قۇرمەتتى وتانداستار!

بۇگىن ءبىزدىڭ ەلىمىز  وتانىمىزدىڭ ەل­ور­داسى – استا­نانىڭ تۋعان كۇنىن اتاپ وتۋدە. قازاقستان رەسپۋبليكاسى تاۋەلسىزدىگىنىڭ 20 جىلدىعى اياسىندا بۇل كۇننىڭ ماڭىزى ەرەكشە جانە ءمانى تەرەڭ. ەلباسىنىڭ كەمەل ساياساتىنىڭ ارقاسىن­دا ءدۇ­نيە­گە كەلگەن استانا قالاسى ەگەمەن ەل ازامات­تا­رىنىڭ بويىندا رۋحاني سەرپىلىس تۋدىرىپ, قازاقستان حالقىنىڭ ازاتتىعى مەن دەربەستىگىنىڭ بەلگىسىنە جانە ەل ارمانىنىڭ ىسكە اسقانىنىڭ ايقىن دالەلىنە اينالدى. ءاربىر ەل ءۇشىن ونىڭ استاناسىنىڭ اتالۋى جاي گەوگرافيالىق اتاۋ عانا ەمەس. وسى ۇعىمنىڭ توڭىرەگىندە مەملەكەت پەن حالىقتىڭ تاريحى, ءداستۇرى, ءتىلى مەن مادەنيەتى جاراسىم تاپقان. ادامزات جادى قوعام مەن مەملەكەتتىڭ تۇبەگەيلى جاڭارۋىنىڭ بەلگىسى بولعان جاڭا استانالار تاريحىنا باي. مەيدزي رەفورمالارىنىڭ ءداۋىرى مەن ونىڭ بەينەسى توكيو, كەماليستىك تۇركيا مەن ونىڭ استاناسى انكارا, پەترلىك رەسەي مەن سانكت-پەتەربۋرگ, تاۋەلسىزدىك جولىنداعى كۇرەس­تە جەڭىسكە جەتكەن اقش پەن ۆاشينگتون وسىنىڭ مىسالى. بۇگىندە وسى­لاردىڭ قاتارىندا از ۋاقىت ىشىندە ىرگەسى قالانعان استانا دا بار. قازاقستاننىڭ تۇڭعىش پرەزيدەنتى ن.ءا.نازارباەۆتىڭ ەل وردا­سىن استانا قالاسىنا كوشىرۋ جونىندەگى ستراتەگيالىق باستاماسى تاۋەلسىز قازاقستاننىڭ ايشىقتى جەتىستىكتەرىن ايقىنداعان تاريحي ماڭىزى زور تاعدىرلى شەشىم بولدى. استانا ەل دامۋىنا ەكپىن بەرگەن كۇشكە, قازاقستان حالقىنىڭ بىرلىگى مەن ۇيىسۋىنىڭ, رۋحاني ورلەۋىنىڭ جارقىن كورىنىسىنە اينالدى. ونىڭ ساۋلەتىندە نۇرسۇلتان ءابىش ۇلىنىڭ ەۋرازيالىق يدەياسى كورىنىس تاۋىپ, قالا ۇلت كوش­باس­شىسىنىڭ بەيبىتشىلىك پەن كەلىسىم ساياساتىنىڭ بەينەسىنە اينالدى. استانا رۋحى – ەقىۇ-نىڭ استانا ءسامميتى, يسلام ىنتى­ماق­تاس­تىعى ۇيىمى, الەمدىك جانە ءداستۇرلى دىندەر كوشباسشىلارىنىڭ سەزى – مادەنيەتتەر مەن وركەنيەتتەر ۇنقاتىسۋى ارقاسىندا باتىس پەن شى­عىس ءداستۇرى استاسىپ جاتقان ەۋروپا مەن ازيا اراسىنداعى جالعاۋشى كوپىر رەتىندە الەمگە تارادى.  استانا قالاسى بۇگىندە الەم جۇر­ت­شى­لىعىنا تاۋەلسىزدىك. ۇلت كوشباسشىسى. ۇلت بىرلىگى دەگەن ۇعىمدار ارقى­لى تانىلدى. بۇل ۇعىمدار بۇگىنگى استانانىڭ ءمانىن ايقىندايدى. تاۋەلسىزدىك تاڭىمەن ۇلت كوشباسشىسى بۇگىن الەمگە تانىلعان ەتنوسارالىق تولەرانتتىلىق پەن قوعامدىق كەلىسىمنىڭ ۇلگىسىنە اينالعان ۇلتتىق ۇيىسۋدىڭ وزىندىك فورمۋلاسىن ازىرلەدى. استانا جانە نۇرسۇلتان نازارباەۆ – بۇل ەكى اتاۋ ءبىرى-بىرىنەن اجىراعىسىز تاريحي فاكت. ءبىز, قازاقستان حالقى, بىرگە جۇمىلا وتىرىپ, استانانىڭ جەر بەتىندەگى ەڭ بەيبىت, گۇلدەنگەن  باس قالاعا  اينالۋىنا كۇش سالۋعا ءتيىسپىز! وسى ىزگى مىندەتتى اتقارۋدا بارشاڭىزعا كۇش-قۋات, تالماس جىگەر, قايتپاس قايسارلىق تىلەيمىز! ءبىزدىڭ ەلوردامىز بەيبىتشىلىك پەن كەلىسىمنىڭ بەينەسى, مادەنيە­ت­ارالىق ۇنقاتىسۋ مەن تولەرانتتىلىقتىڭ ورتالىعى بولىپ قالا بەرسىن! اس­تا­نامىز شۋاعىن شاشىپ, ەلىمىز تۇراقتى, جۇرتىمىز باقىتتى بولسىن! بارشالارىڭىزدى مەرەكەلەرىڭىزبەن, استانا كۇنىمەن قۇتتىقتايمىز! قازاقستان حالقى اسسامبلەياسىنىڭ كەڭەسى.