«جەر – تەڭىز – اسپان» ىقپالداستىرىلعان ينۆەستيتسيالىق جوباسىنىڭ ءبىر سالاسى – ءبىزدىڭ ۋنيۆەرسيتەتتىڭ سوڭعى جىلدارى اتى دا, زاتى دا وزگەردى. وعان ەلباسىنىڭ قولداۋى مەن قامقورلىعى تىكەلەي اسەر ەتتى. ولاي دەيتىنىم, تاۋەلسىزدىك جىلدارى ىشىندە زامان تالابىنا ساي قايتادان قۇرىلىپ, ەن دالادا ەرەكشە ءساندى دە ءزاۋلىم عيماراتتار قالاشىعىنىڭ پايدا بولۋى نۇرسۇلتان ءابىش ۇلىنىڭ وسى جوبانى قولداپ, قامقورلىق جاساۋىنان باستالدى.
ال وتكەن جىلى ەلباسى ماڭعىستاۋ وبلىسىنا جۇمىس ساپارى كەزىندە ءبىلىم ورداسىنا كەلىپ, جاڭا سيپاتتاعى وقۋ ورنىمىزعا وڭ باعا بەردى. سول ساپاردان سوڭ ۇلكەن ءجۇزۋ باسسەينى بار ەكى قاباتتى سپورت كەشەنى مەن ستۋدەنتتىك جاتاقحانا قۇرىلىسى باستالىپ, قازىر قارقىندى جۇرۋدە. وسى جىلى ينجينيرينگ ورتالىعى مەن كىتاپحانا قۇرىلىسى باستالدى.
ۋنيۆەرسيتەتىمىز بۇگىندە تولىقتاي حالىقارالىق دارەجەگە جەتتى دەۋگە بولادى. ولاي دەيتىنىم, رەسەي, قىتاي, گرۋزيا, وزبەكستان, تۇركيا, ازەربايجان جانە قىرعىزستاننان كەلگەن ستۋدەنتتەر ءبىلىم الۋدا. ءبىلىم وردامىز قازىردىڭ وزىندە كۋبا, يران, پولشا, ازەربايجان ەلشىلەرىمەن بىرلەسە جۇمىس ىستەۋگە كەلىسىم جاساسۋدا.
قامقورلىققا وراي جەتىستىكتەرىمىز دە بارشىلىق. وتكەن جىلى وردامىزدا بولىپ جاستارعا اق باتاسىن بەرگەن ەلباسى تىلەك جازاتىن قۇرمەت كىتابىنا: «ۋنيۆەرسيتەت ۇجىمىنا بىلىكتى كادرلار دايىنداپ, ماڭعىستاۋ وبلىسىنىڭ, ەلدىڭ يندۋستريالىق-يننوۆاتسيالىق دامۋىنا ۇلەس قوسۋىن تىلەيمىن. قازىرگى زامان تالابىمەن يگەرىپ جاتقان ماماندىقتارىڭىز ەلىمىزدىڭ كوركەيۋىنە جۇمسالسىن! ۋنيۆەرسيتەتتەرىڭىزدىڭ جاڭا وقۋ عيماراتى قۇتتى بولسىن! ن. نازارباەۆ, 09.06.2010» دەپ لەبىز ءبىلدىرىپ ەدى.
ءبىزدىڭ ماقساتىمىز تاۋەلسىز قازاقستاننىڭ تۇڭعىش پرەزيدەنتى, جاستاردىڭ قامقورشىسى نۇرسۇلتان ءابىش ۇلىنىڭ سول تاپسىرماسىنا ساي ەڭبەك ەتەتىن بولاشاق يەلەرىن تاربيەلەۋ بولا بەرەدى.
ءابدىمۇتاللىپ ابجاپپار ۇلى, ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ رەكتورى.
اقتاۋ.