قاراعاندى وبلىسىنىڭ اكىمى نۇرمۇحامبەت ابدىبەكوۆ قارقارالى اۋدانىنىڭ كوكتەمگى سۋ تاسقىنىنا دايىندىعىن تەكسەردى. «جىل سايىن سۋ تاسقىنى وسى جەردەن باستالاتىندىقتان, ارنايى كەلىپ وتىرمىز. وزەن وسى جەردەن باستالادى. جوسپارلانعان سۋ تاسقىنىنا قارسى ءىس-شارالاردى جۇزەگە اسىرۋدىڭ بارىسىمەن تانىسامىز. ءبىزدىڭ ءمىندەتىمىز – توتەنشە جاعدايلارعا جول بەرمەۋ جانە ادامداردىڭ قاۋىپسىزدىگىن قامتاماسىز ەتۋ», دەدى ءوڭىر باسشىسى.
وبلىس اكىمى, سونىمەن قاتار, سۋ باسۋ قاۋپى بار قارقارالىنىڭ بىرنەشە اۋىلىن ارالادى. وبلىس اكىمى نۇرا وزەنىنىڭ بويىنداعى ىنتالى اۋىلىنىڭ جاعدايىمەن تانىستى. كوكتاس اۋىلىنا جاقىن ماڭدا نۇرمۇحامبەت ءابدىبەكوۆ قارقارالى اۋدانىنىڭ اكىمى حالەل ماقسۇتوۆتىڭ اعىمداعى جاعداي مەن قابىلداناتىن شارالار تۋرالى بايانداماسىن تىڭدادى. وبلىس اكىمى, سونداي-اق, تەگىسشىلدىك اۋىلىنىڭ جانىنداعى جارلى وزەنىنىڭ جاعاسىن قارادى.
سونىمەن قاتار, نۇرمۇحامبەت ءابدىبەكوۆ قاردىڭ استىندا قالۋ قاۋپى بار بۇركىتتى اۋىلىنىڭ تۇرعىندارىمەن كەزدەستى. اۋىل تۇرعىندارىنىڭ ايتۋىنشا, 50 جىلدان بەرى مۇنداي قالىڭ قار جاۋماعان. اۋدان باسشىسى قار شىعارۋ جۇمىستارى ۇيىمداستىرىلعانىن, جۇمىستارعا ارنايى تەحنيكانىڭ تارتىلعانىن حابارلادى.
وسى رەتتە قاراعاندى وبلىسىندا «قاراعاندى – اياگوز – تارباعاتاي – بۇعاز» اۆتوكولىك جولىنىڭ ۋچاسكەسىندە ۇزىندىعى 94 شاقىرىم جول جابىنىنا ورتاشا جوندەۋ جۇمىستارى ءجۇرگىزىلمەك. جوباعا جول استىنداعى سۋ وتكىزۋ قۇدىقتارىن اۋىستىرۋ دا ەنگىزىلگەن. سونداي-اق, ماتاق اۋىلىن قىزىل سۋدان قورعايتىن ءبوگەتتىڭ قۇرىلىسى قاراستىرىلعان. جوبانىڭ جالپى قۇنى – 499 ملن تەڭگە. جۇمىستار 2017 جىلعا جوسپارلانعان.
«بۇگىن بەلگىلەنگەن جۇمىستار كەشەنىنىڭ ىسكە اسىرىلىپ جاتقانىن كوردىك. قوسىمشا كۇشەيتۋدى قاجەت ەتەتىن جايتتار بار. ساقتانساڭ – ساقتايدى دەمەكشى, بيىلعى قىزىل سۋدىڭ قارقىنى بىلتىرعىدان كەم بولماۋى مۇمكىن», دەدى نۇرمۇحامبەت ابدىبەكوۆ.
جالپى, وبلىستىڭ 2017 جىلعى سۋ تاسقىنىنا دايىندىعى جوسپارلى تۇردە ءوتىپ جاتىر. ماتەريالدىق جانە قارجىلىق قور جاسالعان.
ميراس اسان,
«ەگەمەن قازاقستان»
قاراعاندى وبلىسى