مەن الىستاعى التاي اۋىلىندا تۇرامىن. اتا-انام قاتارداعى ەڭبەك ادامدارى. اكەم ەلامان مادەنيەت قىزمەتكەرى. اۋىلداعى مادەني-ساياسي شارالارعا ەتەنە ارالاسىپ جۇرەدى. كىشكەنتاي كەزىمدە ولاردىڭ اۋىز ەكى اڭگىمەلەرىنەن ەگەمەندىك العاننان بەرگى ەلىمىزدەگى وڭ وزگەرىستەر جايلى ەستىپ ءوستىم. تاۋەلسىز مەملەكەتىمىزدىڭ تابىستارىن ەلباسىمىز نۇرسۇلتان نازارباەۆ ەسىمىمەن بايلانىستىراتىنىنا كۋا بولدىم. ەسەيە كەلە ءوزىم دە نۇرسۇلتان اتامنىڭ نۇرلى ءجۇزىن تەلەديداردان كورىپ, مەرزىمدى باسىلىمداردان وقىپ, ۇلتىنىڭ قامىن جەگەن ۇلى ادام ەكەنىنە كوز جەتكىزدىم.
تىم الىسقا بارماي-اق, اۋىلىمىزدا, مەكتەبىمىزدە بولىپ جاتقان جاڭالىقتار كوز الدىمىزدا. كۇننەن كۇنگە تۇرمىس تۇزەلىپ, كوپتەگەن يگىلىكتەرگە قول جەتكىزىپ كەلە جاتقانىمىز وڭىردە ايقىن كورىنۋدە. ءارينە, وسىنىڭ ءبارىن بالا قيالدان وتكىزە كەلە, ەلباسىعا دەگەن ىڭكارلىكتىڭ ارتا تۇسكەنىن ءوزىم دە بايقامادىم. ايتەۋىر, بۇل كىسىنىڭ نۇرلى جۇزىنەن مەيىرىم شۋاعى توگىلىپ تۇراتىنىنا ءتانتى بولاتىنمىن. مۇمكىن ول كەزدە ەلباسىنان سىيلىق الامىن دەپ ويلاماعان دا شىعارمىن. ءبارى اياق استىنان بولدى...
وتكەن جىلى پرەزيدەنت نۇرسۇلتان نازارباەۆ حالىقپەن تىكەلەي ەفير ارقىلى جۇزدەسەدى دەگەندە ءبىراز قوبالجىدىم. دەگەنمەن, تاۋەكەلگە بارىپ, كومپيۋتەرىم جوق ەكەنىن جەتكىزدىم. شىنى كەرەك, مەنىڭ ءوتىنىشىم ەلباسىنا جەتەتىنىنە سەنە قويعان جوقپىن. نۇرسۇلتان اتامنان سىيلىققا كومپيۋتەر العاندا, قۋانىشىمدا شەك بولعان جوق. پرەزيدەنتكە ءوتىنىشىم جەتكەنىنە ءبىر قۋانسام, مەنى بالاسىنباي ۇلكەن باسىمەن كىشىپەيىلدىلىك تانىتقان نۇرسۇلتان اتاما ريزاشىلىعىم شەكسىز بولاتىن.
بۇل مەنى شىن مانىندە قاناتتاندىردى. ەلباسىنىڭ ەلجىرەگەن كوڭىلى مەن سەنىمى مەن ءۇشىن ۇلكەن جاۋاپكەرشىلىك جۇكتەيدى. ازىرشە مەنىڭ قولىمنان كەلەتىنى, ساباعىمدى جاقسى وقىپ, تاربيەلى-ءتالىمدى بولىپ ءوسۋ ەكەنىن بىلەمىن. قازىر وقۋ وزاتىمىن. بولاشاقتا جوعارى وقۋ ورنىنا ءتۇسىپ, جاقسى مامان بولىپ, ەلىمنىڭ ەرتەڭگى ىرگەلى ىستەرىنە ءوز ۇلەسىمدى قوسسام دەگەن ارمانىم بار. مەن نۇرسۇلتان ءابىش ۇلىنىڭ دەنى ساۋ بولىپ, ەلىن جاڭا بيىكتەرگە باستاي بەرسىن دەپ تىلەيمىن.
نۇرقانات قياقباەۆ, ا.س.پۋشكين اتىنداعى ورتا مەكتەپتىڭ 9 سىنىپ وقۋشىسى.
اقتوبە وبلىسى, بايعانين اۋدانى.