ەلباسىنىڭ ۇندەۋدە ايتىلعان باستامالارى وتە دەر ۋاقىتىندا كوتەرىلىپ وتىر. قازاقستان كونستيتۋتسيا بويىنشا ءوزىن دەموكراتيالىق ەل دەپ جاريالاعان. دەموكراتيالىق باعىتتاعى قادامداردىڭ ءوزى رەت-رەتىمەن جۇرگىزىلۋگە ءتيىس. ونى الدىن الا جوسپارسىز, ءبىردەن جۇزەگە اسىرا سالۋعا بولمايدى.
كوپتەگەن ەلدەردىڭ دەموكراتيامەن وينايمىن دەپ, قوعامدىق تۇراقسىزدىقتارعا ۇشىراعانىن كورىپ وتىرمىز. الىسقا بارماي-اق, قازاقستانعا جاقىن ورنالاسقان, تىعىز بايلانىستاعى مەملەكەتتەردىڭ ىشىندە تەز ارادا باتىس ەۋروپا ەلدەرىندەگى سياقتى دەموكراتيالىق قوعام قۇرامىز دەپ, قارۋلى قاقتىعىستارعا جول بەرىپ العان مەملەكەتتەر بار. سوندىقتان بۇل ماسەلەدە اباي بولىپ, بىرتىندەپ جۇمىس جۇرگىزۋ كەرەك.
قازىر ەلىمىزدىڭ تاۋەلسىزدىك العانىنا 25 جىلدان استى, پرەزيدەنتتىك بيلىك وكىلەتتىگىنىڭ ءبىراز بولىگىن ۇكىمەت پەن پارلامەنتكە بەرەتىن كەز كەلدى. ەلباسى ءدال ۋاقىتىندا بيلىك وكىلەتتىگىن ءبولۋدى قولعا الدى. ءارينە, ۇكىمەت مەملەكەتتىك ماڭىزعا يە ماسەلەلەردى بىردەن شەشە المايدى, ونى پارلامەنتپەن كەلىسە وتىرىپ شەشەدى. سوندىقتان بۇل جەردە اپەرباقاندىقپەن شەشىم قابىلدانىپ كەتەتىن جاعدايلار بولمايدى. پارلامەنتتەگى حالىق اتىنان سايلانعان دەپۋتاتتار, پارتيالار ونى الدىمەن تالقىلاپ, ەگجەي-تەگجەيلى تەكسەرىپ, سىناقتان ءوتكىزگەننەن كەيىن عانا ناقتى شەشىم قابىلدانادى. بۇل – وتە جاقسى ءۇردىس.
تاۋەلسىزدىكتىڭ جيىرما بەس جىلدىعىندا قازاقستانىڭ بەدەلى كوتەرىلدى. وسى ۋاقىتتا پرەزيدەنتتىك بيلىكتىڭ دەر ۋاقىتىندا جىلدام شەشىمدەردى ءجۇزەگە اسىرعانى ەلىمىزدىڭ ەكونوميكالىق تۇرعىدا دامۋىنا زور ۇلەسىن قوستى. ءار نارسەنىڭ ۋاقىتى بولادى, سول مەزەتتە جاسالعان قادامدار جەمىسىن بەرەدى, ۋاقىتىن وتكىزىپ الساق, ءومىردىڭ سول تۇستاعى ءۇردىسىنە كەلمەۋى مۇمكىن. قازىر وسىنى جەتە تۇسىنگەن ەلباسى ءبىراز وكىلەتتىكتەردى ۇكىمەت پەن پارلامەنتكە بەرۋدى ءجون كورىپ وتىر.
قازاقستان – قازىر ەكونوميكاسى تۇراقتى, ورنىقتى دامۋعا بەت العان مەملەكەت. سوندىقتان كونستيتۋتسيالىق رەفورمالارعا سوزىلىپ كەتەتىن ۇدەرىس دەپ قاراۋعا بولمايدى, وعان قورقىنىشپەن قاراۋدىڭ دا رەتى جوق. ءبىزدىڭ ۇكىمەتىمىز دە, پارلامەنتىمىز دە تالاي سىناقتاردان ءوتىپ, تاجىريبە جيناقتادى. قازىرگى جاعدايدا ماڭىزدى دەگەن مەملەكەتتىك باسقارۋ وكىلدىكتەرىن ولار تابىستى اتقارۋعا تولىقتاي قابىلەتتى.
سوڭعى شيرەك عاسىر ىشىندە قازاقستان ۇلكەن جەتىستىكتەرگە قول جەتكىزدى. ەقىۇ-عا توراعالىق جاسادى, شانحاي ىنتىماقتاستىق ۇيىمىنىڭ, ەۋرازيالىق ەكونوميكالىق وداقتىڭ بەلسەندى مۇشەسى بولدى. 2017 جىلدان باستاپ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى. مۇنىڭ بارلىعى قازاقستاننىڭ جان-جاقتى جەتىلگەن, الەم ەلدەرىمەن تەرەزەسى تەڭ, دامىعان مەملەكەت ەكەندىگىنىڭ ايقىن دالەلى. كونستيتۋتسيالىق رەفورما, تۇپتەپ كەلگەندە, تاۋەلسىزدىگىمىزدى نىعايتا ءتۇسەدى. ەلباسى وسى باعىتتاعى وتە دۇرىس شەشىمدەردى قولعا الدى دەپ سانايمىن.
مۇرات جۇرىنوۆ,
ۇلتتىق عىلىم اكادەمياسىنىڭ پرەزيدەنتى