Qazkom دامۋ قورىنىڭ بەس جاڭا ارنايى باعدارلامالاردىڭ نەگىزگى وپەراتورى رەتىندە استانا مەن الماتىنىڭ شاعىن جانە ورتا كاسىپكەرلەرىنە نەسيە بەرە باستادى.
بۇل باعدارلامالاردى ءىس-جۇزىنە اسىرۋ ءۇشىن دامۋ قورىمەن بولىنگەن 5 ملرد تەڭگەنىڭ 3,7 ملرد تەڭگەگە جۋىعى قازكوممەرتسبانكتىڭ كليەنتتەرىنە بەرىلەتىن بولادى, دەپ ءمالىم ەتتى بانكتىڭ ءباسپاسوز قىزمەتى. بۇل قاراجات بانككە 7 جىلدىق مەرزىمگە اقىلى ءارى قايتارىلمالى تۇردە بەرىلدى.
اتالعان باعدارلامالاردىڭ ەرەكشەلىگى بيزنەستىڭ جاڭا باعىتتارى - «ستارتاپتار», يننوۆاتسيالىق, عىلىمي جانە تەحنولوگيالىق شەشىمدەر, سونداي-اق ءىرى مەگاپوليستەر ءۇشىن ماڭىزدى بولىپ تابىلاتىن جوبالار – وڭدەۋ جانە تاماق ونەركاسىبى, سەرۆيس جانە ينفراقۇرىلىم سالالارى قارجىلاندىرىلادى.
«ءبىز وتكەن جىلى بانكتىڭ جاڭا ستراتەگياسىن قابىلداپ, باستى نازاردى شوب جانە جەكەلەگەن كليەنتتەرگە باعىتتاعانىمىزدى جاريالانعان ەدىك. مىنە سودان باستاپ, ءبىز وتكەن جىلى شاعىن جانە ورتا بيزنەستى بەلسەندى تۇردە قارجىلاندىرا باستادىق. قازىردىڭ وزىندە بۇل جۇمىستار ءوز جەمىسىن بەرە باستادى: كاسىپكەرلەر Qazkom-دى قولداۋ كورسەتۋشى جەتەكشى بانك رەتىندە قابىلداي باستادى, ال مەملەكەت الماتى مەن استانا ءۇشىن ماڭىزدى باعدارلامالاردى قارجىلاندىرۋعا نەگىزگى كولەمدى سەنىممەن تاپسىردى», - دەدى ءوز سوزىندە بانك باسقارماسى توراعاسىنىڭ ءبىرىنشى ورىنباسارى اباي يسكانديروۆ.
«دامۋ» كاسىپكەرلىكتى قولداۋ قورى شوب-تى قولداۋعا باعىتتالعان جاڭا بەس باعدارلامانى ءىس-جۇزىنە اسىرۋ ماقساتىندا Qazkom-عا 2,7 ملرد تەڭگە كولەمىندە ءبىرىنشى ترانشتى اۋداردى. وسى سومانىڭ 900 ملن تەڭگەسى «الماتى-ءونىم» باعدارلاماسىن ىسكە اسىرۋعا باعىتتالادى. «الماتى-ءونىم» باعدارلاماسى تاماق ونىمدەرى, ۋىتتى وندەۋ, مينەرالدى سۋ جانە وزگە دە الكوگولسىز سۋسىنداردىڭ وندىرىسىمەن اينالىساتىن الماتىلىق كاسىپكەرلەرگە ارنالعان.
ال 250 ملن تەڭگە كولەمىندەگى ترانش «استانا Start Up» باعدارلاماسى بويىنشا ءوز ءىسىن جاڭادان باستاعان جانە ءتۇرلى سالالار بويىنشا جۇمىس ىستەيتىن استانالىق كاسىپكەرلەردى قارجىلاندىرۋعا ارنالىپ وتىر.
«الماتى تۋريزم» باعدارلاماسىن دامىتۋعا Qazkom 1,3 ملرد تەڭگەنى الدى. بۇل قاراجات كادەسىي تاۋارلارىن وندىرەتىن, قوناقۇي بيزنەسىمەن, اكىمشىلىكتىك جانە قوسىمشا قىزمەت كورسەتۋمەن اينالىساتىن, ونەر, ويىن-ساۋىق جانە دەمالىس سالاسىندا جۇمىس ىستەيتىن الماتىلىق كاسىپكەرلەرگە بەرىلمەك.
«استانا بيزنەس» دەپ اتالاتىن باعدارلاماسى بولشەك ساۋدامەن (اۆتوكولىكتەن باسقاسى), رەستوران بيزنەسىمەن جانە تاماق ونىمدەرىن جەتكىزۋمەن اينالىساتىن سولتۇستىك استانانىڭ كاسىپكەرلەرىن قولداۋعا باعىتتالادى. سونداي-اق ءتۇرلى سالالارعا فرانچايزينگتى ساتىپ الۋ دا قارجىلاندىرىلادى. بۇل باعدارلاماعا بانككە 250 ملن تەڭگە بولىنەتىن بولادى.
ال كومپيۋتەر ءوندىرىسى, ەلەكتروندىق جانە وپتيكالىق تاۋارلار, كاسىبي, عىلىمي جانە تەحنيكالىق ىسپەن اينالىساتىن الماتىلىق كاسىپكەرلەردىڭ جوبالارىنا «الماتى-يننوۆاتسيالار» باعدارلاماسى بويىنشا قاراجات جاقىن ارادا بانككە تۇسەتىن بولادى. بۇل باعدارلامانى ءىس-جۇزىنە اسىرۋعا Qazkom-عا 1 ملرد تەڭگە كولەمىندە قاراجات بولىنگەن.
قازكوممەرتسبانك اتالعان باعدارلامالاردى ەگجەي-تەگجەيلى ءتۇسىندىرۋ ءۇشىن كاسىپكەرلەرگە ارنايى تۇسىنىكتەمە جۇمىستارىن جۇرگىزۋگە دايىن.