وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قر ءبىلىم جانە عىلىم ءمينيسترى ەرلان ساعاديەۆپەن كەزدەستى. جۇزدەسۋ بارىسىندا ەلباسى جولداۋى جۇكتەگەن ءبىلىم مەن عىلىمدى دامىتۋدىڭ مەملەكەتتىك باعدارلاماسى تالقىلانىپ, ءبىلىم بەرۋ مازمۇنىن جاڭارتۋدىڭ نەگىزگى باعىتتارى جونىندە ءسوز قوزعالدى, دەپ حابارلادى وقو اكىمىنىڭ ءباسپاسوز قىزمەتى.
ءوز كەزەگىندە ەرلان كەنجەعالي ۇلى بازالىق وقۋلىقتار ازىرلەۋگە قاتىستى مينيسترلىك جۇرگىزىپ جاتقان رەفورمالار تۋرالى دا ءسوز ەتتى.
«ەلىمىزدە ءبىلىم سالاسىنا ەرەكشە ءمان بەرىلىپ وتىر. جاڭا زامانعا ساي تالاپتار رەتىمەن ەنگىزىلۋدە. ءبىز وسىنداي قادامدار ارقىلى قازاقستانداعى ءبىلىم بەرۋ جۇيەسىن كۇتىلگەن ستاندارتتارعا جەتكىزەمىز. تاعى ءبىر جاڭالىقتار - ەلەكتروندى پورتال. بۇل ءوز كەزەگىندە مۇعالىمدەردى قاعازباستىلىقتان بوساتادى. «كۇندەلىك» پورتالى مەن وقۋشىلاردىڭ ۇبت جانە باسقا دا ەمتيحاندارعا دايىندالۋىنا كومەكشى قۇرال بولاتىن «ۆilim Land. Kz» ينتەرنەت پورتالى ىسكە قوسىلىپ وتىر. مەكتەپتەردى ينتەرنەتپەن جانە ينتەراكتيۆتى تاقتالارمەن قامتۋ دا باستى نازاردا بولادى», - دەدى ەرلان كەنجەعالي ۇلى.
ءبىلىم جانە عىلىم مينيسترلىگى بيىلدان باستاپ جالپى ءبىلىم بەرەتىن مەكتەپتەردىڭ مۇعالىمدەرىن اتتەستتاۋدىڭ جاڭا قاعيدالارىن ازىرلەپ شىقتى. بۇدان بولەك, بالاباقشالاردا, مەكتەپتەردە, كوللەدجدەردە جانە جوو-لاردا مەملەكەتتىك باقىلاۋ شەڭبەرىندە تاۋەكەلدەردى باعالاۋ جۇيەسى بويىنشا جاڭا تاسىلدەر قولدانىلا باستادى.
وڭتۇستىك قازاقستان وبلىسى ەلىمىزدەگى ەڭ كوپ وقۋشىلار توپتاسقان ءوڭىر بولىپ سانالادى. ءار جىل سايىن مەكتەپ تابالدىرىعىن اتتايتىن بالالار 30 مىڭعا كوبەيىپ وتىر. جىلىنا ورتاشا ەسەپپەن 80 مىڭعا جۋىق نارەستە تۋىلادى. سوندىقتان دا وڭىردە مەكتەپ تاپشىلىعى تۋىنداۋدا.
«جالپى, بۇگىندە وبلىسىمىزدا 1021 مەكتەپ بار. الداعى 5 جىلدا 205 مەكتەپتىڭ قۇرىلىسىن جۇرگىزۋدى جوسپارلاپ وتىرمىز. ەلباسىمىزدىڭ جولداۋىن ىسكە ماسىرۋ بارشامىزعا مىندەت. وسى ورايدا ەلىمىزدەگى ءبىلىم مەن عىلىم جۇيەسىنىڭ الداعى رەفورمالارىن بىرلەسە اتقارۋعا نيەتتىمىز. ءوزىمنىڭ وسى سالاداعى تاجىريبەم مەن ءبىلىمىمدى بولىسۋگە قاشاندا ءازىرمىن», - دەدى جانسەيىت قانسەيىت ۇلى.
ايتا كەتەيىك, وبلىسىمىزدا "بالاپان" باعدارلاماسى اياسىندا 3 پەن 6 جاس ارالىعىنداعى بالالاردى مەكتەپكە دەيىنگى ۇيىمدارمەن قامتۋ ماسەلەسى باستى نازارعا الىنىپ وتىر. الداعى 3 جىلدا مەملەكەتتىك-جەكەمەنشىك ارىپتەستىگى اياسىندا بالاباقشا سانىن 100 پايىزعا جەتكىزۋ جوسپارلانۋدا. كەزدەسۋ سوڭىندا ءبىلىم جانە عىلىم مينيسترلىگى مەن وبلىس اكىمدىگى وڭتۇستىك وڭىرىندەگى ءبىلىم سالاسىنداعى كۇرمەۋلى ماسەلەلەردى بىرلەسە شەشۋگە ۋاعدالاستى.