ءبىز, بۇگىنگى اعا ۇرپاق وكىلدەرى, وتكەن عاسىردىڭ 90-جىلدارىندا كەڭەس وداعى اتتى الىپ يمپەريا كۇيرەپ, اتا-بابالارىمىز ارمانداعان ءتاۋەلسىزدىك قولىمىزعا تيگەنىنە ءبوركىمىزدى كوككە اتا قۋانعانىمىزبەن, ەكونوميكاسى تۇرالاپ, اۋىر داعدارىس قىسپاعىندا قالعان ەلىمىزدىڭ ەرتەڭىنە الاڭداپ, بار ءۇمىتىمىزدى سول كەزدە ۇلكەن ساياسات ارەناسىندا جۇلدىزى جارقىراي كورىنگەن حالقىمىزدىڭ ءبىرتۋار ۇلى نۇرسۇلتان نازارباەۆتىڭ ەسىمىمەن بايلانىستىرعان بولاتىنبىز. سول ءبىر قيىن-قىستاۋ كەزەڭدە باسىم كوپشىلىگىمىز ۇلى ابايدىڭ «كوپ شۋىلداق نە تابار, بيلەمەسە ءبىر كەمەل؟!» دەگەن دانا سوزىنە توقتاپ, 1995 جىلعى بۇكىلحالىقتىق رەفەرەندۋمدا ەلىمىزدە كۇشتى پرەزيدەنتتىك بيلىك ورناتۋدى قاراستىرعان جاڭا كونستيتۋتسيانى جاقتاپ داۋىس بەرگەنبىز.
ءبىز قاتەلەسكەن جوقپىز. انتىنا ادالدىق, سەرتىنە بەرىكتىك تانىتقان تۇڭعىش پرەزيدەنتىمىز ءتىرەلگەن تۇيىقتان شىعار جولدى جاڭىلىسپاي تاۋىپ, حالقىمىزدى جوقشىلىقتان مولشىلىققا قاراي جەتەلەي ءبىلدى. كەشە يىعىمىزعا تۇسكەن ءزىل-باتپان اۋىرتپالىق بۇگىندە كورگەن جامان ءتۇستەي بولىپ قانا جادىمىزدا قالدى. جۇرت ەڭبەكاقىسى مەن زەينەتاقىسىن ايلاپ الا الماي, كەدەيشىلىك زارىن تارتقان, قالالىقتار جارىق پەن جىلۋعا جارىماي, سۋىق پاتەرلەرىندە ءبۇرسەڭ قاققان, تاراتىلعان كەڭشارلارداعى تۇراقتى جۇمىستارىنان ايىرىلعان ەر ازاماتتاردىڭ كوبى ەكى قولدارىنا ءبىر كۇرەك تاپپاي, جەرگە قاراعان, ال ايەل-انالار قوراداعى ءبىر-ەكى سيىردان ساۋعان ءسۇتى مەن ودان وندىرگەن مايىن جيناپ, الىس-جاقىن قالالارعا اپارىپ ساتىپ, شيەتتەي بالا-شاعاسىن اسىراۋدى ءوز مويىندارىنا جۇكتەگەن قيلى زاماندى ەسكە الساق, تاۋبەمىزگە كەلىپ, ەلباسىنىڭ قادىرىن ەرەكشە سەزىنە ءتۇسەمىز.
ناپولەوننىڭ: «ەگەر ارىستاندارعا قويدى باسشى قىلىپ قويساڭ, وندا ولار قويشا جۋاسيدى, ال كەرىسىنشە جاساساڭ, قوي ەكەش قويعا دا ارىستاننىڭ جۇرەگى بىتەدى», دەگەن ءسوزى راس. وعان نۇرسۇلتان نازارباەۆتىڭ سوناۋ, ەلىمىزدەگى ەكونوميكالىق داعدارىس ەڭسەمىزدى ءالى دە ەزىپ-جانشىپ تۇرعان 1997 جىلى قابىلداعان «قازاقستان-2030» ستراتەگياسىنىڭ ويداعىداي ءجۇزەگە اسىرىلۋى ايعاق. باسىندا وعان كۇمانمەن قاراعاندار از بولماسا دا, قالىڭ بۇقارا بۋىنى قاتىپ, بۇعاناسى بەكىمەگەن جاس ەلىمىز كەلەشەكتە تۇڭعىش پرەزيدەنتىمىز ايتقانداي, بارىس بەينەلى, ايبارلى دا ازۋلى مەملەكەتكە اينالاتىنىنا كامىل سەندى جانە ەلباسىمىز بيىك مىنبەرلەرگە شىققان سايىن قايتالاپ ايتۋدان جالىقپايتىن باستى قۇندىلىقتار – بىرلىك پەن كەلىسىمنىڭ ارقاسىندا اسۋدان اسۋعا كوتەرىلىپ, العا قويعان ايبىندى ماقساتىنا ون بەس جىلدىڭ ءىشىندە قول جەتكىزدى. ءسويتىپ, الەمدەگى باسەكەگە قابىلەتتى ەلۋ ەلدىڭ قاتارىنا قوسىلىپ, ايدى اسپانعا شىعاردىق.
اۋەلدەن «الدىمەن – ەكونوميكا, سودان سوڭ – ساياسات» قاعيداتىن تەمىرقازىقتاي بۇلجىتپاي ۇستانىپ, جاس ەلىمىزدى شيرەك عاسىر ۋاقىت ىشىندە بۇكىل الەم تانىعان, بەدەلدى دە قۋاتتى مەملەكەتكە اينالدىرا بىلگەن ەلباسى 25 قاڭتاردا حالقىمىزعا ۇندەۋ جولداپ, ەندى ءوز باستاماسى بويىنشا قولعا الىنعان بەس ينستيتۋتتىق رەفورمانى ىسكە اسىرۋعا ارنالعان «100 ناقتى قادام» ۇلت جوسپارى اياسىندا ەلىمىزدە ەلەۋلى ساياسي وزگەرىستەر بولاتىندىعىن مالىمدەدى. «ءبىز ۇسىنىپ وتىرعان رەفورما ەڭ الدىمەن ءوز تاجىريبەمىزگە جانە قازاقستاننىڭ ءوزىنىڭ قاجەتتىلىكتەرىنە ارقا سۇيەيدى. رەفورمالار باعدارلاماسى – ول قازاقستان
قاي باعىتتا جۇرەدى دەگەن ساۋالعا ءبىزدىڭ جاۋابىمىز. جاۋاپ ايقىن ءجانە دايەكتى – دەموكراتيالىق دامۋ جاعىنا قاراي», دەدى مەملەكەت باسشىسى.
ەلباسى ءوزىنىڭ «قازاقستان-2050» ستراتەگياسىندا ايقىنداعان ۇلى ماقسات – الەمدەگى ەڭ دامىعان مەملەكەتتەردىڭ وزىق وتىزدىعىنا ەنۋ ءۇشىن وسىنداي باتىل دا اسا ماڭىزدى ساياسي قادامدار جاساپ, ءوزىنىڭ ءبىرقاتار وكىلەتتىگىن پارلامەنت پەن ۇكىمەتكە بەرگەلى وتىر. ال, بيلىك تارماقتارى اراسىندا وكىلەتتىكتەردى قايتا ءبولۋ – پارلامەنت پەن ۇكىمەتتىڭ ەلىمىزدىڭ الەۋمەتتىك-ەكونوميكالىق دامۋى ءۇشىن جاۋاپكەرشىلىگىن بارىنشا كۇشەيتەتىندىگى ءسوزسىز. ءبىز الداعى ۋاقىتتا پارلامەنتتىك سايلاۋدا جەڭىسكە جەتكەن پارتيا ۇكىمەتتى جاساقتاۋعا شەشۋشى تۇردە ىقپال ەتۋى, ۇكىمەتتىڭ ءوز وكىلەتتىگىن بۇرىنعىداي پرەزيدەنتتىڭ ەمەس, جاڭادان سايلانعان ءماجىلىستىڭ الدىندا توقتاتۋى, ۇكىمەت ءمۇشەلەرىنە پارلامەنت پالاتالارى تاراپىنان سەنىمسىزدىك ءبىلدىرۋ ءتارتىبىن وڭايلاتۋ, ءسويتىپ بيلىكتىڭ زاڭ شىعارۋشى تارماعىنىڭ اتقارۋشى تارماققا باقىلاۋ جاساۋىن كۇشەيتۋ, جەرگىلىكتى اتقارۋشى بيلىككە قاتىستى دا پارلامەنتتىڭ ءرولىن ارتتىرۋ جونىندەگى ۇسىنىستار ەلىمىزدىڭ زاڭ شىعارۋ قىزمەتىن جۇزەگە اسىراتىن ەڭ جوعارى وكىلدى ورگانىنىڭ مارتەبەسىن ايتارلىقتاي كوتەرىپ قانا قويماي, دەپۋتاتتارعا جۇكتەلگەن جاۋاپكەرشىلىكتى دە ەسەلەپ اۋىرلاتاتىنىن سانامىزبەن سالماقتاپ, ۇعىنىپ وتىرمىز. سوعان وراي ءارقايسىمىز ءوزىمىزدىڭ اتقارىپ ءجۇرگەن دەپۋتاتتىق قىزمەتىمىزدى سىني تۇرعىدان تالداپ, ونى جاڭا دا جوعارى تالاپتارعا ساي جەتىلدىرە ءتۇسۋىمىز قاجەت.
ەلباسىنىڭ ءوز بيلىگىنىڭ ەلەۋلى بولىگىن پارلامەنتكە ءوز ەركىمەن بەرۋ جونىندەگى كەمەل دە بىرەگەي شەشىمى ەلىمىزدە پارلامەنتاريزمدى دامىتۋعا ءۇلكەن ۇلەس بولىپ قوسىلارى داۋسىز. تۇپتەپ كەلگەندە, پارلامەنتتىڭ وكىلەتتىكتەرىنىڭ كەڭەيتىلۋى ىسكە اسىرىلىپ جاتقان مەملەكەتتىك باعدارلامالاردىڭ ءتيىمدىلىگىن ارتتىرىپ, بيۋدجەت قارجىسىنىڭ ۇنەمدى دە ۇتىمدى جۇمسالۋىنا, سونداي-اق سىبايلاس جەمقورلىققا قارسى ءىس-قيمىلدى ودان ءارى كۇشەيتۋگە وڭ ىقپالىن تيگىزىپ, ەلىمىزدىڭ الەۋمەتتىك-ەكونوميكالىق دامۋىنا سونى سەرپىن بەرەرى انىق.
ەلباسى ۇسىنعان قيسىندى دەموكراتيالىق وزگەرىستەر ۋاقىت سىنىنان وتكەن كۇشتى پرەزيدەنتتىك بيلىكتى ساقتاي وتىرىپ, بەدەلدى پارلامەنت پەن اشىق ۇكىمەتتى قالىپتاستىرۋ ارقىلى ەلىمىزدى ماڭگىلىك ەل بولۋ جولىمەن ودان ءارى ورلەۋگە باستايتىندىعىنا سەنىمدىمىز.
كارىباي مۇسىرمان,
پارلامەنت ءماجىلىسىنىڭ دەپۋتاتى,
«نۇر وتان» پارتياسى فراكتسياسىنىڭ مۇشەسى