بيىل مەملەكەتتىك سوت ورىنداۋشىلاردىڭ سانى 30 پايىزعا قىسقارتىلدى. بۇل تۋرالى ورتالىق كوممۋنيكاتسيالار قىزمەتىندە «ۇلت جوسپارىنىڭ 27-قادامى اياسىندا زاڭ ۇستەمدىگىن قامتاماسىز ەتۋ» تاقىرىبىندا وتكەن ءباسپاسوز ءماسليحاتىندا ادىلەت مينيسترلىگى سوت اكتىلەرىن ورىنداۋ دەپارتامەنتى ديرەكتورىنىڭ مىندەتىن اتقارۋشى ەرنار ىبىراەۆ ءمالىم ەتتى.
ونىڭ ايتۋىنشا, 2016 جىلدىڭ قاڭتارىنان باستاپ جەكە سوت ورىنداۋشىلاردىڭ قۇزىرەتىنە مەملەكەتتەن ءوندىرۋ, مەملەكەت پايداسىنا 1000 اەك-تەن استام (2 ملن 120 مىڭ تەڭگەگە جۋىق) سومانى ءوندىرۋ, مەملەكەت ءمۇددەسىن كوزدەيتىن جەر ۋچاسكەلەرىنەن كوشىرۋ, ۇيلەردى بۇزۋ, جەر ۋچاسكەلەرىن الىپ قويۋدى قوسپاعاندا, وزگە اتقارۋشىلىق قۇجاتتاردىڭ بارلىق ساناتتارىن ورىنداۋ بەرىلدى.
«قازىرگى تاڭدا جەكە سوت ورىنداۋشىلاردىڭ سانى 1348 ادامدى قۇرايدى, ولاردىڭ كومەكشىلەرىن قوسقاندا, جەكە سوت ورىنداۋ جۇمىستارىنا 4 مىڭعا جۋىق ادام جۇمىلدىرىلعان, – دەپ اتاپ ءوتتى ە. ىبىراەۆ. – بيىل مەملەكەتتىك سوت ورىنداۋشىلار سانى 30%-عا قىسقارتىلدى. سونداي-اق, 2017 جىلى ولاردىڭ تاعى 30%-ىن جانە 2018 جىلى 15%-ىن قىسقارتۋ جوسپارلانىپ وتىر. ناتيجەسىندە 518 عانا مەملەكەتتىك سوت ورىنداۋشىنى قالدىرۋ كوزدەلۋدە».
ايتا كەتەيىك, 2016 جىلى جەكە سوت ورىنداۋشىلار ءوندىرىسىندە 2 ملن-عا جۋىق اتقارۋ ءوندىرىسى بولدى, بۇل مەملەكەتتىك سوت ورىنداۋشىلاردىڭ كورسەتكىشىنەن 1,2 ملن-عا ارتىق. الدىن الا ەسەپتەر بويىنشا, جىل سايىن شامامەن 550 ملن تەڭگە ۇنەمدەلىپ, 250 ملن تەڭگەگە جۋىق قاراجات الەۋمەتتىك ماڭىزدى ساناتتار بويىنشا جەكە سوت ورىنداۋشىلارىن قارجىلاندىرۋعا باعىتتالاتىن بولادى.
«قابىلدانعان شارالاردىڭ ناتيجەسىندە جەكە سوت ورىنداۋشىلار ينستيتۋتىنىڭ بەرىك نەگىزى قۇرىلىپ, تەك جەكە ورىنداۋعا ءوتۋ مۇمكىندىگى تۋىندايدى», – دەدى ول ءسوزىنىڭ سوڭىندا.
ايدار ورىسباەۆ,
«ەگەمەن قازاقستان»