استانادا بۇرقاسىن, قار جانە كوكتايعاق. سينوپتيكتەر الداعى ءۇش كۇن بويى قاتتى جەل سوعاتىنىن بولجاپ وتىر.
«قازگيدرومەت» ورتالىعىنىڭ حابارلاۋىنشا, 21 جەلتوقساندا استانادا كوشپەلى بۇلت شىعىپ, وقتىن-وقتىن قار جاۋادى. تۇندە جانە تاڭەرتەڭ بۇرقاسىن بولادى. وڭتۇستىك-باتىستان سوققان جەل سولتۇستىك-شىعىسقا اۋىسىپ, جىلدامدىعى 9-14 م/س جەتەدى, تۇندە جانە تاڭەرتەڭ 15-20 م/س دەيىن كۇشەيەدى. ال سىناپ باعاناسى تۇندە -13...-15°س دەيىن تومەندەيدى.
22 جەلتوقساندا دا وسىنداي اۋا رايى ساقتالادى, كۇن بۇلتتى, وقتىن-وقتىن قار جاۋادى, بۇرقاسىن تۇرادى. وڭتۇستىك-شىعىستان 9-14 م/س جىلدامدىقپەن سوققان جەل 15-20 م/س دەيىن كۇشەيەدى. اۋا تەمپەراتۋراسى تۇندە -22...-24°س, كۇندىز -12...-14°س.
23 جەلتوقساندا كوشپەلى بۇلت شىعادى, وقتىن-وقتىن قار جاۋادى, بۇرقاسىن تۇرادى. 15-20 م/س جىلدامدىقپەن جەل سوعادى, اۋا تەمپەراتۋراسى تۇندە -31...-33°س, كۇندىز -21...-23°س.
وسى ۋاقىتتا ەلوردانىڭ كوممۋنالدىق قىزمەتتەرى كۇشەيتىلگەن رەجىمدە جۇمىس ىستەۋدە. وتكەن تاۋلىكتە, 20-21 جەلتوقساندا قالا بويىنشا 2 093 ارنايى تەحنيكا جۇمىس ىستەدى. قالانى قار مەن مۇزدان سانيتارلىق تازارتۋعا 2 524 جول جۇمىسكەرى تارتىلدى. 634 ت. م قۇم-تۇز قوسپاسى, 29,5 توننا «ايسمەلت» رەاگەنتى سەبىلدى. 42 980 ت. م قار جينالدى, دەپ حابارلادى استانا اكىمدىگىنىڭ ءباسپاسوز قىزمەتى.
استانا قالاسى توتەنشە جاعدايلار دەپارتامەنتىنىڭ حابارلاۋىنشا, جەلدىڭ كۇشەيۋىنە جانە جولدىڭ ناشار كورىنۋىنە بايلانىستى حالىقارالىق تاسجولدار مەن رەسپۋبليكالىق ماڭىزداعى ماگيسترالداردا ەنگىزىلگەن شەكتەۋ ساقتالۋدا.