كەشە اقوردادا مەملەكەتتىك حاتشى قانات ساۋداباەۆتىڭ توراعالىعىمەن قازاقستان رەسپۋبليكاسى تاۋەلسىزدىگىنىڭ 20 جىلدىعىن وتكىزۋ جونىندەگى مەملەكەتتىك كوميسسيانىڭ وتىرىسى بولىپ ءوتتى.
ونىڭ جۇمىسىنا ۇكىمەت ءمۇشەلەرى, وبلىستار جانە استانا مەن الماتى قالالارىنىڭ اكىمدەرى قاتىستى. وتىرىستا وسى ۋاقىتقا دەيىن تاۋەلسىزدىكتىڭ 20 جىلدىعىن اتاپ وتۋگە بايلانىستى ءبىر جارىم مىڭنان ارتىق شارالاردىڭ وتكىزىلگەنى اتاپ كورسەتىلدى. ولاردى وتكىزۋگە جاستار, عىلىم جانە شىعارماشىلىق ينتەلليگەنتسيا, ونەركاسىپ پەن اۋىلشارۋاشىلىق, ۇكىمەتتىك ەمەس ۇيىمدار جانە قوعامدىق قوزعالىستار وكىلدەرى بەلسەنە قاتىستى.
ءسويتىپ, مەرەيتويلى جىلعا ارنالعان مەرەكەلىك شارالار ءىس ءجۇزىندە بۇكىلحالىقتىق سيپاتقا يە بولدى.
وتىرىسقا قاتىسۋشىلار الدىندا سويلەگەن سوزىندە مەرەيتويلىق شارالاردى وتكىزۋ ءجونىندەگى مەملەكەتتىك كوميسسيانىڭ ءتوراعاسى قانات ساۋداباەۆ بيىلعى جىلدىڭ ەگەمەندى ەلىمىزدىڭ تاريحىندا ايتۋلى كەزەڭ بولىپ وتىرعانىن اتاپ ءوتتى. ول ءبىزدىڭ ەلىمىزدىڭ تاريحىنا رەسپۋبليكانىڭ جانە ايماقتاردىڭ قول جەتكىزگەن تاماشا تابىستارىن, قازاقستاننىڭ جانە كوشباسشىمىز نۇرسۇلتان نازارباەۆتىڭ الەمدىك اۋقىمداعى وسكەن بەدەلىن كورسەتۋمەن عانا ەنبەي, مەملەكەتىمىزدىڭ الەۋمەتتىك-ەكونوميكالىق جانە مادەني-گۋمانيتارلىق سالادا ودان ءارى دامۋىنا قۋاتتى سەرپىن بەرەتىن جىل رەتىندە اتالۋى كەرەك. مەرەيتويلى جىلدىڭ ءاربىر كۇنى ورەلى ىستەرمەن جانە تۇڭعىش پرەزيدەنتىمىز, ەلباسى نۇرسۇلتان نازارباەۆتىڭ قۋاتتى ءارى وركەندى قازاقستاندى جاساۋ جولىندا بەلگىلەگەن ستراتەگياسىنا وتانداستارىمىزدىڭ قوسقان ناقتى ۇلەسىن كورسەتۋمەن ەستە قالاتىن بولسىن, دەدى قانات ساۋداباەۆ.
وتىرىستا مەرەيتويلى جىلدىڭ التى ايىنداعى جالپىۇلتتىق شارالار جوسپارىنىڭ ورىندالۋى قورىتىندىلاندى, سونداي-اق استانا مەن وبلىستارداعى بەلگىلەنگەن شارالاردىڭ قالعان ۋاقىتتا دا ۇلكەن ۇيىمشىلدىقپەن جانە مازمۇندى ءوتۋى جونىندەگى ءماسەلەلەر قاراستىرىلىپ, تالقىلاندى.
جاقسىباي سامرات.