ەلىمىزدىڭ تاۋەلسىزدىك الۋى الەمدىك قوعامدىقپەن, ونىڭ ىشىندە الىس-جاقىنداعى مەملەكەتتەرمەن تەرەزەسى تەڭ جاعدايدا قاتىناستار جاساۋىنا جول اشتى. سول ىنتىماقتاستىق جۇزدەگەن, ءتىپتى, مىڭداعان جىلدارعا سوزىلاتىن ديپلوماتيادان باستاۋ الادى. سونىڭ ناقتى مىسالىن بۇگىندە ديپلوماتيالىق قاتىناستار ورناعانىنا شيرەك عاسىر بولعان قازاقستان مەن پولشا اراسىنداعى بايلانىستار كورسەتىپ تۇر.
قازاقستان-پولشا قاتىناستارىنىڭ اۋقىمى جىل وتكەن سايىن كەڭەيىپ كەلەدى. ەلدەردىڭ ەكىجاقتى ىنتىماقتاستىعى ءوزارا تۇسىنىستىك جانە شىنايى ءۇيلەسىمدىلىكپەن ەرەكشەلەنەدى. مەملەكەتتەر اراسىندا قانداي دا ءبىر ساياسي نەمەسە ەكونوميكالىق پروبلەما جوق. ءاسىرەسە, ساياسي-ەكونوميكالىق, مادەني-گۋمانيتارلىق, عىلىمي-تەحنيكالىق سالالارداعى بايلانىستار ويداعىداي دامۋ ءۇستىندە. بۇگىندە ەلىمىزدىڭ پولشامەن ىنتىماقتاستىعىندا ينۆەستيتسيا, يندۋستريالىق-يننوۆاتسيالىق جانە كولىك-ترانزيتتىك ماسەلەلەر باسىمدىققا يە بولىپ وتىر.
قازىرگى كەزدە قازاقستان ورتالىق ازياداعى, ال پولشا ورتالىق ەۋروپاداعى ەڭ ءىرى ءارى ءوز وڭىرلەرى بويىنشا ەكونوميكالىق جاعىنان ورنىقتى دامىپ كەلە جاتقان كوشباسشى مەملەكەتتەر بولىپ سانالادى. سونداي-اق, ءبىزدىڭ ەلىمىز ءۇشىن بۇل ەل – ورتالىق جانە شىعىس ەۋروپاداعى جەتەكشى ەكونوميكالىق ءارىپتەستەردىڭ ءبىرى. ونىڭ ۇستىنە, ەكى مەملەكەت تە وزدەرىندە جاقسى جولعا قويىلعان كولىك-ترانزيتتىك الەۋەتتەرىن بىرلەسىپ پايدالانۋعا قىزىعۋشىلىق تانىتىپ وتىر. ۋاقىت وتكەن سايىن قازاقستان مەن پولشا اراسىنداعى ساۋدا اينالىمى كورسەتكىشى دە ارتا تۇسۋدە. ول 2015 جىلدىڭ قورىتىندىسى بويىنشا 1,13 ميلليارد دوللاردى قۇرادى.
دەگەنمەن, ساراپشىلاردىڭ پىكىرىنشە, بۇل ەكى ەلدىڭ دە مۇمكىندىگىنەن ەداۋىر ءتومەن. وسى ماسەلەنى ەلباسىمىز نۇرسۇلتان نازارباەۆ وتكەن جىلدىڭ تامىزىندا ۆارشاۆاعا ساپارى كەزىندە پولشا پرەزيدەنتى اندجەي دۋدامەن كەزدەسۋىندە دە اتاعان ەدى. ەكى مەملەكەتتىڭ ساۋدا-ەكونوميكالىق, ينۆەستيتسيالىق, اۋىل شارۋاشىلىعى, كولىك-ترانزيتتىك جانە مادەني-گۋمانيتارلىق سالالاردا ءوزارا ءىس-قيمىلدى نىعايتۋ ماسەلەلەرى تالقىلانعان سول كەزدەسۋدە قازاقستان پرەزيدەنتى: «ءبىزدىڭ ەلدەرىمىزدى ورتاق تاريح بايلانىستىرادى. پولشا – قازاقستاننىڭ ەۋروپاداعى ەڭ جاقىن ءارى ماڭىزدى سەرىكتەستەرىنىڭ ءبىرى. ەلدەرىمىز اراسىندا, ءاسىرەسە, ەكونوميكالىق سالالار بويىنشا ءوزارا ءتيىمدى كوپتەگەن پەرسپەكتيۆالى باعىتتار بار. ەكى ەلدىڭ تاۋار اينالىمى قازىرگى الەۋەتىمىزدى تولىق كورسەتە المايدى», – دەپ اتاپ وتكەن بولاتىن.
مەملەكەت باسشىسىنىڭ وتكەن جىلعى پولشاعا ساپارى ەكى ەلدى بۇرىنعىدان دا جاقىنداستىرا ءتۇستى. ەلباسى 400-گە جۋىق كاسىپكەر قاتىسقان بيزنەس-فورۋمدا پولشا بيزنەسمەندەرىن ەلىمىزدە جاڭادان اشىلعان كاسىپورىندارعا اتسالىسۋعا شاقىردى. ءويت-كەنى, سوڭعى بەس جىل ءىشىندە قازاقستاندا 1 مىڭعا جۋىق جاڭا ءوندىرىس ورنى اشىلعان ەدى. ەلىمىزدە شەتەلدىك ينۆەستيتسيالار ءۇشىن بارلىق جاعداي جاسالعان. ال قازىرگى ۋاقىتتا ەكى مەملەكەتتىڭ ازاماتتارى ءۇشىن ۆيزاسىز رەجىم ەنگىزۋ ماسەلەسى قاراستىرىلۋدا. سونىمەن بىرگە, پولشا ۇكىمەتى ۆارشاۆا – استانا – ۆارشاۆا تىكەلەي اۋە قاتىناسىن اشۋعا نيەت ءبىلدىرىپ وتىر.
قازاقستان جالپىعا ورتاق كوپتەگەن حالىقارالىق باستامالاردىڭ اۆتورى رەتىندە الەمدىك قوعامداستىققا بەلگىلى. ال قازاقستان مەن پولشانىڭ جاھاندىق ءجانە وڭىرلىك قاۋىپسىزدىكتى قامتاماسىز ەتۋ, قازىرگى زامانعى سىن-قاتەرلەرگە قارسى كۇرەستى ورىستەتۋ سياقتى ماسەلەلەردە ۇستانعان كوزقاراستارى ۇقساس. تاراپتار ءبىر-ءبىرىنىڭ باستامالارىنا دا بارىنشا قولداۋ كورسەتىپ كەلەدى. مىسالى, پولشا قازاقستاننىڭ ەكسپو-2017 حالىقارالىق كورمەسىن استانادا وتكىزۋ ماسەلەسى قاراستىرىلعاندا ءبىزدىڭ ەلىمىزدىڭ كانديداتۋراسىنا قولداۋ ءبىلدىردى. پولشا ۇكىمەتىنىڭ ەكسپو-2017 كورمەسىندە وزدەرىنىڭ ۇلتتىق پاۆيلونىن ۇيىمداستىرۋدا ەرەكشە بەلسەندىلىك تانىتىپ جاتقانىن دا اتاپ وتكەن ءجون.
پولياك قوعامى ءبىزدىڭ ەلىمىزدىڭ بۇگىنگى تىنىس-تىرشىلىگىمەن, بولاشاقتاعى باعىت-باعدارىمەن جاقسى تانىس دەسەك, قاتەلەسە قويماسپىز. سەبەبى, ولار قازاقستان باسشىسىنىڭ «قازاقستان-2050» دامۋ ستراتەگياسىمەن, «100 ناقتى قادام» ۇلت جوسپارى جانە «نۇرلى جول» مەملەكەتتىك باعدارلاماسىمەن, سونداي-اق, «الەم. ءححى عاسىر» مانيفەسىمەن وزدەرىنىڭ مەملەكەتتىك ءتىلى – پولياك تىلىندە جاقىنىراق تانىستى. ساراپشىلار بۇل باعدارلامالىق قۇجاتتار مەن ەڭبەكتەر ساياساتكەرلەرمەن قاتار, قاراپايىم پولياك جۇرتشىلىعىنىڭ دا قىزىعۋشىلىعىن تۋدىرعانىن ايتادى. سونىمەن بىرگە, پولشا تاراپى ەلباسىنىڭ يادرولىق قارۋسىز الەم قۇرۋ جولىنداعى كۇش-جىگەرىن جوعارى باعالايدى. قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگى كەزىندە كۇن ءتارتىبىندە تۇرعان ماسەلەلەردى ويداعىداي ىسكە اسىراتىنىنا جانە وسىنداي جاۋاپتى مىندەتتى ابىرويمەن اتقاراتىنىنا سەنىم بىلدىرەدى.
بۇگىندە قازاقستاندا 34 مىڭعا جۋىق پولياك دياسپوراسى تۇرادى. ولاردى ەكى ەلدى رۋحاني بايلانىستىراتىن جانە ءوزارا ىنتىماقتاستىقتى نىعايتاتىن دانەكەر دەپ ايتۋعا بولادى. «بيىل پولياكتاردىڭ قازاقستانعا جەر اۋدارىلعانىنا 80 جىل تولادى, – دەگەن ەدى پرەزيدەنت وتكەن جىلعى پولشاعا ساپارى بارىسىندا. – ولاردىڭ بارلىعى ەلىمىزدە تۇرىپ جاتقان 130-دان استام ۇلت وكىلدەرىمەن تەڭ قۇقىلى ءوز ازاماتتارىمىز. مەملەكەت ولارعا بارىنشا قولداۋ كورسەتىپ كەلەدى».
قازاقستاندىق پولياكتار ەلىمىزدىڭ قوعامدىق-ساياسي جانە مادەني ومىرىنە بەلسەندى ارالاسىپ ءجۇر. ارالارىنان تانىمال زاڭگەرلەردى, عالىمداردى, بيزنەسمەندەردى دە كەزدەستىرۋگە بولادى. پولياك ەتنوسىنىڭ ۇلتتىق ءتىلىن, سالت-ءداستۇرىن جانداندىرۋ ماقساتىندا قازاقستان پولياكتارىنىڭ وداعى جۇمىس ىستەيدى جانە ونىڭ قازاقستان حالقى اسسامبلەياسىندا وكىلدىك ەتەتىن ەلىمىزدىڭ بارلىق وڭىرلەرىندە فيليالدارى بار.
ال پولشادا دا قازاقستاندىق پولياكتارمەن بايلانىس ورناتۋعا باسا كوڭىل ءبولىنىپ كەلەدى. سوندىقتان, ءوزارا قارىم-قاتىناس جاساۋدىڭ ءدال وسى سالاسى قازاقستان-پولشا ىنتىماقتاستىعىنىڭ ماڭىزدى ءبىر بولىگىن قۇرايدى. بۇگىندە وسى ەلدە 700-دەن استام قازاقستاندىق ستۋدەنت ءبىلىم الۋدا.
قازاقستان مەن پولشا اراسىنداعى قول جەتكىزىلگەن بۇگىنگى كۇنگى جەتىستىكتەر ەكى ەلگە شەكتى ولشەم بولىپ ەسەپتەلمەيدى. ءالى ول نىعايادى, كەڭيدى, ەسەلەپ ارتادى. ەلدەر اراسىنداعى ىنتىماقتاستىقتىڭ دامۋ قارقىنى سونى كورسەتىپ تۇر.
ءاليسۇلتان قۇلانباي,
«ەگەمەن قازاقستان»