گەننادي گولوۆكيننىڭ جاتتىقتىرۋشىسى ابەل سانچەس قازاقستاندىق بوكسشىعا لايىقتى قارسىلاس بولا الاتىن سپورتشىلاردىڭ ءتىزىمىن اتادى. بۇل تۋرالى vesti.kz حابارلادى.
«وسىعان دەيىن ايتقانىمداي, 154 فۋنت سالماقتان 168-گە دەيىن كوتەرىلگەن كەز كەلگەن بوكسشى گولوۆكينگە 12 راۋند قارسى تۇرا المايدى. بالكىم, اندرە ۋوردتى, حۋليو سەزار كىشى چاۆەستى, كارل فورچتى نوكاۋتپەن جەڭە الماس, بىراق قالعاندارى لايىقتى تۇردە جۇدىرىقتاسا المايدى. بۇل ۇشەۋىنىڭ دەنەسى دە ءىرى, وزىندىك ستيلدەرى دە قالىپتاسقان. ال وزگەلەرى كەزدەسۋدى سوڭىنا دەيىن جەتكىزە الادى دەگەنگە ءوز باسىم سەنە قويمايمىن», – دەدى سانچەس.
ول سونداي-اق, الەمدىك ارەنادا اتى شىققان كوپتەگەن بوكسشىلاردىڭ گولوۆكيندى جەكپە-جەككە شاقىرعانمەن, ءىس جۇزىنە كەلگەندە بۇل پىكىرلەرىنەن اينىپ جاتاتىندىعىن اتاپ ءوتتى.
«نيەت تانىتقان بوكسشىلارمەن جەكپە-جەك وتكىزۋ عانا قولىمىزدان كەلەدى. كوبى گەننادي جايلى بىلاپىت سوزدەر ايتقانمەن, توم لەففلەرگە (GGG-ءدىڭ پروموۋتەرى) قوڭىراۋ شالۋعا ەشكىمنىڭ جۇرەگى داۋالامايدى. Facebook, twitter ارقىلى كەزدەسۋ ۇيىمداستىرۋدىڭ ورنىنا ءىس جۇزىندە كورسەتۋى ءتيىس. گولوۆكين كىمگە بولسىن قارسى تۇرۋعا دايىن», – دەدى ول.
ايتا كەتەيىك, 2017 جىلدىڭ 18 ناۋرىزىندا نيۋ-يورك قالاسىندا گولوۆكين مەن امەريكالىق دەنيەل دجەيكوبس جۇدىرىقتاسادى.