باس پروكۋرور جاقىپ اسانوۆتىڭ توراعالىق ەتۋىمەن زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ كەزەكتى وتىرىسى ءوتتى.
شارادا قۇقىق قورعاۋ ورگاندارى جەكە قۇرامىنىڭ سىبايلاس جەمقورلىققا قارسى زاڭنامانى جانە مەملەكەتتىك قىزمەتشىلەردىڭ ادەپ كودەكسىن ساقتاۋى ماسەلەلەرى جان-جاقتى تالقىعا ءتۇستى. وتىرىستى اشقان باس پروكۋرور ج.اسانوۆ ەلباسىنىڭ كاسىبي اپپاراتتى قالىپتاستىرۋ بويىنشا رەفورماسىنىڭ ماڭىزدىلىعىنا توقتالىپ, بۇل باعىتتا قۇقىق قورعاۋ ورگاندارىمەن وراسان زور جۇمىستار جۇزەگە اسىرىلۋدا ەكەندىگىن اتادى. باس پروكۋرور جەكە قۇرام اراسىندا كادرلاردى ىرىكتەۋ جۇيەسىنىڭ اشىقتىعى, وبەكتيۆتىلىگى قامتاماسىز ەتىلۋدە, باسشىلىق قۇرامدى تاعايىنداۋدىڭ تاسىلدەمەسى وزگەرىپ, قىزمەتكەرلەردى دايارلاۋدىڭ تەتىكتەرى جەتىلدىرىلۋدە ەكەندىگىن ايتتى.
بۇدان كەيىن ءسوز العان اگەنتتىك توراعاسى قايرات قوجامجاروۆ جەمقورلىققا قارسى كۇرەس ماسەلەسى وزەكتى ەكەندىگىن باسا ايتتى. سونداي-اق, ول زاڭدىلىق پەن ادىلدىك, كاسىبي دەڭگەي مەن ادەپتىلىك قاسيەتتەرىنىڭ ارقاسىندا عانا حالىقتىڭ ءتارتىپ ساقشىلارىنا سەنىمى ارتىپ وتىرعاندىعىن العا تارتتى. جالپى, قۇقىق قورعاۋ جۇيەسىندەگى ءجۇرگىزىلىپ جاتقان رەفورمالاردان قوعام ۇلكەن وزگەرىستەر كۇتۋدە. بۇل باعىتتاعى نەگىزگى باسىمدىقتار «100 ناقتى قادام» ۇلت جوسپارىندا ايقىندالعان. «ءبىر جاعىنان قۇقىق قورعاۋشىلار قاتارىنا جوعارى دەڭگەيلى كاسىبي مامانداردىڭ كەلۋىن قامتاماسىز ەتۋ قاجەت. ولار كونستيتۋتسيالىق قۇرىلىس پەن قوعامدىق ءتارتىپتى, قاۋىپسىزدىكتى ساقتاۋدى قامتاماسىز ەتۋگە مىندەتتى جانە جەمقورلىقتان تازا بولىپ, ازاماتتاردىڭ سەنىمىن تۋدىرۋلارى ءتيىس», – دەدى قايرات پەرنەش ۇلى.
اگەنتتىك توراعاسى قازىرگى كەزدە وسىنى تولىعىمەن جۇزەگە اسىرۋعا الەمدىك تاجىريبەدە بەيىندەلگەن قۇرالدار جەتكىلىكتى ەكەندىگىن ايتتى. اتاپ كورسەتكەندە, پوليگراف, كاسىبي جانە جەكە باس بىلىكتىلىگىن انىقتاۋعا ارنالعان تەستتەر, سىبايلاس جەمقورلىققا قارسى شەكتەۋلەر مەن مىندەتتەمەلەر, ىشكى قاۋىپسىزدىك بولىمشەلەرىنىڭ جۇمىسى. بۇدان باسقا, اگەنتتىك باسشىسى جاس قىزمەتكەر جەكە باسىن بايىتۋ ءۇشىن لاۋازىمدىق وكىلەتتىگىن قولدانۋ تۋرالى ويمەن قىزمەتكە تۇسپەۋى كەرەكتىگىنە ەكپىن بەردى. ق.قوجامجاروۆتىڭ پايىمىنشا, ءاربىر قىزمەتكەر قۇقىق قورعاۋ جۇيەسىندەگى قىزمەتىن ادال جانە ەڭبەگىنە لايىق لاۋازىمدىق ساتىمەن جىلجي الاتىنداي ەتىپ قۇرۋى كەرەك.
اسقار تۇراپباي ۇلى,
«ەگەمەن قازاقستان»
باس پروكۋرور حالىقارالىق ترانسپەرەنسي ينتەرنەشنل ۇيىمىنىڭ مالىمەتتەرىنە سۇيەنە وتىرىپ, 1,5 مىڭ اداممەن ساۋالداما جۇرگىزىلگەندىگىمەن ءبولىستى. كەلتىرىلگەن مالىمەتكە قاراعاندا, ساۋالداما جۇرگىزىلگەندەردىڭ 37 پايىزى سىبايلاس جەمقورلىقپەن كۇرەستە العا جىلجۋشىلىق بار ەكەندىگىن مالىمدەپ, ءتيىستى ورگاندار بەلسەندى ارەكەتكە كوشە باستاعاندىعىن اتاپ كورسەتىپتى.
تالقىلاۋ بارىسىندا بىرقاتار جايتتار ورتاعا سالىندى. وتىرىس قورىتىندىسى بويىنشا ءتارتىپتى نىعايتۋ, جەكە قۇرام اراسىندا سىبايلاس جەمقورلىقتى ازايتۋ جانە قۇقىق قورعاۋ ورگاندارىنا حالىقتىڭ سەنىمىن ارتتىرۋ ماقساتىنداعى جول كارتاسى قابىلداندى.