كيپردە اسكەري-تەڭىز بازاسىندا بولعان جارىلىستان قازا بولعاندار سانى 15-16 ادامدى قۇرايدى, دەپ حابارلاعان كيپردىڭ ۇلتتىق راديوسى.
ول كەلتىرگەن مالىمەتتەر بويىنشا, زارداپ شەككەندەر قاتارىندا 35-40 ادام بار. الدىن-الا مالىمەتتەرگە قاراعاندا, قارۋ-جاراق ساقتالعان 90-نان استام كونتەينەردە جارىلىس بولعان. توتەنشە جاعداي سالدارىنان وسىنداعى ەلەكتر ستانساسى دا ىستەن شىققان كورىنەدى. CAN مەملەكەتتىك اگەنتتىگى 5 ءورت ءسوندىرۋشىنىڭ, 4 ۇلتتىق گۆارديا اسكەري قىزمەتشىسىنىڭ جانە 2 اسكەري تەڭىزشىنىڭ قازا تاپقانىن حابارلاپ وتىر.
بومبالاۋ توقتاتىلماق
فرانتسيا وكىمەتى ليۆيادا قازىرگى تاڭدا قالىپتاسقان احۋالدى العاش رەت تۇيىققا تىرەلگەن جاعداي رەتىندە باعالاپ وتىر.
وسى ەلدىڭ قورعانىس ءمينيسترى جەرار لونگە ناتو-نىڭ اسكەري وپەراتسياسىنىڭ بولاشاعى جوق ەكەندىگىن حابارلاعان. ونىڭ ايتۋىنشا, جاعدايدى تەك ليۆيا كوسەمى مۋامار كاددافي مەن ەرەۋىلشىلەر اراسىنداعى تىكەلەي كەلىسسوزدەر عانا قۇتقارىپ قالا الادى. «ليۆيالىقتار ءبىر-بىرىمەن تىلدەستىككە كەلەتىن بولعاندىقتان ءبىز بومبالاۋدى توقتاتامىز, ەكى تاراپتىڭ دا اسكەريلەرى ءوز كازارمالارىنا ورالاتىن بولادى», دەپ مالىمدەگەن ج.لونگە.
ۇندىستانداعى پويىز اپاتى
ءۇندىستاننىڭ سولتۇستىگىندە ورنالاسقان ۋتتار-پرادەش شتاتىندا اسا ۇلكەن تەمىر جول اپاتى ورىن الدى.
سوڭعى مالىمەتتەر بويىنشا قازا تاپقاندار سانى 66 ادامعا جەتكەن. قايعىلى وقيعا جۇردەك پويىزدىڭ 14 ۆاگونى مەن لوكوموتيۆىنىڭ رەلستەن شىعىپ كەتۋى سالدارىنان ورىن العان. جەرگىلىكتى بيلىكتىڭ مالىمدەۋىنشە, ۇيىندىلەردى ارشۋ جانە قازا تاپقاندار مەن زارداپ شەككەندەردى مايىسىپ قالعان ۆاگونداردان الىپ شىعۋ تاياۋ ۋاقىتتاردا اياقتالۋعا ءتيىس. 240-تان استام ادام جاراقاتتار الىپ, ولاردىڭ 150-گە جۋىعى اۋىر جاراقاتتارمەن اۋرۋحانالارعا جەتكىزىلگەن.
جاپونيا اپات قۇرباندارىن ەسكە الدى
كەشە جاپونيا حالقى وسىدان ءتورت اي بۇرىن اپاتتى جەر سىلكىنۋ سالدارىنان قۇربان بولعانداردى 1 ءمينوت ۇنسىزدىكپەن ەسكە ءتۇسىردى.
وسى ەلدە ورىن العان الاپات تسۋناميدەن كەيىن ءتورت اي وتكەندە ازىرگە 22 ميلليون توننا ۇيىندىلەردىڭ 7,56 ميلليون تونناسىن عانا ارشىپ الۋدىڭ ءساتى ءتۇسىپ وتىر. بۇل بۇكىل ۇيىندىلەردىڭ 34 پايىزىن قۇرايدى. ەگەر زارداپ شەككەن ءۇش پرەفەكتۋرانىڭ جىل سايىن وڭدەيتىن تۇرمىستىق قالدىقتارى كولەمىمەن سالىستىرار بولساق, بۇل كولەم 20 جىلدا جينالعان قالدىقتارعا تەڭ بولادى ەكەن. باسپانالارىنان ايىرىلعان 110 مىڭنان استام ادامنىڭ 24 مىڭى ءالى كۇنگە دەيىن مەكتەپتەردە جانە باسقا دا قوعامدىق ورىنداردا تۇرىپ جاتىر.
ءمينيستردىڭ شەنى تومەندەتىلدى
تۇركىمەنستان پرەزيدەنتى گۋربانگۋلى بەردىمۇحامەدوۆ ابادان قالاسىنداعى توتەنشە جاعدايعا سوقتىرعان جارىلىستان كەيىن ەلدىڭ قورعانىس ءمينيسترى ب.گۋندوگدىەۆكە قاتاڭ سوگىس بەرىپ, شەنىن پولكوۆنيككە دەيىن تومەندەتتى.
حالىقارالىق اگەنتتىكتەردىڭ حابارلاۋىنشا, مەملەكەت باسشىسى وقيعاعا قاتىسى بار وزگەلەردى دە جاۋاپكەرشىلىككە تارتىپ, اسكەري شەندەرىنەن ايىرۋدى, قاجەت بولسا قارۋلى كۇشتەر قاتارىنان شىعارىپ, كىنالارىنىڭ دارەجەلەرىنە قاراي اسكەري تريبۋنالعا بەرۋدى تالاپ ەتكەن. تۇركىمەنستان وكىمەتى ورىن العان توتەنشە جاعداي سالدارىنان ەكى اسكەري قىزمەتشى مەن 13 قاتارداعى ازاماتتىڭ قازا تاپقانىن, توڭىرەكتەگى ۇيلەر مەن عيماراتتاردىڭ ءىشىنارا زاقىمدانعانىن رەسمي تۇردە مويىنداپ وتىر.
رەسەي اسكەرىن شىعارۋدى تالاپ ەتتى
ەقىۇ-نىڭ پارلامەنتتىك اسسامبلەياسى رەسەيدىڭ قارۋ-جاراقتارى مەن اسكەرىن پريدنەستروۆەدەن شىعارۋدى تالاپ ەتىپ, ورىن العان جانجالدى «5+2» ءپىشىنى شەڭبەرىندەگى كوپجاقتى كەلىسسوزدەر جولىمەن رەتتەۋگە شاقىرعان.
رۋمىننىڭ «Ziare» باسىلىمىنىڭ حابارلاۋىنشا, مولدوۆاداعى احۋالعا قاتىستى قارار ەقىۇ پا-نىڭ تۇپكىلىكتى دەكلاراتسياسىنا ەنگىزىلىپ, جەكسەنبى كۇنى ونى 55 ەلدىڭ وكىلدەرى بەكىتكەن. ەقىۇ-نىڭ بەلگرادتاعى ماجىلىسىنە قاتىسقان 55 ەلدىڭ وكىلدەرى كيشينەۆ پەن تيراسپولدەن سەنىم مەن قاۋىپسىزدىك شارالارىن العا باستىرۋ تۇرعىسىنداعى كۇش-جىگەردى ودان ءارى ارتتىرا ءتۇسۋدى تالاپ ەتكەن.
كەدەيلەر كوبەيە تۇسۋدە
2011 جىلى جەر بەتىندەگى حالىق سانى 7 ميلليارد ادامنان اسىپ, 2023 جىلعا قاراي 8 ميلليارد ادامدى قۇراۋى مۇمكىن, دەپ مالىمدەگەن بۇۇ ساراپشىلارى.
سونىمەن بىرگە ادامدار سانى ءوسۋىنىڭ ەڭ كەدەي ەلدەر ەسەبىنەن ورىن الۋ تەندەنتسياسى دا ساقتالىپ قالماق. 1960-تان 1999 جىلعا دەيىن پلانەتاداعى ادامدار سانى ەكى ەسەدەن استامعا وسكەن. قازىرگى ۋاقىتتا ابسوليۋتتىك ءوسىم جىلىنا 77 ميلليون ادامدى قۇراپ وتىر. ولاردىڭ 95 پايىزى الەمنىڭ ەڭ كەدەي دەگەن ەلدەرىنىڭ ۇلەسىنە تيەدى. وسىلايشا الەمدە 67 ميلليون بالانىڭ ءبىلىم الۋعا مۇمكىندىكتەرى جوق, ال ءبىزدىڭ پلانەتامىزدىڭ 925 ميلليونداي تۇرعىنى اشتىق جاعدايىندا ءومىر سۇرۋدە, دەپ حابارلايدى يتار-تاسس اگەنتتىگى.
وتقا ورانعان ۇشاق
كەشە قوزعالتقىشى وتقا ورانعان اۋەدەگى ان-24 ۇشاعىن ۇشقىشتار تىكەلەي وب وزەنىنە قوندىرعان.
اپات سالدارىنان 5 ادام قازا تاۋىپ, 26 ادام زارداپ شەككەن. ۇشاق رەسەيدىڭ توم قالاسىنان سۋرگۋت قالاسىنا باعىت الىپ بارا جاتقان كورىنەدى. ەكيپاج قوزعالتقىشتىڭ تۇتىندەي باستاعانىن بايقاعان ساتتە شۇعىل تۇردە قونۋ جونىندە شەشىم قابىلداعان ەكەن. ءتۇرلى جاراقاتتارمەن 26 ادام تاياۋ ماڭداعى اۋرۋحاناعا جەتكىزىلگەن.
ينتەرنەت ماتەريالدارى نەگىزىندە ازىرلەندى.