى دينار نوكەتاەۆا.
جيىندا ءسوز العان الماتى قالالىق ءماسليحاتىنىڭ دەپۋتاتتارى – «الماتى اقشامى» گازەتىنىڭ باس رەداكتورى قالي سارسەنباي, «يلداش» تاتار گۋمانيتارلىق دامۋ ورتالىعىنىڭ توراعاسى نۋريا نيازوۆا, «الماتى مەنەدجمەنت جانە قىزمەت كورسەتۋ» كوللەدجىنىڭ ديرەكتورى, الماتى قالاسى اكىمدىگى جانىنداعى ايەلدەر جانە وتباسىلىق-دەموگرافيالىق ساياسات ءجونىندەگى كوميسسيانىڭ ءمۇشەسى روزا باداەۆا, فيلوسوفيا عىلىمدارىنىڭ دوكتورى, قازمقپۋ الەۋمەتتىك-گۋمانيتارلىق ءپاندەر فاكۋلتەتىنىڭ دوتسەنتى ساپار وسپانوۆ, ۋنيۆەرسيتەتتىڭ 3-كۋرس ستۋدەنتى, «پاراساتتى ناعىز ليدەرلەر وداعى» پىكىرتالاس كلۋبىنىڭ ءتورايىمى ىڭكار الماسبەك وزدەرىنىڭ وي-ءپىكىرلەرى مەن ۇسىنىستارىن ءبىلدىرىپ, بۇل تاريحي قۇجات ەلىمىزدىڭ دامۋىنداعى جاڭا كەزەڭنىڭ باستالۋى دەپ باعا بەردى.
– بۇل ۇسىنىستار – قوعامداعى ۇلكەن وزگەرىستەردىڭ باستاماسى عانا ەمەس, ەندىگى جەردە بيلىك تارماقتارىنىڭ قىزمەتىنە دەگەن حالىقتىق باقىلاۋدى كۇشەيتۋ دەگەن ءسوز. دەپۋتاتتار ءوز سايلاۋشىلارى مەن مەملەكەتتىك اپپاراتتىڭ اراسىن بايلانىستىراتىن التىن كوپىر بولسا, ەندى مىنا وزگەرىستەر ەنگىزىلگەن سوڭ, ەلىمىزدەگى بارلىق الەۋمەتتىك, ساياسي, ەكونوميكالىق ۇدەرىستەردىڭ بارلىعىنا قاداعالاۋ جۇرگىزە الاتىن قۇقىقتارعا يە بولاتىنى قۋانتادى. ءماجىلىس دەپۋتاتى كەز كەلگەن مينيستردەن اتقارىلعان ىستەردىڭ ءناتيجەسىن تالاپ ەتۋمەن بىرگە, ونى جاۋاپكەرشىلىككە تارتا الاتىندىعى حالىقتىڭ كوكەيىنەن شىعىپ وتىر, – دەدى ءماسليحات دەپۋتاتى قالي سارسەنباي.
كەزدەسۋ بارىسىندا «نۇر وتان» پارتياسى الماتى قالالىق فيليالىنىڭ ءباسپاسوز حاتشىسى قايىم-مۇنار تابەەۆ 26 قاڭتاردان بەرى بارلىق اۋداندىق فيليالدار مەن باستاۋىش پارتيا ۇيىمدارىندا بەلگىلەنگەن جوسپار بويىنشا ۇندەۋدى تالقىلاۋ ءجۇرىپ جاتقانىن اتاپ ءوتتى. سونداي-اق, ءماسليحات دەپۋتاتتارىنىڭ قاتىسۋىمەن پارتيالىق ءپىكىر الماسۋ الاڭدارىندا, ەڭبەك ۇجىمدارىندا قىزۋ تالقىلاۋلار جالعاسۋدا.
جيىن سوڭىندا ءماسليحات دەپۋتاتتارى دا, وقىتۋشى-پروفەسسورلار قۇرامى مەن ستۋدەنتتەر دە ەلباسىنىڭ بيلىك تارماقتارىنا كونستيتۋتسيالىق وزگەرىستەر ەنگىزۋ تۋرالى ۇندەۋىنە ءبىراۋىزدان قولداۋ ءبىلدىردى.
ساپارباي پارمانقۇلوۆ,
«ەگەمەن قازاقستان»
الماتى