بىلتىر عانا ءوز ەلىمىز توراعالىق ەتكەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ باس حاتشىسى بولىپ يتاليالىق ديپلومات لامبەرتو زانەر سايلاندى. بۇل ەۋروپالىق بەدەلدى ۇيىمنىڭ ومىرىندەگى ايتارلىقتاي وقيعا بولۋمەن قاتار, جاڭا حاتشىنىڭ ومىرىندەگى دە ۇلكەن بەلەس.
جالپى, ەقىۇ-عا توراعالىق ەتۋ جەكە ەلدەر ءۇشىن ءۇلكەن سەنىم, ۇلكەن جاۋاپكەرشىلىك. سوعان قاراماي, بۇل ۇيىمنىڭ كۇندەلىكتى ءۇيلەستىرۋشى جۇمىسىن ونىڭ باس حاتشىسى اتقارادى. ونى ءبىزدىڭ ەلىمىز ۇيىمعا توراعالىق ەتكەن كەزدە ايقىن كورىپ, سەزىندىك. مارك پەررەن دە بريشامبو ءبىزدىڭ ەلدە ەقىۇ-نىڭ ءسامميتىن وتكىزۋگە بايلانىستى ءجيى بولىپ, بارلىق باستامامىزعا قولداۋ كورسەتىپ وتىردى.
سول ءۇشىن دە ءبىز فرانتسۋز ديپلوماتىنىڭ باس حاتشىلىق قىزمەتىن جوعارى باعالادىق. ءبىز عانا ەمەس, ۇيىمعا مۇشە بارلىق ەلدەر دە اسا جوعارى قىزمەتتى ەكى مەرزىم اتقارعان م.پ.دە بريشامبوعا لايىقتى قۇرمەت كورسەتتى. قىزمەت مەرزىمىنىڭ 1 شىلدەدە بىتۋىنە بايلانىستى ۆەنا قالاسىنىڭ حوفبۋرگ سارايىندا قوشتاسۋ قابىلداۋى ءوتىپ, ونىڭ تىندىرعان ىسىنە جان-جاقتى باعا بەرىلدى.
بۇرىنعى ادام كەتكەن سوڭ, ورنىنا جاڭا ادام كەلەدى. بۇل قىزمەتكە قىزىققاندار دا از بولعان جوق. وعان كەز كەلگەننىڭ دە ۇمتىلا بەرمەيتىنى بەلگىلى. سويتسە دە, ءتورت ەل ءوز وكىلدەرىن ۇسىندى. ءتۇرىكتەر بۇل قىزمەتكە ەرسين ەرچيننىڭ وتۋىنە كۇش سالدى. ونى تۇرىك پرەزيدەنتى ابدۋللا گۇلدىڭ ءوزى قولداپتى. اۆستريانىڭ بۇرىنعى سىرتقى ىستەر ءمينيسترى ۋرسۋلا پلاسنيكتىڭ بەدەلى دە ايتارلىقتاي ەدى. ال بۇرىن پورتۋگاليا ۇكىمەتىن باسقارعان, كەيىن ەقىۇ-نىڭ پارلامەنتتىك اسسامبلەياسىنا توراعا بولعان جواو سوارەش – الەم تانىعان قايراتكەر. ۇمىتكەرلەر ىشىندە بەلگىسىزدەۋى جانە «ۇندەمەسى» بۇۇ-نىڭ كوسوۆوداعى وكىلى قىزمەتىن اتقارۋشى زانەر ەدى.
كۇرەس ءبىرشاما جابىق ءجۇردى. ءبىراز ەل بۇل قىزمەتكە ەۋرووداققا مۇشە ەمەس ەلدىڭ وكىلى دە سايلانعانى ءجون دەگەن ۇسىنىس جاساپ, ەرچينگە قولداۋ كورسەتكەندە, وعان ارمەنيا مەن كيپر قارسى شىعىپ, وتكىزبەي تاستادى. ال باس حاتشىنى سايلاۋدا كونسەنسۋس قاجەت, ياعني ءبىر ەلدىڭ قارسىلىعى سايلاتپاي تاستايدى. ءسويتىپ, تۇرىك وكىلى ءوتپەي قالعان سوڭ, تاڭداۋ تاعى دا ەۋرووداق ەلدەرىنە قالدى.
بۇل جەردە كوپشىلىكتىڭ قولداۋى ۋرسۋلا پلاسنيككە توقتاعان. ءتىپتى ونى قۇتتىقتاۋشىلار دا بولىپتى. بىراق تۇركيا وكىلى ءوز ادامىنىڭ وتپەگەنىنە كەك قايتارعانداي, ونىڭ اياعىنان شالدى. كەزىندە, مينيستر كەزىندە پلاسنيك تۇركيانىڭ ەۋرووداققا ءوتۋىنە قارسى بولعان ەكەن, بۇگىن سول الدىنان شىقتى. جاقتاۋشى – 55, قارسى – بىرەۋ. وتپەدى.
ءراسىم بويىنشا ەندى بۇرىن الدىن الا داۋىسقا سالعاندا ەكىنشى ورىن العان ادامنىڭ كانديداتۋراسى ۇسىنىلادى. ول – زانەر. ونى بارلىق ەلدىڭ وكىلدەرى قولدادى. بۇل جەردە قىڭىرلىققا باسىپ, ءوز وكىلى ۇسىنىلعان ەل قارسى شىعا بەرسە, تىرلىك بولمايدى. وندا ءوز وكىلىڭدى وتكىزە الماۋمەن بىرگە, قىڭىر ەل اتاناسىڭ. ول – اۋىر اتاق. وعان ەشكىم بارمايدى.
جۇرتتى سوارەشتەي بەلگىلى قايراتكەردىڭ وتپەي قالعانى تاڭداندىرادى. بىراق الدىمەن ۇسىنىلعان زانەردى وتكىزبەي تاستاپ, سوارەشتىڭ كانديداتۋراسى ۇسىنىلعاندا, وعان جۇرتتىڭ تۇگەل داۋىس بەرە قويۋى دا ەكىتالاي ەدى. بۇل جەردە ادامي ادەپ العا توسىلادى. زانەردىڭ سوارەشتەن نەسى كەم دەگەن ساۋال قويىلادى.
يتاليالىق ديپلومات لامبەرتو زانەردىڭ دە ءوز ارتىقشىلىعى بار. وعان ەقىۇ جۇيەسى جاقسى تانىس. 2002-2006 جىلدارى ول بۇل ۇيىمنىڭ شيەلەنىستەردىڭ الدىن الۋ ورتالىعىنىڭ ديرەكتورى قىزمەتىن اتقارعان. بۇل باس حاتشىدان كەيىنگى ەكىنشى قىزمەت سانالادى. ەندى بار-جوعى ءبىر-اق ساتى كوتەرىلدى دەسە دە بولادى. ودان كەيىن دە بۇۇ-نىڭ كوسوۆوداعى ارناۋلى وكىلى رەتىندە ءوزىن كورسەتە بىلگەن. ىنتىماقتاستىقتى ءوز جۇمىسىنىڭ وزەگى سانايتىن ەقىۇ سياقتى ۇيىمعا شيەلەنىستى شەشۋدى كاسىپكە اينالدىرعان زانەردەي قايراتكەر كەرەك-اق.
تايلاند: وپپوزيتسيا جەڭىسكە جەتتى
اڭگىمە سول ءاسكەريلەردىڭ مويىنداۋىندا. بۇل پارتيا بۇرىن دا بيلىك باسىندا بولعان, تەك 2006 جىلى اسكەري حۋنتا ۇكىمەتتىك ءتوڭكەرىس جاساپ, سىرتتا ءىسساپاردا جۇرگەن زاڭدى پرەمەر-مينيستر تاكسين چيناۆاتتى ورنىنان الىپ, ەلگە كىرگىزبەي قويعان.
سودان بەرى ەلدە تىنىشتىق جوق. بيلىككە قارسى حالىق ۇنەمى باس كوتەرىپ جاتادى. اتاپ ايتار ءبىر ءجايت: قارسىلىققا شىققاندار ارقاشان كۇرەستىڭ بەيبىت ءتۇرىن پايدالاندى. قىزىل جەيدە كيگەن حالىق ەل استاناسى بانگكوكتە قىزىل تەڭىزدەي تولقيتىن. سودان دا بۇل قوزعالىس «قىزىل جەيدەلىلەر» قارسىلىعى اتالىپ كەتتى.
بۇگىنگى جەڭىستى سول «قىزىل جەيدەلىلەر» كۇرەسىنىڭ جەمىسى دەۋگە ءابدەن بولادى. بىلتىرعى جىلى جازعا سالىم بيلىك اسكەريلەردىڭ كومەگىمەن كوتەرىلگەن حالىقتى اياۋسىز باسقانىمەن, ونى جەڭىس دەۋ قيىن ەدى. سوندا بەيبىت قارسىلىققا شىققانداردىڭ 91 ادامى قازا تاۋىپ, ەكى مىڭدايى جارالانعان. سول ادامداردىڭ قانىن مويىندارىنا جۇكتەۋ ءاسكەريلەرگە وڭايعا تۇسپەدى.
ءيا, حالىق ەندى كوتەرىلەر بولسا, ولاردى باسۋ وڭايعا سوقپاسىن اسكەريلەر انىق اڭعاردى. قورعانىس مينيسترلىگى اتىنان گەنەرال پراۆيت ۆونگسۋۆان ارميانىڭ ءوزىنىڭ نەگىزگى ىسىنەن باسقاعا ارالاسپايتىنىن ءجانە سايلاۋ قورىتىندىسىن مويىندايتىنىن ءمالىمدەدى. ءاسكەريلەر عانا ەمەس-اۋ, سولاردىڭ قولداۋىمەن بيلىكتە تۇرعان قازىرگى پرەمەر-مينيستر اپحيسيت ۆەتچاچيۆا دا ءوزىنىڭ پارتياسى – «تايلاند دەموكراتيالىق پارتياسىنىڭ» جەڭىلىسىن مويىنداپ, «پحىا تحا»» پارتياسىن جەڭىسىمەن قۇتتىقتادى.
جەڭىسكە جەتكەن «پحىا تحا» («تايلاند ءۇشىن») پارتياسى پارلامەنتتەگى 500 ورىننىڭ 264-ىنە يە بولىپ, ەندى كواليتسياسىز-اق ۇكىمەتتى جاساقتاپ, ءوزىنىڭ وكىلىن پرەمەر-مينيستر ەتىپ تاعايىنداي الادى. ال پرەمەر-مينيستر قىزمەتىنە بۇل ەلدە العاش رەت ايەل قايراتكەر – «پحىا تحا» پارتياسىنىڭ قازىرگى جەتەكشىسى ينگلاك چيناۆات سايلانۋى ءمۇمكىن. ءمۇمكىن بولعاندا, باسقاداي كەزدەيسوق جاعداي كەدەرگى جاساماسا, سولاي بولۋعا ءتيىس.
تايلاند – وڭتۇستىك-شىعىس ازياداعى ءىرى مەملەكەت. حالقىنىڭ سانى جاعىنان ول العاشقى ءىرى 20 ەلدىڭ قاتارىنا كىرەدى. قازبا بايلىعىمەن ماقتانا الماسا دا, سوڭعى جىلداردا ەكونوميكاسى ايتارلىقتاي دامىپ, الەم ەلدەرى اراسىندا ءوز ورنىن ايقىنداپ ۇلگەردى. اسىرەسە, بۇل ەل حالىقارالىق ءتۋريزمنىڭ ءبىر ورتالىعى رەتىندە تانىلدى, سودان قىرۋار پايدا دا تابادى. وسىناۋ ەلدە تىنىشتىق بولعانىنا كوپ جۇرت مۇددەلى.
ماماديار جاقىپ.