كەشە ادىلەت مينيسترلىگىنىڭ قىلمىستىق اتقارۋ جۇيەسى كوميتەتىنىڭ قاراعاندى وبلىسى بويىنشا دەپارتامەنتىندە وقىس وقيعا ورىن الدى. بالقاش قالاسىندا ورنالاسقان اك-159/21 جالپى رەجىمدەگى مەكەمەدەگى سوتتالعاندار توپتاسىپ, ءىىم ىشكى اسكەرىنىڭ كۇزەتشىسىنە قارۋلى شابۋىل جاسادى, دەدى قىلمىستىق اتقارۋ جۇيەسى كوميتەتى توراعاسىنىڭ ورىنباسارى ت.احمەتوۆ.
ونىڭ ايتۋىنشا, وقيعانى ەستىسىمەن وندا مەكەمە قىزمەتكەرلەرىنىڭ كەزەكتەگى جاساعى شۇعىل جەتەدى. ولار سوتتالعانداردىڭ زاڭسىز ارەكەتىنىڭ جولىن كەسۋ كەزىندە ەكى ارادا اتىس باستالادى. سوتتالعانداردىڭ قولىنا اڭشى مىلتىعىنىڭ قايدان ءتۇسكەنى بەلگىسىز, الگى جەردە قىلمىستىق-اتقارۋ جۇيەسىنىڭ ءتورت بىردەي قىزمەتكەرى جانە ىشكى اسكەردىڭ باقىلاۋشى قاراۋىلى جارالانادى. وعان قوسا تاعى دا ەكى قىزمەتكەر پىشاق جاراقاتىن الادى. ءسويتىپ سوتتالعانداردىڭ زاڭسىز ارەكەتىنىڭ سالدارىنان ب ۇلىك شىعىپ, بىرنەشە ادام تابان استىندا قانسىراپ قالادى.
ابىروي بولعاندا, سوتتالعانداردىڭ نەگىزگى شەكتەۋ ارقىلى توپتاسىپ قاشۋ ارەكەتى كەلىپ جەتكەن قىلمىستىق اتقارۋ جۇيەسى مەن ىشكى اسكەردىڭ ىشكى اسكەري ءبولىمى قىزمەتكەرلەرىنىڭ كۇشىمەن توقتاتىلادى. جوعارىداعى اتالعان مەكەمەنىڭ كەزەكشى جاساعىنا كورسەتىلگەن قارۋلى قارسىلىقتان كەيىن 16 ادامنان قۇرىلعان قىلمىستىق توپ جىلىستاپ مەكەمەنىڭ وندىرىستىك ايماعىنا جاسىرىنادى. بۇل سوتتالعاندار توناۋ, ۇرلىق, كىسى ءولتىرۋ, زورلاۋ سەكىلدى اۋىر جانە اسا اۋىر قىلمىستار ءۇشىن 11 جىلعا دەيىن باس بوستاندىعىنان ايىرىلعاندار بولاتىن. سوندىقتان ولاردىڭ وتە قاۋىپتى سوتتالعاندار ساناتىنداعى قىلمىسكەرلەر ەكەندىگى بەلگىلى ەدى.
مىنە, وسىعان وراي وقيعا ورنىنا قاج كوميتەتى توراعاسى, ءىىم ىشكى اسكەر كوميتەتى توراعاسىنىڭ ورىنباسارى, قۇقىق قورعاۋ جانە قاداعالاۋ ورگاندارىنىڭ وكىلدەرى دە جەتتى. ءسويتىپ قىلمىسكەرلەردى ۇستاۋ شاراسى باستالادى. ارنايى وپەراتسيا بارىسىندا اۋەلى تىگىن تسەحىنىڭ ىشىنەن وزدەرىنىڭ قاۋىپسىزدىگى ماقساتىندا جاسىرىنعان ەكىنشى اۋىسىمدا جۇمىس ىستەگەن 8 سوتتالعان بوساتىلادى.
ال وندىرىستىك ايماق عيماراتىنىڭ بىرىنە ارنايى ءبولىمشەلەر قىزمەتكەرلەرى جاقىنداعان كەزدە قاستاندىق ويلاعان سوتتالعاندار الدىن الا بولجام بويىنشا وتتەگى تولتىرىلعان باللون تارىزدەس زاتپەن قاساقانا جارىلىس ۇيىمداستىرادى. ەندى ۇيىندىلەر استىنان قىلمىستىق توپ مۇشەلەرى ىزدەستىرىلۋدە, دەدى قاجك ءتوراعاسىنىڭ ورىنباسارى ت.احمەتوۆ.
الايدا, دەر كەزىندە كورسەتىلگەن مەديتسينالىق جاردەمگە قاراماستان مەكەمەنىڭ باقىلاۋ قىزمەتىنىڭ سەرجانتى 1988 جىلى تۋعان جانسەرىك قاشىمبەكوۆ جاراقاتتانۋ سالدارىنان قايتىس بولدى. قازىرگى ۋاقىتتا مەكەمەدەگى جاعداي ورنىقتى, قىزمەتتىك تەكسەرىس جۇرگىزىلۋدە.
الەكساندر تاسبولاتوۆ.