ساراپشى «قايرات» پەن «استانانىڭ» سۋپەركۋبوك فينالىنداعى كەزدەسۋىنە بولجام جاسادى

قازاقستاندىق ساراپشى اعادىلدا قاسەنوۆ «استانا» مەن «قايرات» اراسىنداعى ماتچ جايلى وي ءبولىستى. بۇل تۋرالى vesti.kz حابارلادى. «ەلىمىزدىڭ قوس مىقتى كوماندالارى وينايدى. سوندىقتان ماتچتىڭ تارتىستى وتەتىنىنە كۇمانىم جوق. ەگەر اۋا رايى قولايلى بولسا, ستاديونعا ءبىراز جانكۇيەردىڭ كەلەرى انىق. مۇنداي ماتچتا ناقتى ءبىر كوماندانىڭ جەڭىسىنە سەنىم ارتۋ قيىن. «قايرات» ءوز الاڭىندا ويناعاندىقتان, جانكۇيەرلەرىنىڭ قولداۋى كومەگىن تيگىزەرى بەلگىلى. وتكەن ماۋسىمداعى ساتسىزدىكتەرىنىڭ ورنىن تولتىرادى دەگەن ويدامىن. مەنىڭشە, 2:1 ەسەبىمەن «قايرات» جەڭىسكە جەتەدى», – دەدى ساراپشى. «استانادان» روحەر كانياس كەتتى. بۇل دا كەرى اسەرىن تيگىزبەي قويمايدى. كوماندانىڭ وتكىر شابۋىلدارى كوبىنە وسى كولۋمبيالىق فۋتبولشىدان باستاۋ الاتىن. اسىرەسە, قورعانىس پەن شابۋىلدى جالعاستىراتىن بىردەن ءبىر ماڭىزدى ويىنشى بولاتىن. ونىڭ ورنى ويسىراپ تۇرادى. بىراق فۋتبولدىڭ اتى فۋتبول. كۇتپەگەن جايتتاردىڭ دا بولىپ تۇرۋ قالىپتى جاعداي. بالكىم, يۆان ماەۆسكي ءوزىن جاقسى قىرىنان كورسەتىپ قالار», – دەدى ول. «كانياستىڭ سوڭعى ماۋسىمدا ءساتسىز ونەر كورسەتىپ جۇرگەنى بايقالدى. ەلوردالىقتار ونى جالعا بەرىپ, دۇرىس قادام جاسادى. ال ماەۆسكيدىڭ قانشالىقتى بىلىكتى ويىنشى ەكەنىن ۋاقىت كورسەتەدى. ستانيمير ستويلوۆتىڭ ءۇمىتىن اقتايدى دەگەن ويدامىن», – دەدى قاسەنوۆ. «قايرات» ترانسفەرلىك ۋاقىتتا قاجەت ويىنشىلارمەن تولىقتى. جەڭىسكە دەگەن قۇلشىنىستارى دا بايقالادى. الماتىلىقتار بيىل ەل چەمپيوناتىندا توپ جارادى دەپ ويلايمىن. چەمپيون اتاناتىن كەزى كەلدى», – دەدى ول. ايتا كەتەيىك, قوس كوماندا 4 ناۋرىز كۇنى الماتىداعى ورتالىق ستاديوندا قازاقستان سۋپەركۋبوگىن ساراپقا سالادى. ماتچ استانا ۋاقىتى بويىنشا ساعات 15:00-دە باستالادى.