پرەزيدەنتىمىز: «بولاشاقتا ۇلتتىڭ تابىستى بولۋى ونىڭ تابيعي بايلىعىمەن ەمەس, ادامدارىنىڭ باسەكەلىك قابىلەتىمەن ايقىندالادى», دەگەن بولاتىن. بۇل ۇلتتىق ۇستانىم بولۋى ءتيىس. ءاربىر قازاقستاندىق مەملەكەتتىك ءتىلدى جەتىك مەڭگەرىپ, اعىلشىن, ورىس تىلدەرىنە باسا نازار اۋدارۋى كەرەك, سونىمەن قاتار, قازىرگى زامان تالابىنا ساي وزىق تەحنولوگيالاردى يگەرۋ, ەڭ باستىسى, مادەني بولمىسىمىزدى جاڭعىرتۋ ءاربىر قازاقستاندىقتاردىڭ ءتول مىندەتى بولماق. بۇل – بولاشاقتىڭ كىلتى.
باعدارلامالىق ماقالادا «پراگماتيزم − ءوزىڭنىڭ ۇلتتىق جانە جەكە بايلىعىڭدى ناقتى ءبىلۋ, ونى ۇنەمدى پايدالانىپ سوعان سايكەس بولاشاعىڭدى جوسپارلاي الۋ, ىسىراپشىلدىق پەن استامشىلىققا داڭعويلىق پەن كەردەڭدىككە جول بەرمەۋ» – دەپ, ەلباسىمىز ءدوپ ايتقان. راسىندا, ءبىزدىڭ قوعامىمىزدا دا كۇندەلىكتى تۇرمىسىمىزدا قول جەتكەن تابىستارعا توقمەيىلسۋ, ماساتتانۋ, كەۋدەمسوقتىق ارەكەتتەردىڭ قۇبىلىستارىن, استا-توك ىسىراپشىلدىقتىڭ بولىپ جاتقانىن كۇن سايىن كەزدەستىرىپ ءجۇرمىز. سوندىقتان, قاي-قايسىمىز دا «اسقاندى دا كورگەنبىز, تاسقاندى دا كورگەنبىز, اسىپ-تاسىپ اقىرى ساسقاندى دا كورگەنبىز», دەگەن حالىقتىق ناقىلدى ەستەن شىعارماعانىمىز ابزال.
پرەزيدەنت اتاپ كورسەتكەندەي, «رۋحاني جاڭعىرۋ تەك بۇگىن باستالعان جۇمىس ەمەس». كەڭەس وكىمەتىنىڭ سولاقاي ساياساتىنىڭ كەسىرىنەن قازاق حالقى تىلىنەن, دىنىنەن, دىلىنەن, ۇلتتىق سانا-سەزىمىنەن تۇگەلدەي ايىرىلىپ قالا جازدادى. كەڭەستىك بيلىك قازاق حالقىن تاريحسىز حالىق جاساۋدى كوزدەدى. تاۋەلسىزدىكتىڭ ارقاسىندا عانا ولگەنىمىز ءتىرىلىپ, وشكەنىمىز جاندى. تاۋەلسىزدىك كەزەڭىندە بۇل باعىتتا بىرنەشە اۋقىمدى ىستەر اتقارىلدى.
پرەزيدەنتتىڭ ەلىمىزدىڭ لاتىن قارپىنە كوشۋىن ەرتەرەك قولعا الىپ, دايىندىق جۇمىستارىن تەزىرەك جۇرگىزۋ قاجەتتىلىگى تۋرالى ۇكىمەت پەن عالىمدارعا بەرگەن تاپسىرماسى دا وتە قۇپتارلىق ءىس. ءبىزدىڭ ويىمىزشا, تاۋەلسىزدىكتىڭ العاشقى جىلدارى ەلتاڭبا, ءانۇران, تۋ, اتا زاڭىمىزدى قابىلداعانىمىز, كەيىنىرەك ەلوردانى الماتىدان استاناعا كوشىرۋىمىز سەكىلدى, بۇل دا قازاق حالقى ءۇشىن سانانى جاڭعىرتۋدىڭ ءبىر تەتىگى بولىپ تابىلادى. سونىمەن بىرگە, لاتىن قارپىنە كوشۋ ارقىلى تۇركى الەمىمەن بىرىگۋىمىزگە, جاھاندىق وركەنيەتكە كىرىگۋىمىزگە جول اشىلا تۇسەدى.
الايدا, ەلىمىزدە باعا جەتپەس ۇزدىك تۋىندىلاردى ءوز ىشىمىزدە جوعارى دەڭگەيدە تانىپ, ناسيحاتتاعانىمىزبەن, الەم حالقى بەيحابار قالىپ كەلەدى. اتالعان ماقالاسىندا نۇرسۇلتان ءابىش ۇلى ماڭگىلىك ەلدى ادەبي, مادەني جاۋھارلاردى سۇرىپتاپ, ونى وزگە ەلدەرگە تانىتۋ ماقساتىن العا قويىپ وتىر. وسى جولدا «جاھانداعى زاماناۋي قازاقستاندىق مادەنيەت», «قازاقستانداعى 100 جاڭا ەسىم» سىندى جوبالاردى ۇسىنىپ, ەلدىڭ رۋحاني جادىگەرلەرىن ساقتاپ, ناسيحاتتاۋ مىندەتى تۋىندايدى. قازاقستاننىڭ «كيەلى جەرلەرىنىڭ گەوگرافياسىن» جاساۋ ەلتانىم عانا ەمەس, مادەني-تاريحي ورىندارىمىزدىڭ كوركەيۋىنە, ءتۋريزمنىڭ دامۋىنا جول اشاتىنى ءسوزسىز. ال «جاھانداعى زاماناۋي قازاقستاندىق مادەنيەت» جوباسى ۇلتتىق ادەبيەتىمىز بەن ونەرىمىزدىڭ وزىق ۇلگىلەرىن زەرتتەۋگە, جاريالاۋعا مۇمكىندىك بەرەدى.
«تۋعان جەر» اتتى باعدارلاما قابىلداۋدى ۇسىنعان ەلباسى ءاربىر وتانداسىمىزدىڭ, جاستاردىڭ پاتريوتتىق سەزىمىن ارتتىرۋ ءۇشىن ايماقتاردا ولكە تاريحىن كەڭىنەن ناسيحاتتاپ, تۋعان جەرىنە كومەك قولىن سوزىپ جۇرگەن جاندارعا قۇرمەت كورسەتۋ جولدارىن قاراستىرۋ قاجەتتىگى ەسكەرىلگەن. «وسەر ەلدىڭ بالاسى ءبىرىن-ءبىرى باتىر دەر...» دەگەندەي, ەلگە تانىمال تۇلعالارىمىزدى قادىرلەپ, ولكە تاريحىن زەرتتەۋگە, زەردەلەۋگە كوپ كوڭىل ءبولۋىمىز كەرەك.
ەلباسىنىڭ باعدارلامالىق ماقالاسى قازىرگى زامانعى قازاقستاننىڭ ستراتەگيالىق باعىت مۇددەلەرىن ايقىندايتىن جاڭا يدەولوگيالىق تۇجىرىمداما بولىپ تابىلادى.
«مەن بارشا قازاقستاندىقتار, اسىرەسە, جاس ۇرپاق جاڭعىرۋ جونىندەگى وسىناۋ ۇسىنىستاردىڭ ماڭىزىن تەرەڭ تۇسىنەدى دەپ سەنەمىن», دەپ ەلباسى ايتىپ وتكەندەي, ەلىمىزدىڭ بولاشاعى جاستاردىڭ قولىندا, وسكەلەڭ ۇرپاققا ەلباسىنىڭ دا ارتار سەنىمى مول. ەندەشە, سول سەنىمنەن شىعا بىلەيىك.
ايگەرىم ەسپەنوۆا, م.و.اۋەزوۆ اتىنداعى ادەبيەت جانە ونەر ينستيتۋتىنىڭ كىشى عىلىمي قىزمەتكەرى