سەنبى كۇنى ورال گارنيزونىندا ورنالاسقان 5517 اسكەري ءبولىمنىڭ جاس ساربازدارى رەسمي تۇردە انت قابىلدادى. وسى كوكتەم ايلارىندا اسكەرگە شاقىرىلىپ, سارباز اتانعان جاستاردىڭ باسىم بولىگى شىعىس قازاقستان, جامبىل وبلىستارى وڭىرلەرىنەن كەلگەندەر.
انت قابىلداۋ راسىمىندەگى سالتاناتتى جيىندى پولك كومانديرى, پولكوۆنيك ت.دۇيسەماليەۆ قۇتتىقتاۋ سوزبەن اشتى.ءوز كەزەگىندە 5517 اسكەري ءبولىمىنىڭ ارداگەرلەرى توراعاسىنىڭ ورىنباسارى زاپاستاعى مايور مارات ءابدراحمانوۆ, قۇقىق قورعاۋ ورگاندارىنىڭ باسشىلارى, ءدىن وكىلدەرى جانە ساربازداردىڭ اتا-انالارى اق تىلەكتەرىن ايتىپ ۇلدارىنا باتالارىن بەردى.
وسىنداي قۋانىشتى ءسات اراسىندا بۇگىنگى انت قابىلداعان جاس ساربازداردىڭ اتا-انالارىمەن دە تىلدەسۋدىڭ ىڭعايى كەلگەن ەدى. سولاردىڭ ءبىرى – وسكەمەن قالاسىنان ات تەرلەتىپ كەلگەن بەتكەەۆيچ ليۋدميلا تۋعان ۇلى جاس جاۋىنگەر ستانيسلاۆ بەتكەەۆيچ وتان قورعاۋشىسى بولعانىنا قۋانىشتان جۇرەگى جارىلارداي بولىپ تۇردى. «بالامنىڭ اسكەري بورىشىن وتەپ جاتقان جەرىن, ونىڭ كومانديرلەرىن كورىپ قوڭىلىم توعايىپ تۇر. ونىڭ ۇستىنە بۇرىن اسكەر ەكى جىل ەكى-اق كۇن ەمەس پە دەۋشى ەدى, ەندى ءبىر جىل دەگەن ۋاقىت پا. قازىر-اق وتە شىعادى عوي. تەك ەلىمىز تىنىش, حالقىم امان بولىپ, اسپانىمىز اشىق بولسىن», – دەدى ول.
شارا اياقتالعان سوڭ انت بەرۋ راسىمىنە جينالعان مەيماندار كازارما ءۇي-جايىنا, ساربازدار اسحاناسىنا, مەديتسينالىق بەكەتكە كىرىپ, ءبولىمنىڭ تىنىس-ءتىرشىلىگىمەن تانىستى. قالالىق مادەنيەت ءۇيىنىڭ انشىلەرىنىڭ ونەرىن تاماشالاعاننان كەيىن جاۋىنگەرلەردىڭ تۋعان-تۋىسقاندارى ءبولىم باسشىلىعىنا العىسقا تولى جىلى سوزدەرىن ءبىلدىردى.
ەربولات سۇلتانوۆ, كاپيتان. ورال.