وتاندىق عالىمدار بيداي مەن ارپانىڭ قۋاڭشىلىققا ءتوزىمدى سۇرپىن ءوسىرۋدى ويلاستىرىپ جاتىر.
ولار اۆستراليا اۋىل شارۋاشىلىعىنىڭ وزىق ءتاسىلىن ەنگىزبەك. سونداي-اق, ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ماماندارى كارتوپقا تۇسەتىن قوزدىرعىشتىڭ تۇرلەرىن انىقتاۋدى قولعا العان.
ەلىمىزدەگى اۋىل شارۋاشىلىعى سالاسىنىڭ ماماندارى بيدايدىڭ ءبىر سورتىن شىعارۋعا ونداعان ءتىپتى 20 جىلىن سارپ ەتەدى ەكەن. بۇل مەرزىمدى قىسقارتۋدىڭ ءتيىمدى جولىن كوكتەمنەن باستاپ جۇزەگە اسىرماق. الەمنىڭ مەن دەگەن اۋىل شارۋاشىلىق ۋنيۆەرسيتەتىنەن تاجىريبە العان سالا ماماندارى ءداندى-داقىلداردىڭ بىرنەشە تۇرىنە تالداۋ جۇرگىزگەن.
"سولتۇستىك قازاقستاننىڭ قۋاڭ كليماتتىق اۋداندارىنا ارنالعان قۇرعاقشىلىققا شىدامدى, ونىمدىلىگى جوعارى سۇرىپتاردى شىعارۋ - ءبىزدىڭ ماقساتىمىز. وتاندىق سەلەكتسيونەرلەرگە جاردەمدەسۋ", - دەيدى ەگىنشىلىك جانە ديحانشىلىق كافەدراسىنىڭ اعا وقىتۋشىسى ساتىبالدى جوتاەۆ.
ءداندى داقىلداردىڭ ونىمدىلىگى جاقسى بولۋ ءۇشىن وعان تۇسكەن ۆيرۋستىق دەرتتى ەرتە انىقتاۋ ماڭىزدى. وسى تۇرعىدا ۋنيۆەرسيتەت عالىمدارى ەلىمىزدىڭ ءار وڭىرىندە وسىرىلەتىن كارتوپتا كەزدەسەتىن اۋرۋ تۇرلەرىن انىقتاپ, ارنايى بانك قۇرعان.
"كارتوپتىڭ ۆيرۋستىق اۋرۋلارىن انىقتايتىن دياگنوستيكالىق تەست جۇرگىزەمىز. بۇرىندارى شەتەلدىڭ ءتاسىلدى قولداناتىنبىز. قازىر وتاندىق دياگنوستيكالىق تەستى پايدالانامىز. وسى ارقىلى كارتوپتىڭ جاپىراعىنا, تامىرىنا نەمەسە ونىمىنە تۇسكەن دەرتتى انىقتاي الامىز. بۇل دەگەنىمىز ونىمدىلىكتىڭ ارتۋىنا كەپىلدىك بەرەدى", - دەيدى كارانتيندىك وسىمدىكتەر كافەدراسىنىڭ وقىتۋشىسى ۆاديم حاسانوۆ.