جىل سايىن ەلىمىزدە 33 مىڭ ادام قاتەرلى ىسىككە شالدىعادى. ونىڭ بەس پايىزى عانا تۋا ءبىتتى اقاۋدان پايدا بولادى ەكەن. اتىراۋدا تىنىس الۋ ورگاندارىنىڭ اۋرۋى, سونىڭ ىشىندە وكپە راگى كوپ تىركەلەدى. وبلىستىق ونكولوگيا ديسپانسەرىنىڭ باس دارىگەرى جەكسەنباي نىسانوۆ بۇل اۋرۋعا شالدىعۋعا شىلىم شەگۋ, سالاماتتى ءومىر سالتىن ساقتاماۋ جانە ەكولوگيالىق احۋالدىڭ ناشارلاۋى سەبەپ بولىپ وتىرعانىن ايتادى. قاتەرلى ىسىكتى انىقتاۋدا بۇگىنگى مەديتسينانىڭ مۇمكىندىگى مول, بىراق اۋىر دەرتتىڭ العاشقى بەلگىلەرى بايقالماي وتەدى. سوندىقتان دا ناۋقاستاردىڭ 70 پايىزىندا ىسىك ءۇشىنشى, ءتىپتى, ءتورتىنشى ساتىسىندا داميتىنى انىقتالعان. تۇرعىنداردىڭ سكرينينگتىك تەكسەرۋلەرگە ءالى دە نەمقۇرايلى قارايتىنى تاعى بار.
سوڭعى سكرينينگتىك تەكسەرىس ناتيجەلەرى اسقازان, وڭەش جولدارىنىڭ قاتەرلى ىسىگى بەلەڭ الىپ بارا جاتقانىن انىقتاپتى. سوندىقتان دا وبلىستىق دەنساۋلىق ساقتاۋ باسقارماسى اتى جامان اۋرۋدىڭ الدىن الۋ, ەمدەۋ ساپاسىن جاقسارتۋ ماقساتىندا «ونكولوگيالىق يننوۆاتسيالار» تاقىرىبىندا رەسپۋبليكالىق عىلىمي-تاجىريبەلىك كونفەرەنتسيا ءوتكىزىپ, ەلىمىزدىڭ ءار ايماعىنان ەلۋگە جۋىق دارىگەردى اتىراۋعا جينادى. ولارعا استانا مەن الماتىدان كەلگەن ءبىلىكتى ماماندار ءدارىس وقىدى. سونداي-اق, ناۋقاستارعا رەسەيلىك اكادەميك وتا جاسادى.
قازىر وبلىستىق ونكولوگيالىق ديسپانسەردە 3464 ەمدەلۋشى تىركەۋدە تۇر. وكىنىشتىسى, جىل سايىن 500-دەي ادام وسى اۋرۋ سالدارىنان كوز جۇمادى. وبلىستىق دەنساۋلىق ساقتاۋ باسقارماسىنىڭ كەڭەسشى ونكولوگى, مەديتسينا عىلىمدارىنىڭ دوكتورى قايىرجان ءابيساتوۆتىڭ ايتۋىنشا, ايماقتا جىلىنا 850 ادامنان قاتەرلى ىسىك تابىلادى ەكەن. ءبىر «قىزىعى» – اتىراۋلىقتار سىرقاتتانا قالسا, ەمدى سىرتتان ىزدەيدى. شەكارا اسىپ, شەت ەلگە كەتەتىندەر كوپ. جەرگىلىكتى ءدارىگەرلەرگە دەگەن سەنىمسىزدىككە بوي الدىرىپ, اۋرۋلارىن اسقىندىرىپ الاتىندار دا كەزدەسەدى. ارينە, ناۋقاس قايدا ەمدەلسە دە ەركى, دەگەنمەن, بۇل دۇرىس ەمەس, دەيدى دارىگەرلەر. ويتكەنى, قازىر اتىراۋداعى ونكولوگيالىق ديسپانسەردىڭ جاعدايى جاقسارعان, زاماناۋي تەحنولوگيانىڭ ءتۇر-ءتۇرى بار, ماماندار دا تاجىريبەلى.
باقىتگۇل باباش,
«ەگەمەن قازاقستان»
اتىراۋ