تۇرعىن ءۇي قۇرىلىسىندا توقىراۋ جوق

ەگەمەن ەلىمىزدىڭ مەرەيىن تاعى ءبىر ەڭسەلى بيىككە كوتەرگەن ەلوردا مەرەكەسى ەرەن وقي­عالارمەن ەرەكشەلەنىپ ءوتتى. قاناتىن كەڭ جايىپ, ءسانى مەن ساۋلەتى جاراسقان استانانىڭ كۇننەن-كۇنگە قۇلپىرىپ, تۇلەي تۇرلەنگەنىنە تاڭدانبايتىن ەل, تامسانبايتىن ادام قال­مادى. ەلباسى نۇرسۇلتان نازارباەۆتىڭ تاۋەكەلشىل باستاما­سىمەن ومىرگە كەلگەن ەلىمىزدىڭ باس قالاسى عاسىرلار توعىسىنداعى الىپ قۇرىلىس الاڭىنا اينالعانى اقيقات. الەمدەگى دامىعان ەلدەردىڭ وزىندە قۇ­رى­لىس يندۋسترياسىن تۇرالاتىپ, قۋاتتى ەكونو­ميكالاردى رەتسەسسياعا ۇشىراتقان جاھاندىق قارجى داعدارىسى كەزىندە دە استانا قالاسى قۇرىلىسىنىڭ توقىراۋعا توتەپ بەرگەندىگى بارشاعا ايان. قارجى قيىندىعى قىسپاققا ال­عان سول ءبىر شاقتا ەلباسى باس قالانىڭ ما­ڭىزدى قۇرىلىستارىنىڭ توقتاماۋىنا, اسىرە­سە, ال­دانىپ قالعان ۇلەسكەرلەردىڭ مۇددەسىن قور­عايتىن تۇرعىن ءۇي كەشەندەرىنىڭ قۇرىلى­سىن جانداندىرۋعا باتىل قادام جاسادى. وسى ماقسات ءۇشىن مەملەكەت تاراپىنان قوماقتى قارجى ءبولىپ, كومەك كورسەتتى. مىنە, وسىنداي كورەگەندىك جاناشىرلىقتىڭ ناتيجەسىندە ءوت­كەن جىلى قالامىزدا 1 ميلليون 300 مىڭ شارشى مەتردەن استام تۇرعىن ءۇي پايدالانۋعا بەرىلدى. 2010 جىلى استانادا ۇلەسكەرلەر پرو­بلەماسىن شەشۋ ماقساتىندا شەشۋشى جۇ­مىستار جۇزەگە اسىرىلىپ, جالپى قالامىزدا بۇل پروبلەما ۇستىمىزدەگى جىلى تولىق شەشىمىن تابادى دەپ كۇتىلۋدە. وسى ورايدا, مەملەكەت باسشىسىنىڭ تاپسىرماسىمەن ۇكىمەت بارلىق پروبلەمالىق تۇرعىن ءۇي كەشەندەرى قۇرىلىسىن قارجى­لاندىرۋ ماسەلەسىن تولىق شەشكەنىن اتاپ وتكەن ءجون. ءسويتىپ, باس قالاداعى وسىنداي 61 پرو­بلەمالىق تۇرعىن ءۇي كەشەنىنىڭ 28-ءى بيىلعى جىلدىڭ 1 شىلدەسىنە دەيىن پايدالانۋعا بەرىلسە, قالعان 33 تۇرعىن ءۇي كەشەنىنىڭ قۇرىلىسى جىل سوڭىنا دەيىن تولىق اياقتالماق. ۇستىمىزدەگى جىلدىڭ قاڭتار-ماۋسىم ايلارى ارالىعىندا استانادا بارلىق قارجى­لاندىرۋ كوزدەرىنىڭ ەسەبىنەن جالپى اۋدانى 633 254 شارشى مەتر 5538 پاتەر پايدالانۋعا بەرىلدى. باس قالامىزدا قۇرىلىس يندۋس­تريا­سىنىڭ بارلىق قىرلارى دامىپ كەلەدى. عاسىر قۇرىلىسى اتانعان باس قالانىڭ قۇرىلىس وبەكتىلەرىندە نەگىزىنەن جەكە مەنشىك قۇرى­لىس فيرمالارىنىڭ اتقارىپ جاتقان جۇمىسى اۋقىمدى. بيىلعى جىلدىڭ ءبىرىنشى جارتى جىلدىعىندا جەكە سالۋشىلار جالپى كولەمى 24 140 شارشى مەتر تۇرعىن ءۇي قۇرىلىسىن سالعان. بۇل 2010 جىلعى سايكەس مەرزىممەن سالىستىرعاندا 114,7 پايىزدى قۇرايدى. استانا قالاسىنىڭ كاسىپورىندار مەن ۇيىم­دارى 2011 جىلعى قاڭتار-ماۋسىمدا 96483,8 ميلليون تەڭگەنىڭ مەردىگەرلىك جۇمىس­تارىن ورىنداعان. قۇرىلىس جۇمىستارىنىڭ باسىم بولىگى 83,1 پايىزى جەكە مەنشىكتەگى مەردىگەرلىك ۇيىمداردىڭ, 0,1 پايىزى مەملەكەتتىك مەنشىكتەگى مەكەمەلەردىڭ, 16,8 پايىزى شەتەلدىك مەردىگەرلىك ۇيىمداردىڭ ۇلەسىنە تيەدى. مەردىگەرلىك جۇمىستاردىڭ جالپى كولە­مىنىڭ 52,1 پايىزىن جۇمىسشىلار سانى 20 ادامعا دەيىنگى شاعىن ۇيىمدار, 16,7 پايىزىن جۇمىسشىلار سانى 51 ادامنان 250 ادامعا دەيىن ورتاشا قۇرىلىس ۇيىمدارى اتقارسا, 31,2 پايىزىن جۇمىسشىلار سانى 250 ادامنان اساتىن ءىرى كاسىپورىندار ورىنداعان. استانا قالاسى ستاتيستيكا دەپارتامەنتىنىڭ دەرەكتەرى بويىنشا, 2011 جىلعى قاڭتار-ماۋسىمىندا تۇرعىن ءۇي قۇرىلىسىنا 33939, 9 ميلليون تەڭگە قارجى جۇمسالعان. بۇل 2010 جىل­عى سايكەس مەرزىمىمەن سالىستىرعاندا 123,3 پايىزدى قۇرايدى. نەگىزگى كاپيتالعا سا­لىنعان ينۆەستيتسيالاردىڭ جالپى كولەمىندە تۇرعىن ءۇي قۇرىلىسىندا يگەرىلگەن قارجى ۇلەسى 19,5 پايىزعا تەڭ. جالپى, ۇستىمىزدەگى جىلدىڭ ءبىرىنشى جارتى جىلدىعىندا نەگىزگى كاپيتالعا سالىنعان ينۆەستيتسيالاردىڭ كولەمى 173 844,3 ميلليون تەڭگەنى قۇرادى. بۇل 2010 جىلعى سايكەس مەرزىمىمەن سالىستىرعاندا 19,3 پايىزعا جوعارى. جالپى, نەگىزگى كاپيتالعا ينۆەستيتسيا تارتۋ ماسەلەسى تۇرعىسىنان كەلەتىن بولساق, استانا قالاسىنىڭ رەسپۋبليكالىق كولەمدەگى ۇلەسى 9,3 پايىزدى قۇرايدى. ينۆەس­تيتسيا­لاردىڭ باسىم بولىگىن, ياعني 69,1 پايى­زىن جەكەمەنشىك كاسىپورىندار يگەرگەن. جالپى العاندا, الداعى جىلدارى دا استانا قالاسىنداعى تۇرعىن ءۇي قۇرىلىسىنىڭ قار­قىنى باياۋلاماق ەمەس. سونىمەن قاتار, ءۇستى­مىزدەگى جىلى ەلورداداعى رۋحاني-مادەني عيماراتتار قاتارىنا دا بىرنەشە جاڭا ءىرى قۇرىلىس نىساندارى قوسىلادى. تاۋەلسىزدى­گىمىز­دىڭ 20 جىلدىعى اتالىپ وتىلەتىن تۇستا قالادا 5 مىڭ ورىندىق ورتالىق مەشىت, وقۋ­شىلار سارايىنىڭ عيماراتتارى اشىلادى. سونداي-اق استانادا 1 مىڭ ورىندىق كلاس­سيكالىق وپەرا جانە بالەت تەاترىنىڭ, تۇڭ­عىش پرەزيدەنت قورى جانە كىتاپحاناسىنىڭ عيماراتتارى بوي كوتەرىپ كەلەدى. ەركە ەسىلدىڭ جاعاسىندا سالتانات قۇرعان استانا قالاسىنىڭ الىپ قۇرىلىس الاڭىنداعى قايناعان قىزۋ جۇمىس ەل ەكونوميكاسىنىڭ لوكوموتيۆى بولىپ قالا بەرمەك. جىلقىباي جاعىپار ۇلى.